“PriceWaterhausCoopers” компанийн Ерөнхийлөгч ноён М.Нелли, Зүүн Европын асуудал хариуцсан захирал ноён М.Кубена нар Монгол Улсын Ерөнхийлөгч Ц.Элбэгдоржид бараалхлаа.
“PriceWaterhausCoopers” нь олон арван жилийн түүхтэй, 152 оронд үйл ажиллагаагаа явуулдаг, 174мянга орчим ажиллагсадтай, олон улсад нэр хүндтэй аудитын компани бөгөөд, өнөөдөр чансаагаараа дэлхийд 4-рт бичигдэж байна. Тус компани нь Оюутолгойн хөрөнгө оруулалтын гэрээнд аудит хийх Засгийн газрын захиалгын дагуу ажиллахаар Улаанбаатар хотод салбараа нээж байгаа билээ. Аудит хийхээс гадна, татвар болон макро эдийн засгийн асуудлуудаар Монгол улсын Засгийн газарт зөвлөгөө өгөхөөр ажиллах гэж байгаагаа ноён М.Нелли Ерөнхийлөгчид танилцууллаа.
“Эдийн засгийн хөгжлийн асуудлаар засгийн газруудад зөвлөгөө өгөх нь манай компанийн олон жил хийж ирсэн ажил. Тухайлбал, ОХУ-ын засгийн газарт экспортын хараат байдлаас ангижрах талаар зөвлөгөө өгч байсан нь амжилттай хэрэгжсэн. Бид сүүлийн жилүүдэд дэлхийн хамгийн том 200 компанийн дунд хөрөнгө оруулалтын судалгаа хийж, санал асуулга явуулсны дүнд хөрөнгө оруулалтыг нэмэгдүүлж, эдийн засгийн өсөлтийг хангахад хамгийн гол нь тогтвортой байдал юм гэдэг дүгнэлтийг хийсэн” хэмээн “PriceWaterhausCoopers” компанийн Ерөнхийлөгч ноён М. Нелли ярилаа.