Данийн нийслэл Копенгаген хотноо болсон Уур амьсгалын өөрчлөлтийн асуудлаарх НҮБ-ын бага хурал өндөрлөсний дараа Монгол Улсын Ерөнхийлөгч Ц.Элбэгдорж, НҮБ-ын Ерөнхий нарийн бичгийн дарга Бан Ги Мүн нар уулзлаа.
Ноён Бан Ги Мүн, НҮБ-ын хэмжээнд зохиогдож байсан хурлуудаас хамгийн том түүхэн хурал нь энэ боллоо гэж онцлоод, “Эрхэм Ерөнхийлөгч Та Копенгагений индэр дээрээс намайг зоригжуулсан үг хэлсэнд би талархаж байна. Энэ хурлын үр дүн болж гарах төгсгөлийн баримт бичиг хүн төрөлхтөний түүхэн чухал баримт болно гэдэгт итгэж байна. Копенгаген бол бүхэлдээ амжилт юм” гэж ярив.
Тэрээр мөн, Монгол Улс Уур амьсгалын өөрчлөлтийн асуудлаарх НҮБ-ын бага хуралд болон, Өндөр хэмжээний уулзалтанд оролцоно гэдгээ эхнээс нь зарлаж, уур амьсгалын өөрчлөлтийн асуудлаар идэвхтэй ажиллаж байсанд Монгол Улсын Ерөнхийлөгчид талархлаа илэрхийллээ.
Ерөнхийлөгч Ц.Элбэгдорж, Копенгагенд зохиогдсон НҮБ-ын энэ хурал дэлхийн олон лидерүүдийг нэг дор цуглуулж, хүн төрөлхтөний анхаарлыг татаж чадсан амжилттай хурал боллоо гээд, дэлхийн уур амьсгалын өөрчлөлтийн сөрөг нөлөөллийг бууруулахын тулд Монгол Улс өөрт байгаа бололцоогоороо идэвхтэй хамтран ажиллах болно гэсэн байр сууриа дахин нотоллоо.
Энгийн, удаан үргэлжилсэн энэ ярианы дундуур НҮБ-ын Ерөнхий нарийн бичгийн дарга, Ерөнхийлөгч Ц.Элбэгдоржид хандан “Бид зөвхөн хамтран ажиллаж байгаа төдийгүй, нэг сургуулийн төгсөгчид, найз нөхөд юм” гэлээ.
Уулзалтын дараа ноён Бан Ги Мүн, Ерөнхийлөгч Ц.Элбэгдорж нар МҮОНТВ-ийн “ММ” агентлагт тусгайлан ярилцлага өгсөн юм.