Он солигдох энэ өдөр Монгол Улсын Ерөнхийлөгчийн зарлигаар Москва хотноо болсон нэрт хөгжмийн зохиолч М.И.Глинкийн нэрэмжит олон улсын дуурийн дуу дуулаачдын тэмцээнд Тэргүүн байр эзэлсэн Улсын дуурь бүжгийн эрдмийн театрын гоцлол дуучин Содномцэрэнгийн Мөнгөнцэцэгт Монгол Улсын гавъяат жүжигчин цол хүртээлээ.
Мөн Монгол Улсын үндэсний болон сонгодог урлагийг хөгжүүлэхэд өөрийн авъяас чадвараа бүрэн зориулж, дуурийн дуучдыг сурган бэлтгэхэд онцгой үүрэг гүйцэтгэн, дуучдын дуулах ур чадварыг мэргэжлийн өндөр түвшинд хүргэхэд оруулсан хувь нэмрийг нь өндрөөр үнэлж УДБЭТ-ын концертмейстер Баттөмөрийн Солонгод Монгол Улсын Гавъяат жүжигчин цол хүртээсэн юм.
Монгол Улсын Ерөнхийлөгч Ц.Элбэгдорж шагнал гардуулах үеэр хэлсэн үгэндээ, “Манай сонгодог урлагийнхан энэ жил өнгөтэй байна. Залуу дуучин Содномцэрэнгийн Мөнгөнцэцэг Глинкийн нэрэмжит дуурийн дуулаачдын уралдаанд тэргүүн байр эзэллээ. Спортоор бол энэ төрөлдөө дэлхийн аварга боллоо гэсэн үг.
Дуурийн урлаг өндөр хөгжсөн 19 орны шилмэл 181 дуучин өрсөлдсөн энэ тэмцээнээс алтан медаль хүртсэн нь Монгол Улсын хувьд анхны тохиолдол юм. Эх орныхоо сайн нэрийг сонгодог урлагийн түүхэнд ингэж өдөрт гаргасан Мөнгөнцэцэгтээ чин сэтгэлийн талархал илэрхийлье.
Дуурийн урлагт, дэлхийн хэмжээний сонгодог уралдаанд сайн багш, сайн хөгжимчин гэдэг бол амжилтын нөгөө тал нь. Баттөмөрийн Солонго багш сүүлийн хоёр арван үргэлжлүүлэн ДБЭТеатрт дуурийн гоцлоочидтой ажиллаж байгаа дэлхийн дэвжээнд үнэлэгдсэн нэртэй хөгжимчин, дуурийн концертмейстер юм.
Өнөөдөр бол ер бусын өдөр. Монгол түмний хамтын бүтээл 2009 он түүх болж, 2010 оны шинэ түүх хэдхэн цагийн дараа эхлэн бичигдэх торгон агшин. Энэ мөчид ард түмэндээ, хамт олондоо өндөр алдар нэр, их баяр баясал авч ирсэн хоёр гавъяатдаа баяр хүргэж амжилт хүсье.
Сонгодог урлагийн тэнгэр алдартан, гавъяатнуудаар дүүрэн байх болтугай” гэв