Төсөл
МОНГОЛ УЛСЫН ХУУЛЬ
2014 оны ..... сарын ........ -ны өдөр Улаанбаатар хот
ХҮҮХЭД ХАРАХ ҮЙЛЧИЛГЭЭНИЙ ТУХАЙ
НЭГДҮГЭЭР БҮЛЭГ Нийтлэг үндэслэл
1 дүгээр зүйл. Хуулийн зорилт
Энэ хуулийн зорилт нь иргэн, аж ахуйн нэгж, байгууллага 1.6 - 3 хүртэлх насны хүүхдийг эрх бүхий байгууллагаас олгосон зөвшөөрлийг үндэслэн хүүхэд харах үйлчилгээ /цаашид “үйлчилгээ” гэх/ үзүүлэх, энэхүү үйлчилгээ үзүүлэхэд баримтлах үндсэн зарчим, удирдлага, зохион байгуулалт, үйлчилгээнд оролцогчийн эрх, үүрэг, хариуцлагыг тодорхойлж, хүүхэд харах үйлчилгээ эрхлэхтэй холбогдсон нийтлэг харилцааг зохицуулахад оршино.
2 дугаар зүйл. Хүүхэд харах үйлчилгээний тухай хууль тогтоомж
2.1. Хүүхэд харах үйлчилгээний тухай хууль тогтоомж нь Монгол Улсын Үндсэн хууль, Ариун цэврийн тухай, Хүүхдийн эрхийг хамгаалах тухай хууль болон тэдгээртэй нийцүүлэн гаргасан хууль тогтоомжийн бусад актаас бүрдэнэ.
2.2. Олон улсын гэрээнд энэ хуульд зааснаас өөрөөр заасан бол олон улсын гэрээний заалтыг дагаж мөрдөнө.
3 дугаар зүйл. Хуулийн нэр томъёоны тодорхойлолт
3.1. Энэ хуульд хэрэглэсэн дараах нэр томъёог дор дурдсан утгаар ойлгоно.
3.1.1. “Хүүхэд харах үйлчилгээ” гэж 1.6-3 хүртэл насны хүүхдийг асрах, хамгаалах, хөгжүүлэх үйл ажиллагааг;
3.1.2. “Хүүхэд харах үйлчилгээ эрхлэх этгээд” гэж эрх бүхий байгууллагын зөвшөөрлийн үндсэн дээр хүүхэд харах үйлчилгээг эрхэлж буй иргэн, аж ахуйн нэгж, байгууллагыг;
3.1.3. “Хүүхэд харах үйлчилгээний ажилтан” гэж бүрэн дунд буюу түүнээс дээш боловсролтой, бие бялдар, сэтгэцийн хувьд эрүүл, гэмт хэрэгт холбогдож байгаагүй, мэргэжлийн сургалтад хамрагдсан, 18–аас 60 настай, үйлчилгээ эрхлэх этгээдтэй зохих гэрээ байгуулан ажиллаж буй иргэнийг;
3.1.4. “төвд суурилсан хүүхэд харах үйлчилгээ гэж” иргэн, аж ахуйн нэгж байгууллага зохих шаардлагыг хангасан өөрийн өмчлөлийн болон эзэмшлийн байранд 1.6-3 хүртэл насны хүүхдийг асрах, хамгаалах, хөгжүүлэх үйл ажиллагааг;
3.1.5. “аж ахуйн нэгж” гэж Аж ахуйн нэгжийн орлогын албан татварын тухай хуулийн 4 дүгээр зүйлийн 4.1.5 дахь хэсэгт заасан этгээдийг;
4 дүгээр зүйл. Хүүхэд харах үйлчилгээнд баримтлах зарчим
4.1. Бага насны хүүхдийн эрх ашиг, сонирхлыг хамгаална.
4.2. Бага насны хүүхэд бүрт адил, тэгш байдлаар хандана.
4.3. Хүүхэд харах үйлчилгээг эцэг эх, асран хамгаалагчийн хүсэлтэд үндэслэнэ.
ХОЁРДУГААР БҮЛЭГ
Хүүхэд харах үйлчилгээ эрхлэх гэрчилгээ олгох, хүчингүй болгох
5 дугаар зүйл. Үйлчилгээ эрхлэх гэрчилгээ олгох
5.1. Үйлчилгээ эрхлэх гэрчилгээг /цаашид “гэрчилгээ” гэх/ сум, дүүргийн Засаг дарга олгоно.
5.2. Гэрчилгээг үйлчилгээ эрхлэх этгээдийн өргөдөл, холбогдох баримт бичгийг хүлээн авснаас хойш ажлын 5 өдрийн дотор шийдвэрлэнэ.
