Монгол Улсын Ерөнхийлөгч зарлиг гарган Хууль сахиулахын их сургуулийг “Цэргийн гавьяаны улаан тугийн одон”-гоор шагналаа. Уг зарлигт “Тус сургуулийн түүхт 80 жилийг ойг тохиолдуулан Монгол Улсын батлан хамгаалах салбарын бие бүрэлдэхүүнийг бэлтгэхэд мэдлэг чадвар, хүч хөдөлмөр, авъяас билгээ зориулсан тус сургуулийн үе үеийн багш, ажилтан, ажилчдын хичээл зүтгэл, төгсөгчдийн амжилт, сургалтын үр дүнг өндрөөр үнэлж Хууль Сахиулахын Их Сургуулийг “Цэргийн гавьяаны улаан тугийн одон”-гоор шагнасугай” гэжээ.
Монгол Улсын Ерөнхийлөгчийн Тамгын газрын дарга П.Цагаан одонг их сургуулийн туганд хүндэтгэлтэйгээр зүүн өгч баярын арга хэмжээнд оролцогчдод баяр хүргэж үг хэлэв. Тэрээр хэлсэн үгэндээ:
“Эрхэм хүндэт генерал, комиссар, офицер, ахлагч, сонсогчид оо,
Үе үеийн ахмадууд аа,
Хатагтай, ноёд оо!
Монгол Улсын тусгаар тогтнол, аюулгүй байдал, ард иргэдийнхээ энх амгалангийн манаанд бат зогссон мэргэжлийн өндөр боловсрол, мэдлэг, ур чадвартай хууль сахиулах, аюулгүй байдлыг хангах албаны үе үеийн шилмэл бүрэлдэхүүнийг он удаан жил бэлтгэж ирсэн гавъяаг нь үнэлж, үүсэн байгуулагдсаных нь 80 жилийн ойг тохиолдуулан Хууль сахиулахын их сургууль, түүний эрдмийн хамт олныг Монгол Улсын Ерөнхийлөгчийн зарлигаар “Цэргийн гавъяаны улаан тугийн одон”-гоор шагнаж байна.
Энэ түүхэн үйл явдлыг тохиолдуулан эрхэм профессор багш, эрдэмтэн судлаач, алба хаагч, сонсогч, суралцагч, ахмад ажилтнууд, нийт төгсөгчид Та бүхэнд Монгол Улсын Ерөнхийлөгчийн нэрийн өмнөөс болон хувиасаа чин сэтгэлийн халуун баяр хүргэж эрүүл энх, аз жаргал, хамгийн сайн сайхан бүхнийг хүсэн ерөөе.
Төрийн өндөр дээд энэ шагнал нь “Төв сургууль”-иас эхтэй Хууль сахиулахын их сургуулийн домог түүх, түүнийг бүтээлцсэн эрхэм ахмадууд, үе үеийн төгсөгчдийн алдар гавъяаг үнэлж буйн тодоос тод илэрхийлэл юм.
Эх орныхоо төлөө халуун амь, бүлээн цусаа үл хайрлан тэмцэж, баатарлаг гавъяа байгуулсан олон зуун эрэлхэг хилчин, ард түмнийхээ энх амгалангийн манаанд өргөсөн тангарагтаа үнэнч зогссон мянга мянган хууль сахиулагчид эрдмийн их уурхай энэ л сургуулийн танхимаас төрсөн гарсаныг түүх гэрчилнэ.
Өнөөдөр Монгол Улсад хүнд, онц хүнд гэмт хэргийн гаралт тогтвортой өсч, үндэстэн дамнасан зохион байгуулалттай гэмт хэрэг өсөх хандлагатай, шинэ төрлийн гэмт хэрэг олноор үйлдэгдэх болсоны сацуу нууц. далд үйлдэлтэй гэмт хэргийн илрүүлэлт төдийлөн сайнгүй байгаагаас үүдэн эрүүгийн болон хзв журмын нөхцөл байдал тайван бус байна.
Түүнчлэн даяаршлын эрчимтэй үйл явцаас улбаалан хилийн цагийн байдал хялбар хувьсан өөрчлөгдөх болсон, бүс нутагт байгалийн болон бусад гамшиг, ослын гаралт, давтамж нэмэгдсэнээс гамшгийн эрсдэл буурахгүй байгаа, хууль сахиулах шинэ салбар, үйлчилгээ бий болж, шүүхийн шийдвэр гүйцэтгэлийн хамрах хүрээ өргөжиж, шүүх шинжилгээний эрэлт хэрэгцээ өсөн нэмэгдэж байна.
Үүнтэй холбоотойгоор Хууль сахиулахын их сургуулийн нийт бие бүрэлдэхүүн, эрдмийн хамт олны гүйцэтгэх үүрэг, хариуцлага улам өндөрсөж байна.
Түүхт ойн баяраа тэмдэглэж байгаа профессор багш, эрдэмтэн судлаач, алба хаагч, сонсогч, суралцагч, нийт төгсөгчид, үе үеийн ахмадууд, ахмад ажилтнууд Та бүхэнд дахин баяр хүргэж амжилт хүсэхийн ялдамд хос одонт их сургуулийнхаа нэрийг үргэлж өндөрт өргөж явахын өлзийтэй ерөөлийг өргөн дэвшүүлье” гэлээ.
Мэдээний дүрсийг энд дарж үзнэ үү