Сайн дурын хөдөлмөрийг дэмжих асуудлаар ярилцлаа
Монгол Улсын Ерөнхийлөгчийн Тамгын газраас санаачлан Хөдөлмөрийн яам, Нэгдсэн үндэстний байгууллагын сайн дурынхны хөтөлбөр, Сайн дурынхны байгууллагуудын сүлжээтэй хамтран “Сайн дурын хөдөлмөр” нээлттэй хэлэлцүүлгийг өнөөдөр зохион байгууллаа.
Хэлэлцүүлгээр Монгол дахь сайн дурынхны үйл ажиллагааны талаар хийсэн судалгаа, нөхцөл байдлын дүн шинжилгээний үр дүн”, “Бусад улс орнуудын тэргүүн туршлагаас Монгол Улсад авч хэрэгжүүлж болох шинэ санаа”, “Сайн дурын үйл ажиллагааны өнөөгийн эрх зүйн зохицуулалтыг сайжруулах өөрчлөлтүүдийн санал”, “Сайн дурын хөдөлмөрийг төрөөс дэмжих чиглэлүүд”-ийн талаар оролцогчид мэдээлэл хийв.
Манай улсад сайн дурын үйл ажиллагаанд жилд дунджаар 20000 хүн хамрагддаг. Энэ нь хүн амын 0.7 хувийг эзэлж байна. Тэдний нэг сард зарцуулж буй цагийг тооцвол 1.372.000 цаг буюу 2.4 тэрбум төгрөгийн хөрөнгө оруулалттай дүйх хувь нэмрийг эдийн засагт оруулж байна. Сайн дурынхан эрүүл мэндийн үйлчилгээг иргэдэд хүргэх, байгаль орчин хамгаалах, нөхөн сэргээх, бусдад туслах, төрийн үйлчилгээг гэрээлэх болон бусад чиглэлээр ажиллаж байна.
Сайн дурын байгууллагуудын сүлжээний захирал Г.Тунгалагтуул хэлэхдээ “Иргэдийн дунд сайн дурын байгууллага, тэдний үйл ажиллагааны талаар ойлголт дутмаг байдаг. Энэ чиглэлээр ажилладаг төрийн бус байгууллагуудад Засгийн газраас санхүүгийн дэмжлэг үзүүлдэггүй. Сайн дурын үйл ажиллагааг хариуцсан төрийн байгууллага ч байхгүй. Эдгээр нь бидний ажилд хүндрэл учруулдаг” хэмээлээ.
Монголын сайн дурын байгууллагуудын сүлжээнээс явуулсан судалгаагаар сайн дурын үйл ажиллагааг дэмжих бодлого, эсвэл хууль боловсруулах санааг дэмжих үү гэсэн санал асуулгад оролцогчдын 93 хувь нь “дэмжинэ” гэсэн хариулт өгчээ.
Хөдөлмөрийн яамнаас сайн дурын үйл ажиллагааг эрх зүйн болон санхүүгийн механизмын хувьд, төр, төрийн бус байгууллагуудын уялдаа холбоог хангахад дэмжлэг туслалцаа үзүүлэхээ илэрхийлэв. Яамны зүгээс эхний ээлжинд ахмад настан, залуучуудын сайн дурын хөдөлмөрийн үйл ажиллагааг дэмжиж ажиллах юм байна.