5.3. Эрх бүхий этгээд гэрчилгээ олгохоос татгалзаж болно.
5.4. Энэ хуулийн 5.3 дахь хэсэгт заасны дагуу татгалзсан тохиолдолд үндэслэл бүхий хариуг үйлчилгээ эрхлэхийг хүссэн этгээдэд бичгээр өгнө.
5.5. Гэрчилгээг бусдад барьцаалах, худалдах, бэлэглэх зэргээр шилжүүлэхийг хориглоно.
6 дугаар зүйл. Гэрчилгээг хүчингүй болгох
6.1. Гэрчилгээг гэрчилгээ олгосон байгууллагын шийдвэрээр дараах үндэслэлээр дахин сэргээх эрхгүйгээр хүчингүй болгоно.
6.1.1. Хүүхэд харах үйлчилгээний нөхцөл, шаардлагыг зөрчсөн
6.1.2. Гэрчилгээг анх авахдаа хуурамч баримт бичиг бүрдүүлсэн нь тогтоогдсон
6.1.3. Үйлчилгээнд хамрагдах бага насны хүүхдийн талаар хуурамч баримт бичиг бүрдүүлсэн, мэдээ тайланг хуурамчаар үйлдэн ирүүлсэн
6.1.4. Үйлчилгээ эрхлэх этгээдийн талаар эцэг, эхийн гомдолд дурдсан зүйл хууль, журам зөрчсөн болох нь эрх бүхий байгууллагын дүгнэлтээр нотлогдсон
6.1.5. Аж ахуйн нэгж, байгууллага татан буугдсан
7 дугаар зүйл. Гэрчилгээ авахад бүрдүүлэх баримт бичиг
7.1. Гэрчилгээ авахад дараах баримт бичиг бүрдүүлнэ.
7.1.1. Үйлчилгээ эрхлэх хүсэлт, өргөдөл
7.1.2. Эцэг эхийн хүсэлт
7.1.3. Хүүхдийн төрсний гэрчилгээний хуулбар
7.1.4. Хүүхэд харах төвийн орчны стандартын шаардлага хангасан тухай баримт
7.1.5. Үйлчилгээний ажилтны дэлгэрэнгүй бүртгэл, халдварт өвчний болон сэтгэцийн эрүүл мэндийн байгууллагын бичиг, цагдаагийн байгууллагын тодорхойлолт, мэргэжлийн сургалтад хамрагдсан тухай бичиг
ГУРАВДУГААР БҮЛЭГ
Хүүхэд харах үйлчилгээний зохион байгуулалт
8 дугаар зүйл. Үйлчилгээний орчны стандарт
8.1. Хүүхэд харах төв нь эрх бүхий байгууллагын баталсан орчны стандартын шаардлагыг хангасан байна.
8.2. Хүүхэд харах төвийн орчны стандартыг нийгмийн хамгааллын болон боловсролын асуудал эрхэлсэн төрийн захиргааны төв байгууллага хамтран боловсруулж, Стандартчилал, тохирлын үнэлгээний тухай хуулийн 6.5 дахь хэсэгт заасны дагуу батлуулж, улсын бүртгэлд бүртгүүлнэ.
9 дүгээр зүйл. Үйлчилгээний санхүүжилт
9.1. Үйлчилгээ нь дараах эх үүсвэрээс санхүүжинэ.
9.1.1. Нэг хүүхдэд төрөөс олгох хувьсах болон хоолны зардал
9.1.2. Эцэг эх, асран хамгаалагчтай харилцан зөвшилцсөний үндсэн дээр тогтоосон үйлчилгээний төлбөр
9.1.3. Иргэн, аж ахуйн нэгж, байгууллагаас сайн дурын үндсэн дээр өгсөн хандив, тусламж
9.2. Үйлчилгээний орлогыг хувь хүний болон аж ахуйн нэгжийн орлогын албан татвараас чөлөөлнө.
10 дугаар зүйл. Үйлчилгээний зохион байгуулалт
10.1. Үйлчилгээг бага насны хүүхдийн аюулгүй байдал, хоол хүнс, эрүүл ахуй, ариун цэврийн зохих шаардлага хангасан орчин бүрдүүлсэн иргэн, аж ахуйн нэгж, байгууллага эрхэлнэ.
10.2. Үйлчилгээг иргэн, аж ахуйн нэгж, байгууллага төвд суурилсан хэлбэрээр зохион байгуулна.
10.3. Төвд суурилсан үйлчилгээний нэг бүлэгт 12-15 хүүхдийг хамруулна.
10.4. Төвд суурилсан үйлчилгээний нэг бүлэгт 2 ажилтан, 1 тогооч ажиллана.
