Монгол Улсын Ерөнхийлөгчийн Тамгын газрын дарга Д.Дорлигжав, Хуулийн бодлогын зөвлөх Г.Ганзориг, Ерөнхийлөгчийн Хуулийн бодлогын орон тооны бус зөвлөх, гавьяат хуульч Б.Чимэд нар Улсын Дээд шүүх, Нийслэл, Дүүрэг, Нийслэлийн захиргааны хэргийн шүүхийн зарим шүүгчтэй уулзлаа.
Уулзалтаар шүүх эрх мэдлийн шинэтгэлийг гүнзгийрүүлэх тухай хэлэлцсэн бөгөөд шүүх засаглалд тулгамдаж буй асуудлуудыг хөндөх, шийдвэрлэх арга замыг тодорхойлох зорилготой байв. Шүүгчдийг төлөөлж УДЭХТ-ын тэргүүн Д.Батсайхан эхлээд саналаа хэлсэн юм. Тэрбээр улсын хэмжээнд давж заалдах захиргааны хэргийн шүүх байгуулах шаардлагатай байгаа, нэг шүүгчид олон хэрэг ногддог, ажлын ачааллаас болж хэргийг хуулийн хугацаанд шийдэж амжихгүй тохиолдол олон гардаг учир жижиг хэргийн шүүх байгуулах нь шүүхийн байгууллагын ажлыг хөнгөвчлөх ач холбогдолтой талаар жишээгээр тайлбарлалаа. Мөн шинээр шүүгч болж байгаа хүмүүсийн нийгмийн асуудлыг төрөөс анхаарч салбарын төсвийг нэмэх, олон жил ажилласан шүүгчдэд байр олгохыг хүсэв.
УДШ-ийн шүүгч Б.Доржготов хэлэхдээ Дээд шүүх бүх шүүхийн хэргийг хянадаг тогтолцоог өөрчлөх цаг болсныг сануулав. Бусад орны практикаас харахад Дээд шүүх нь бүх хэргийг хянаад байдаггүй бөгөөд манайд ийм тогтолцоо үйлчилснээр шат шатны шүүх болон давж заалдах шатны шүүхээр явсан хэрэг хэрхэн удааширч, эцсийн шийдвэр гарахдаа хугацаа алддаг талаар тайлбарлаж, Эрүүгийн байцаан шийтгэх хуульд өөрчлөлт оруулах хэрэгтэйг уламжиллаа.
Нийслэлийн Захиргааны хэргийн шүүхийн Ерөнхий шүүгч Д.Дамдиндорж захиргааны хэргийн шүүхийн ажлын ачаалал жил бүр 30-50 хувиар нэмэгдэж байгаа гэсэн баримт хэллээ. Уг шүүхээр улсын хэмжээний нийт хэргийн 50 гаруй хувийг шийдэж байгаа бөгөөд нийслэлд л гэхэд ердөө наймхан шүүгч ажиллаж байгааг анхаарах хэрэгтэй хэмээв. Мөн шүүгчдийг сэлгэн ажиллуулах, томилохдоо анхаарч, аль болох зардал чирэгдэл багатай зохион байгуулдаг болох талаар саналаа хэллээ.
Энэ мэтээр мэргэжлийн хүмүүс салбартаа тулгамдаж байгаа бэрхшээл болон шүүхийн шинэтгэлтэй холбоотой зайлшгүй шийдэх асуудлаар санал бодлоо холбогдох хүмүүсээр дамжуулан Төрийн тэргүүний сонорт хүргэсэн юм.
ЕТГ-ын дарга Д.Дорлигжав эдгээр санал хүсэлт, мэргэжлийн хүмүүсийн үгийг дараа дараачийн ажил хэрэгтээ нэвтрүүлж, боловсруулж буй хуулийн төсөлдөө тусгана гэсэн бөгөөд энэ сэдэв цаашид ч Төрийн тэргүүний анхаарлын төвд байсаар байх болно хэмээн онцоллоо.