Монгол Улсын Ерөнхийлөгчийн нэрэмжит 2014 оны тэтгэлгийг хүртсэн шилдэг оюутнууд тодорлоо. Ерөнхийлөгчийн Тамгын газрын дарга П.Цагаан оюутнуудад Ерөнхийлөгчийн нэрэмжит тэтгэлгийг гардуулах ёслол Төрийн ордонд өнөөдөр болов.
Тэтгэлэг гардуулсны дараа Ерөнхийлөгчийн Тамгын газрын дарга П.Цагаан оюутнуудад баяр хүргэж хэлсэн үгэндээ “Монгол Улсын Ерөнхийлөгчийн нэрэмжит 2014 оны тэтгэлгийг олон улсын хэмжээнд эх орныхоо нэрийг дуурсгаж яваа тамирчид хийгээд амжилттай суралцаж байгаа оюутнуудад сурлагын амжилтыг нь чухалчилдаг. Монгол Улсын хөгжлийн зүтгүүр бол боловсролтой монгол хүн юм. Залуучуудад өрсөлдөх чадвартай боловсролыг эзэмшүүлэх, боловсролын тогтолцоог дэлхий нийтийн жишигт хүргэх нь бидний зорилго юм. Үүнийг Монгол Улсын Ерөнхийлөгч онцгой анхаарч байгаа. Боловсрол бол зорих зам төдийгүй хүрэх зам гэдгийг манай залуучууд сайн ойлгож, хичээн зүтгэж байгаад баяртай байна.
Олон Улсын Оюутны Математикийн олимпиадиас гурван жил дараалан хүрэл медаль хүртсэн, МУИС-ийн оюутан Б.Ганбат, Ази тивийн Анагаахын оюутны эрдмийн бүтээлийн илтгэлийн уралдааны тэргүүн байрын шагналт, ЭМШУИС-ийн оюутан Э.Ренчиндорж, Аэробик гимнастикийн дэлхийн аварга шалгаруулах тэмцээний хүрэл, дэлхийн цомын аварга шалгаруулах тэмцээний алтан медальт, ШУТИС-ийн оюутан Э.Галбадрах, Уран зохиол шинжлэлийн өгүүллээрээ "Тайлахуйн чинад" ном бичсэн МУИС-ийн Х.Чойдогжамц нарын тэргүүтэй нийт 18 шилдэг оюутанд Монгол Улсын Ерөнхийлөгч нэрэмжит тэтгэлгээ хүртээлээ.
Бид та бүхэнд итгэж байна. Монгол Улсын Ерөнхийлөгчийн нэрэмжит тэтгэлэг бол Та бүхний зорьж тэмүүлж яваа бүхэнд урам хайрласан шагнал юм. Монголын мянга мянган оуютан залууст та нар шиг амжилт гаргахыг уриалж байна.
Та бүхний цаашдын ажил хөдөлмөрт өндөр амжилт, хамгийн сайн сайхан бүхнийг хүсэн ерөөе. Та бүхнийг өдий зэрэгт хүргэхэд тусалж дэмжсэн гэр бүл, анги хамт олон, найз нөхдөд тань талархал дэвшүүлье. Сайн үйлс дэлгэрэх болтугай” хэмээв.
МУИС-ийн ФЭС-ийн Физик электроникийн 4 ангийн оюутан Баясгалангийн Мягмарзул, МУИС-ийн ГХСС-ийн Франц хэл судлалын 3 ангийн оюутан Цэгмидийн Бадамханд, МУИС-ийн МХСС-ийн Эх бичиг судлалын 3 ангийн оюутан Төмөрбаатарын Түмэндэмбэрэл, ХААИС-ийн БУС-ийн Байгал аялал жуулчлалын 4 ангийн оюутан Будын Оюунтуяа, ШУТИС-ийн МИС-ийн Нисэх техник, механикийн 4 ангийн оюутан Ганбаатарын Буян-Өлзий, ИЗИС-ийн Гааль татварын эдийн засагчийн 249-р бүлгийн оюутан Батболдын Энхтамир, МУИС-ийн ОУХС-ийн ОУХарилцааны 4 ангийн оюутан Батмөнхийн Дөлгөөн, НУДС-ийн Түүх нийгэм судлалын 4 ангийн оюутан Бямба-Очирын Гармаабазар, Шинэ АУ ДС-ийн Уламжлалт АУ-ны 5 ангийн оюутан Түмэнжаргалын Ариунболд, Ховд ИС-ийн Багш, биеийн тамирын 3 ангийн оюутан Цогтбаярын Адъяасүрэн, ШУТИС-ийн КТМС-ийн Программ хангамжийн 4 ангийн оюутан Сэрээхүүгийн Ууганбаяр, СУИС-ийн ХУС-ийн Хөөмийн 4 ангийн оюутан Дамдинсүрэнгийн Басан, МУИС-ийн НШУС-ийн Нийгмийн ажилтны 4 ангийн оюутан Мягмарын Энхбадрал, СУИС-ийн БУС-ийн Бүжгийн багш, найруулагчийн 3 ангийн оюутан Батболдын Энхтөр нарт Монгол Улсын Ерөнхийлөгчийн нэрэмжит 2014 оны тэтгэлгийг олгосон юм.