10.5. Үйлчилгээний цагийн хуваарь нь эцэг эхийн ажлын цаг, үйлчлүүлэх хэрэгцээнд нийцсэн, уян хатан байна.
10.6. Үйлчилгээг өдрийн дэглэмийн дагуу зохион байгуулна.
10.7. Үйлчилгээний ажиллах цагийн хуваарийг эцэг эх, асран хамгаалагч, үйлчилгээ эрхлэгч харилцан зөвшилцөж тогтооно.
10.8. Үйлчилгээний ажлын цаг нь өдөрт 12 цагаас илүүгүй байна.
11 дүгээр зүйл. Үйлчилгээнд хориглох үйл ажиллагаа
11.1. Хүүхдийг хараа хяналтгүй орхих
11.2. Хүүхдэд телевизор, компьютер, электрон тоглоом удаан хугацаагаар үзүүлэх, тоглуулах
11.3. Хүүхдэд нойрсуулах болон тайвшруулах эм бэлдмэл хэрэглэх
11.4. Шашны зан үйл, үзэл суртлын үйл ажиллагаа зохион байгуулах
ДӨРӨВДҮГЭЭР БҮЛЭГ
Хүүхэд харах үйлчилгээнд оролцогчийн бүрэн эрх
12 дугаар зүйл. Эцэг эхийн бүрэн эрх
12.1. Хүүхдийн эрхийг хамгаалах тухай хуулийн 12 дугаар зүйлд зааснаас гадна эцэг эх, асран хамгаалагч дараах эрх эдэлж, үүрэг хүлээнэ.
12.1.1. Гэрчилгээ авсан төвийн үйлчилгээг сонгох
12.1.2. Төвийн өдөр тутмын үйл ажиллагаанд болон хоол хүнсний аюулгүй байдалд хяналт тавих
12.1.3. Үйлчилгээтэй холбоотой санал, гомдол гаргах
12.1.4. Харилцан зөвшилцсөн төлбөр төлөх, хүүхдийн ариун цэврийн болон шаардлагатай бусад хэрэглэгдэхүүнээр хангах
12.1.5. Хүүхдийг дархлаажуулалтад хамруулах
12.1.6. Цагийн хуваарийг баримтлах
13 дугаар зүйл. Үйлчилгээ эрхлэх этгээдийн бүрэн эрх
13.1. Хүүхэд харах үйлчилгээний орчны стандартын шаардлагыг хангасан байх
13.2. Үйлчилгээний ажилтныг эрүүл мэндийн шинжилгээ, үзлэгт тогтмол хамруулах
13.3. Хүүхдийн эрүүл мэндэд сөрөг нөлөө үзүүлэх үйл ажиллагаа явуулахгүй байх
13.4. Бусад хууль тогтоомжийг мөрдөн ажиллах
14 дүгээр зүйл. Төрийн захиргааны төв байгууллагын бүрэн эрх
14.1. Хүүхэд харах үйлчилгээ эрхлэх журам, гэрчилгээ, эцэг эх, асран хамгаалагчтай байгуулах гэрээний загварыг нийгмийн хамгааллын болон эрүүл мэндийн асуудал эрхэлсэн Засгийн газрын гишүүн хамтран батална.
14.2. Хүүхэд харах үйлчилгээний ажилтан бэлтгэх сургалтын хөтөлбөрийг боловсролын
асуудал эрхэлсэн төрийн захиргааны төв байгууллага батална.
ТАВДУГААР БҮЛЭГ
Хүүхэд харах үйлчилгээнд тавих хяналт
15 дугаар зүйл. Хүүхэд харах үйлчилгээ нь гэрээт хяналтыг хэрэгжүүлэх эрх бүхий иргэний, сум, хорооны Засаг даргын, иргэний мэдээлэлд суурилсан олон нийтийн хяналт гэсэн байнгын давхар хяналттай байна.
ЗУРГААДУГААР БҮЛЭГ
Хууль тогтоомж зөрчигчид хүлээлгэх хариуцлага
16 дугаар зүйл. Хүүхэд харах үйлчилгээний тухай хууль тогтоомж зөрчигчид дараах хариуцлага хүлээлгэнэ.
16.1. Хүүхэд харах үйлчилгээний тухай хууль тогтоомж зөрчсөн тохиолдолд үйлчилгээ эрхлэх эрхийг дахин сэргээх эрхгүйгээр хүчингүй болгоно.
17 дугаар зүйл. Хууль хүчин төгөлдөр болох
17.1. Энэ хуулийг 2014 оны ... сарын ... –ний өдрөөс дагаж мөрдөнө.
ГАРЫН ҮСЭГ