Хэлэлцүүлгийн төгсгөлд оролцогчид зөвлөмж гаргалаа. Зөвлөмжид “Монгол Улсын Ерөнхийлөгчид:
· УИХ , Засгийнгазар, олоннийтэдхандсанзарлиггаргах
УИХ, Засгийн газарт: Сайн дурын үйл ажиллагааг нийгмийн хөгжлийн үнэт нөөц хөрөнгийнх хувьд бодлогын дэмжлэгт орчин бүрдүүлж, төрийн санхүүжилтээр дэмжих:
o Шинэчлэлийн бодлогын хүрээнд авч үзэн сайн дурын үйл ажиллагааг үндэсний хэмжээнд хөгжүүлэх бодлогын дэмжлэгт орчин бий болгох бодлогын баримт бичиг боловсруулан УИХ-аар хэлэлцэн батлах
o Холбогдох хууль тогтоомжид зохих нэмэлт, өөрчлөлтүүд оруулах
· Сайн дурын үйл ажиллагааг манлайлан дэмжих үүргийг Монгол Улсын Засгийн газар хүлээх:
o Хөдөлмөр эрхлэлтийн үндэсний бодлогын хүрээнд сайн дурын хөдөлмөрийг авч үзэн хөгжүүлэх, асуудлыг эрхлэн гүйцэтгэх нэгжийг тодорхойлон албажуулах /институтчилэх/,
o Сайн дурын үйл ажиллагааны хөгжлийн үндэсний хөтөлбөр боловсруулах ажлыг удирдан зохион байгуулж, хэрэгжилтийг үндэсний хэмжээнд зохион байгуулах, хөтөлбөрийн санхүүжилтийг тогтвортой эх үүсвэртэй болгож шийдвэрлэх,
o Сайн дурын үйл ажиллагааг үндэсний хэмжээнд нэгдсэн зохицуулалтаар ханган ажиллах,
o Сайн дурын үйл ажиллагааг үндэсний хөгжлийн дэд бүтэц болгон хөгжүүлэхэд шаардлагатай санхүүжилтийг жил бүрийн төсөвт тусгах,
o Сайн дурын үйл ажиллагааны судалгаа, тайлан, үнэлгээний үндэсний хэмжээний нэгдсэн тогтолцоо бий болгон хөгжүүлэх,
o Үндэсний статистик бүртгэл, мэдээллийн системд албан ёсоор оруулан сайн дурын үйл ажиллагааны үндэсний хэмжээний мэдээ, мэдээлэл, тайлангийн нэгдсэн тогтолцоо бий болгох
o Сайн дурын үйл ажиллагааны тэргүүн туршлагыг дэмжин дэлгэрүүлэх: - баримтжуулах, түгээн дэлгэрүүлэх , урамшуулах механизм бий болгох
o Байгаль орчин, боловсрол, эрүүл мэнд, нийгмийн халамж, гэмт хэргээс урьдчилан сэргийлэх зэрэг боломжит бүхий л салбарт сайн дурынхны оролцоог ханган ажиллуулах
o Олон улсын сайн туршлагыг судлан өөрийн оронд тохиромжтойг сонгон хэрэгжүүлэх, тухайлбал Их Британийн 4 хүн тутмын 1 нь сайн дурын үйл ажиллагаанд оролцдог, төрийн албан хаагчдад нь жилд 3 өдөр сайн дурын үйл ажиллагаа хийх боломж олгодог, түүнчлэн зарим оронд хувийн хэвшлийнхэн “сайн дурын үйл ажиллагааны өдөр”-ийг байгууллагаараа тэмдэглэн зохион байгуулдаг гэх мэт үйл ажиллагааг төрөөс бодлогоор дэмжин хэрэгжүүлэх,
· Дэлхийн олон оронд жил бүрийн 12 дугаар сарын 5-ны өдөр зохион байгуулдаг “Олон улсын сайн дурын үйл ажиллагааг дэмжих” өдрийг Үндэсний хэмжээнд тэмдэглэж занших, ажил үйлсээрээ манлайлагчдыг алдаршуулах,
· Үндэсний хэмжээнд сайн дурынхны төв байгуулан ажиллуулах /Орон нутгийн засаг захиргааны бүхий л нэгжид салбар, төлөөлөлтэй байх/. Сайн дурынхантай ажилладаг байгууллагуудад зориулсан сургалт, сайн дурын үйл ажиллагааны үр өгөөжийн талаарх олон нийтийн мэдлэг, мэдээллийг дээшлүүлэх үйл ажиллагааг эрхлэн гүйцэтгэх,
· Сайн дураар ажиллах сонирхолтой хүмүүсийг сонирхсон ажилд нь зуучлах, сайн дурын үйл ажиллагааг сурталчлах, мэдээлэл өгөх үндэсний цахим хуудас ажиллуулах” гэжээ.
Сайн дурын хөдөлмөрийг дэмжих асуудлаар ярилцлаа