“Өнөөгийн Ертөнцийг Үндэслэгч Чингис хаан” ном нь дэлхийн 22 оронд хэвлэгдэж “Нью-Йорк таймс” сонины шилдэг номоор шалгарч байсан Макалейстрийн Их Сургуулийн хүн судлалын профессор, зохиолч Жак Уэтерфорд өнөөдөр Ерөнхийлөгчид бараалхлаа.
Уулзалтын эхэнд профессор Уэтерфорд Монгол Улсын шинэ Ерөнхийлөгчөөр сонгогдсон Ц.Элбэгдоржид баяр хүргэсэн юм.
Тэрээр энэ удаад монголд ирэхдээ Чингис хааны тухай дэлхийд алдаршсан номоо монгол хэл дээр дахин хэвлүүлж мөн 2010 оны хавар АНУ болон бусад оронд нээлтээ хийхээр зэхэж буй “Монголын Их Хатдын Нууц Товчоо” хэмээх шинэ номоо монгол хэл дээр хэвлүүлсэн бөгөөд хос номынхоо дээжээс Ерөнхийлөгчид өргөн барив.
Монголын талаар сүүлийн 30 шахам жилийн турш судалгаа хийж буй профессор Уэтерфорд нь 15 дугаар зуунаас хойшхи Герман, Англи, Итали зэрэг европийн олон оронд хийгдсэн Монголын тухай 50 гаруй газрын зургийг багтаатсан нэн ховор цуглуулгаа дараа жилийн хавар Монголын ард түмэнд бэлэглэх тухайгаа Ерөнхийлөгчид хэллээ.
Уулзалтын үеэр Монгол Улсын Ерөнхийлөгч, профессор Уэтерфордын Монгол орны түүх шашдир, соёл, зан заншлыг өөрийн номоороо дамжуулан дэлхий дахинд өргөнөөр сурталчилж буйд нь талархал илэрхийлээд мөн орчин цагийн Монгол орны түүхэн ном бүтээх талаар судалж үзэх санал тавьсан юм.
Профессор Уэтерфорд энэхүү саналыг нухацтай судлан тун удахгүй хариу мэдэгдэхээ илэрхийлсэн юм.