Манай улсад айлчилж байгаа ОХУ-ын БНТува Улсын Засгийн газрын дарга Ш.В.Кара-оол өнөөдөр Монгол Улсын Ерөнхийлөгчид бараалхлаа.
“Саяхан ОХУ-ын Ерөнхийлөгчтэй зурсан “Стратегийн түншлэл хөгжүүлэх тухай Тунхаглал”-ын нэг чухал тохироо нь хил, бүс нутгийн хамтын ажиллагааг эрчимжүүлэхэд чиглэж байгаа. Монгол Улс ОХУ-ын субьектүүд, ялангуяа хил залгаа Бүгд найрамдах улс, муж, хязгааруудтай шууд харилцаа хамтын ажиллагааг хөгжүүлэхэд онцгой ач холбогдол өгдөг юм” гэж Монгол Улсын Ерөнхийлөгч Ц.Элбэгдорж, ОХУ-ын БНТува улсын ЗГ-ын дарга Ш.В.Кара-оолыг хүлээн авч уулзах үеэрээ хэллээ.
1921 онд суурь нь тавигдсан харилцаа эдийн засаг, соёл, боловсролын салбарт өргөжин хөгжсөөр, 1991 онд МУ, БНТува улстай эдийн засгийн талаар хамтран ажиллах тухай Тунхаглалд хоёр талаас гарын үсэг зурсан,1992 онд хоёр талын байнгын ажиллагаатай ачаа тээврийн боомттой болсон, 1995 оноос Тувагийн иргэдийг Монголын их дээд сургуулиудад сургаж эхэлсэн гэхчилэн 2 талын харилцаанд дэвшил гарсаар байгаа билээ. Гэвч шийдвэрлэх ёстой асуудлууд хүлээгдэж байгаа гэдгийг ноён Ш.В.Кара-оол хэллээ. Тухайлбал, бэлчээрээр буюу хулгайлагдан, хил давсан малыг эрэн сурвалжлах, буцаан олгох асуудлыг хариуцсан хамтарсан Комисс байгуулах ноот бичиг 2000 онд ОХУ-ын Ерөнхийлөгч В.Путины айлчлалын үеэр зурагдаж байсан, энэ дагуу комисс байгуулах ажил одоо хийгдэж байна. ОХУ-ын БНТува улсын ЗГ-ын тэргүүн мөн, төлөөлөгчийн газар байгуулах, соёлын харилцааг өргөтгөх талаар тодорхой санал хэллээ.
Удаан яригдаж байгаа өөр нэг асуудал бол малыг хөлөөр нь гаргах, махны экспортыг нэмэгдүүлэх явдал. Монгол Улсын Ерөнхийлөгч хэлэхдээ “ Бидэнд мал аж ахуйн гаралтай бүтээгдэхүүнээ экспортлох шаардлага бий, та бүхэнд харин хэрэгцээ нь байгаа. Олон жил ярьсан мах махан бүтээгдэхүүний нийлүүлэлтийг нэмэгдүүлэх, малыг хөлөөр нь гаргах ажлыг одоо яаралтай ажил хэрэг болгох цаг нь болсон гэж үзэж байна. Энд ямар нэгэн хүнд суртал байх учиргүй юм. Орон нутгийн удирдлагатай сайн ярилцаж, тохироод, айлчлалынхаа дүнд энэ асуудлаар ямар нэг алхам хийх байх гэж найдаж байна. Таны ярьсан бусад асуудлыг дэмжиж байна” гэлээ.