Давос хотноо Дэлхийн эдийн засгийн чуулга уулзалтанд оролцож байгаа МУ-ын Ерөнхийлөгч Ц.Элбэгдорж, хуралдаанд оролцож, үг хэлж, салбар хуралдааныг даргалах зэргээр үндсэн ажиллагаанд оролцохоос гадна, хоёр талын уулзалтуудад идэвхтэй оролцож байна.
Тухайлбал, энэ өдөр, (1-р сарын 29) Ерөнхийлөгч Ц. Элбэгдоржид, Канадын олон улсын худалдааны сайд ноён Питер ван Лон бараалхсан.
Худалдааны сайдын албан тушаалд томилогдоод 10 гаруйхан хонож буй тэрээр ажлынхаа эхэнд Монгол Улсын Ерөнхийлөгтэй уулзаж байгаадаа баяртай байгаагаа илэрхийлж, хоёр орны гадаад худалдааны асуудлаар өөрийн саналаа ярилаа.
Ерөнхийлөгч Ц.Элбэгдорж, “Канад бол манай томоохон хөрөнгө оруулагчдын нэг. Манай хоёр орон, байгаль цаг уурын хувьд ижил төстэйгээс гадна, геополитикийн хувьд ч том зах зээл, их гүрнүүдтэй хөрш зэргэлдээ байрладаг гээд төстэй зүйл бий. Тиймээс хамтран ажиллах боломж их байгаа.
Ялангуяа, уул уурхай, газар тариалан, хөдөө аж ахуй, дэд бүтцийн салбаруудад хамтын ажиллагааг өргөжүүлж, хөрөнгө оруулалтыг нэмэгдүүлэх хэрэгтэй” гэлээ.
Хөрөнгө оруулалтыг дэмжих, хамгаалах хэлэлцээрийг ойрын үед эцэслэн байгуулах нь зүйтэй гэдэг дээр 2 тал санал нэгдсэн.
Мөн энэ өдөр, Дэлхийн эдийн засгийн удирдагчдын албан бус цугларалтанд оролцлоо.
Төр засгийн тэргүүнүүд цугларч, тодорхой нэг сэдвээр санал солилцдог энэхүү арга хэмжээ нь Давосын Дэлхийн эдийн засгийн чуулга уулзалтын гол арга хэмжээнүүдийн нэг бөгөөд, энэхүү арга хэмжээнд 40 орчим орны төр засгийн тэргүүнүүд оролцсон юм.
1-р сарын 29-30-ны өдрүүдэд нийт 3 удаа хийхээр төлөвлөсөн албан бус цугларалтын эхний удаагийн уулзалтын сэдэв “Олон улсын харилцааны тогтолцоог шинэчлэх” тухай байлаа.
Дэлхийн удирдлагчид энэ сэдвээр ямар байр суурьтай байгааг олон улсын хэвлэл мэдээллийн агентлагууд, ажиглагчид анхааралтай харж, бүх томоохон мэдээллийн сувгууд энэ тухай мэдээг дамжуулж, тоймлож байлаа.
Энэ үеэр Монгол Улсын Ерөнхийлөгч Ц.Элбэгдорж, Франц улсын гадаад хэргийн сайд Б.Кушнер, Мексикийн Ерөнхийлөгч Калдерон, Бразилийн Ерөнхийлөгч Лула да Силва, БНСУ-ын Ерөнхийлөгч Ли Мен Бак, ОХУ-ын Ерөнхий сайдын орлогч бөгөөд Сангийн сайд В.Кудрин нартай уулзаж санал бодлоо солилцлоо.