Эрхэмсэг ноён Ерөнхийлөгч өө,
Эрхэм хүндэт УИХ-ын гишүүд ээ,
Эрхэм хүндэт хатагтай, ноёд оо,
Эрхэм хүндэт Засгийн Газрын гишүүд ээ,
Өнөөдрөөс яг 20 жилийн өмнө Монгол Улсад ардчилсан энхийн хувьсгал эхэлсэн билээ. Энэхүү ардчилсан хөдөлгөөнийг эрхэмсэг ноён Ерөнхийлөгч Та өөрийн биеэр удирдаж байсан.
Өнөөдөр Монгол Улсад ардчилсан эрх зүйт төрийн тогтолцоо баттайгаар бий болж чадлаа. Шилжилтийн үе шатандаа явж буй олон орнуудтай харьцуулбал Монгол Улс өнгөрсөн 20 жилийн хугацаанд үнэлэхүйц амжилтуудад хүрч чадсан.
Ардчилсан сонгууль, хүний эрхийг хүндэтгэх, хувийн өмчийг хамгаалах, үзэл бодол, шашин шүтлэгээ чөлөөтэй илэрхийлэх явдал болон, олон намын тогтолцоог бодит байдал болгосон нь Монголын ардчилсан нийгмийн томоохон ололтуудын цөөхөн хэдэн жишээ юм.
Эрхэмсэг Ноён Ерөнхийлөгч Та Монголд ардчилсан хөдөлгөөн өрнөсний 20 жилийн ойн УИХ-ын хүндэтгэлийн чуулган дээр хэлсэн үгэндээ Монгол Улсын ардчилсан хөгжил Монгол орны өнцөг булан бүрт хүрч очих шаардлагатай байгааг дурдаж байсан.
Ардчилсан сэтгэлгээ иргэд болон төрийн албан хаагчдын сэтгэл зүйд нэгэн зэрэг тогтсон байх шаардлага бий болж байна. Мөн улс төрийн шийдвэр гаргахад олон нийтийн оролцоо ч үгүйлэгдэж байна хэмээн Та хэлж байсан.
Өнөөдөр Иргэний танхимыг нээж байгаа энэ үйл явдал нь ардчилалын үйл хэрэгт иргэдийн оролцоо бат бөх сууж өгөх юм байна гэдийг илэрхийлж байгаа хэрэг хэмээн ойлгож байна.
Энэхүү Иргэний танхим нь иргэдэд улс төрийн шийдвэр гаргахад, хууль тогтооход өөрсдийн дуу хоолойгоо хэлэх, мөн улс төрийн аливаа шийдвэр гаргахад өөрсдийн үзэл бодлоо илэрхийлэх боломжийг нээж байна гэж бодож байна.
Олон нийтийн нээлттэй хэлэлцүүлэг нь хууль тогтоох үйл явцын салшгүй хэсэг болохыг ардчилсан нийгмийг хөгжүүлсэн олон орнууд харуулсан.
ХБНГУ Монгол оронд ардчилсан хөдөлгөөн өрнөсөнөөс эхлэн танай ардчилсан өөрчлөлтийг тууштай дэмжсээр ирсэн билээ. Энэхүү дэмжлэг нь ялангуяа хууль тогтоох үйл хэрэгт Ханс Зайделын сан болон Германы Техникийн Хамтын Ажиллагааны Нийгэмлэгээс хэрэгжүүлж байгаа эрх зүйн зөвлөлгөө өгөх төслүүдээр дамжин хэрэгжиж байна. Тэдгээр төслүүдээр дамжин хууль тогтооход иргэдийг болон нийгмийн бүлгүүдийг оролцуулах, мөн улс төрийн шийдвэр гаргахад олон нийтийн санал, үзэл бодлыг тусгах явдлыг бид дэмжсээр ирсэн. Тийм ч учраас энэхүү “Иргэний танхим”-ыг нээхэд ХБНГУ санхүүгийн дэмжлэг үзүүлсэн юм.
Эрхэмсэг ноён Ерөнхийлөгч таны санаачлагаар энэхүү “Иргэний танхим”-ыг үүсгэн байгуулж байгаа явдалд чин сэтгэлийн баяр хүргье.
Энэ завшааныг ашиглан “Иргэний танхим”-ыг нээхэд эрх зүйн орчин бүрдүүлэх, утга агуулгыг оновчтой болгох, мөн материаллаг баазыг бий болгоход оролцсон бүх хувь хүмүүс болон байгуулагуудад баяр хүргэе. Энэхүү ”Иргэний танхим”-аар дамжуулан сонирхолтой нээлттэй олон хэлэцүүлэг өрнүүлэн, түүнийг Монголын ардчилсан хөгжлийн салшүй эд эс болгож хөгжүүлэхийг хүсэн ерөөж байна.
Анхаарал тавьсанд баярлалаа.