Өв соёлоо эрхэмлэн дээдэлдэг дэлхийн ихэнх улс орнуудад Ерөнхийлөгчдийн нэрэмжит номын сантай байдаг. Тухайлбал АНУ-д үе үеийн ерөнхийлөгчдийн нэрэмжит номын сан үйл ажиллагаагаа явуулж түүхэн үнэ цэнэ бүхий үүрэг гүйцэтгэж байдаг.
Өнөөдөр Үндэсний төв номын сангийн тэргүүн, доктор Г.Аким Ерөнхийлөгчид бараалхан “Ерөнхийлөгчийн нэрэмжит номын сан” байгуулах, мөн номын сангийн тухай хуультай болох талаар санал солилцлоо. Тэрээр, Монгол Улс Ерөнхийлөгчийн номын сантай болох хэрэгтэй. Хэн нэгэн Ерөнхийлөгчийн нэрэмжит бус, Монголын бүх хаадаас эхлэн төрийн хэргийг удирдаж байсан Монголын бүх үеийн удирдагчдын намтар цадиг бүхий номын сан байгуулах нь түүхэн чухал үнэ цэнэтэй юм хэмээн онцлов.
Уулзалтын төгсгөлд Ерөнхийлөгч, доктор Г.Аким гуайн саналыг дэмжиж буйгаа илэрхийлж энэ чиглэлээр дорвитой ажил зохион байгуулах нь зүйтэй гэв.
