Монголын төрийн нэрт зүтгэлтэн, Монгол Улсын Ерөнхий сайд асан Думаагийн Содном наян нас сүүдэр зооглож буйг нь тохиодуулан Монгол Улсын Ерөнхийлөгч Ц.Элбэгдорж мэндчилгээ дэвшүүлэв.
Монголын төр, ард түмний төлөө өөрийн мэдлэг оюун, арвин их туршлагаа харамгүй зориулж ирсэн, монгол түмний бахархан дурсаж хүндэтгэх ёстой эрхэм Ерөнхий сайдуудын нэг Думаагийн Содном юм. Түүний ойд зориулан дэвшүүлсэн мэндчилгээндээ Монгол Улсын Ерөнхийлөгч Ц.Элбэгдорж “Танд наян насны тань өлзий гийсэн энэ сайхан өдөр чин сэтгэлээсээ баярын мэндчилгээ дэвшүүлж байна.
Өнө эртний баялаг түүхтэй Монгол эх орныхоо дорнын их говийн Аргалын уулын Илийн эрдэнэт бууцнаа Та эхийн хэвлийгээс унасан гэдэг. Эр бие өсч, эрдэм номын гэгээн жимээр тууштай замнан эрдэмт хүн болсон төдийгүй төрийн мэргэн түшмэдүүдтэй мөр зэрэгцэн, бас манлайлан ажиллаж байсан билээ. Жарныг өртөөлж, зууныг тэмүүлсэн амьдрал, ажил үйлсээрээ Та монгол төрийн түшээдийн амьд үлгэр дуурайлал юм.
Та төрийн байгууллагад олон жил тасралтгүй ажиллахдаа Ардын Их Хурлын депутатаар найман удаа сонгогдож, Монгол Улсын шинэ Үндсэн хуулийг батлалцсан хийгээд БНМАУ-ын Сангийн яамны сайд, Сайд нарын Зөвлөлийн дарга зэрэг Монголын төрийн хамгийн хариуцлагатай албанд нэгэн үзүүрт сэтгэлээр зүтгэж байсныг бид мэднэ. Монголоо Монголоор нь авч үлдэх, улс эх орноо хөгжил дэвшлийн шинэ шатанд гаргах үйлсэд оруулсан хувь нэмрийг тань Монголын ард түмэн өндөр үнэлж, өдгөө ч таныг эрхэм хүн хэмээн хүндэтгэдэг юм.
Монгол төрийн тулхтай, түшигтэй зүтгэлтэн Танаас хойч үеийнхэн тань сурч, үлгэр авч Монгол Улсынхаа төрийн ариун гал голомтыг хатамжлан сахихын учрыг ухаарч явдгийг хэлэхэд таатай байна.
Монгол түмнийхээ төлөө бүтэн жарныг зориулсан эрхэм Танд өлмий бат оршихын өлзийтэй сайхан ерөөл дэвшүүлж, өндөр хүндэтгэл үзүүлэн, эрүүл энх, аз жаргал, сайн сайхны бэлэгдэл алаг цэцгийн баглаа, найман тахилт алд цэнхэр хадгийг өргөн барья” гэжээ.