ҮНДЭСНИЙ ЗӨВЛӨХҮҮДИЙН ХОЛБООНЫ НЭЭЛТИЙН АЖИЛЛАГААНД ХЭЛСЭН ҮГ
Та бүхний энэ өдрийн амгаланг эрье.
Холбооныхоо нээлтийн арга хэмжээнд урьж, үг хэлэх бололцоо олгосон хурлыг зохион байгуулагчид болон хуран цагласан та бүхэнд талархалаа илэрхийлье.
Өнөөдөр Монгол Улсын газрын хэвлийд нийтдээ 1.4 их наяд америк доллараар хэмжигдэхүйц ордууд эдийн засгийн эргэлтэнд ороход бэлэн байгааг та бүхэн мэдэж буй билээ. Дэлхийн дэвжээнд томд орох хоёр их зах зээлийн дунд орших газарзүйн давуу талаа ашиглан уул уурхайн салбарт гадаад хөрөнгө оруулалтыг дэмжих алхамуудыг төрөөс шат дараатай авч хэрэгжүүлж байна.
Дотоодын нийт бүтээгдэхүүн нь ердөө 4 орчим тэрбум америк доллартай тэнцэх манай улсад ойрын жилүүдэд дор хаяж 20 орчим тэрбум америк долларын хөрөнгө оруулалт урсан орох боломжтой гэсэн тооцоог судлаачид хийсэн байдаг.
Манай эдийн засгийг хэд дахин өсгөх том ордууд ашиглалтанд орно гэдэг нь гэхдээ шууд утгаар хөгжил гэж ойлгож болохгүй нь тодорхой. Монголчууд бид энэ их боломжоо хэрхэн зөв ашиглаж, ард түмнээ чинээлэг хангалуун амьдралд хэрхэн хүргэх вэ гэдэг нь бидний өөрсдийн аж ахуйч ухаан, бүтээлч сэтгэлгээ, оновчтой шийдлээс шалтгаалах билээ.
Монголчууд бид эртнээс нааш “дээд баян эрдэм ном” хэмээн шүтсээр ирсэн уламжлалтай. Энэ уламжлалыг өнөө цагын дэвшилтэт технологи, удирдахуйн ухааны орчин үеийн арга барилтай хослуулах нь энд хуран цугласан та бүхний нэгэн эрхэм үүрэг гэж би хувьдаа ойлгож байна.
Аливаа хөрөнгө оруулалтын дотроос хүмүүнд, боловсролд оруулсан хөрөнгө оруулалт хамгийн өгөөжтэй байдгийг өнөөдрийн дэлхийн хөгжлийг тодорхойлж буй АНУ, Япон, Герман, Хятад, Энэтхэг, Солонгос гэх зэрэг улсуудын жишээ бэлхнээ харуулж байна.
Харамсалтай нь манай улсын боловсролын тогтолцоо зах зээлийн нийгмийн хөдөлмөрийн зах зээлийн эрэлтийг чанартай хангахуйц хэмжээнд хүрч хөгжиж чадаагүй байна. Боловсролын тогтолцооны бүтээгдэхүүн болон өнөөгийн бодит хэрэгцээ шаардлагын шаардлагын дунд үүсч буй энэ цоорхой нь өрсөлдөх чадвараар дулимаг ААН-үүд, маркетинг болон эрсдлийн удирдлагаа оновчтой зохион байгуулж чаддаггүй бизнес эрхлэгч нараар илэрч байна гэж хэлэх үндэстэй.
Монгол Улсад зөвлөх үйлчилгээний салбарын хөгжлийг түргэтгэхэд төрийн цэгцтэй бодлого, төрийн бус байгууллагуудын идэвхитэй оролцоо, зөвлөх үйлчилгээний компаниудын ур чадвар чухал ач холбогдолтой билээ.
Зөвлөх үйлчилгээ нь аливаа улс орны хувьд анхаарч ажиллах ёстой салбар юм. Гадаадын өндөр хөгжилтэй улс орнууд зөвлөх үйлчилгээг экспортолж байдаг бол ядуу буурай орнууд зөвлөх үйлчилгээг импортлох замаар хөгжлийн гарцаа тодорхойлж байна.
Монгол улсад зөвлөх үйлчилгээний салбар шинэ тутам хөгжиж буй буюу эхлэлийн шатанд байна гэж хэлж болохоор байна. Өмнөх арван жилийн хугацаанд зөвлөх үйлчилгээ дагнан үзүүлдэг мэргэжлийн байгууллагууд бий болж байгаа боловч эрхзүйн орчин тодорхойгүй, зах зээлийн хүрээ хязгаарлагдмал, үндэсний хэмжээнд зөвлөхүүдийн чадавхи сул зэрэг дутагдлууд оршсоор байгаа юм.
Өнөөдрийг хүртэл зөвлөх үйлчилгээний голлох захиалагчид нь олон улсын байгууллагуудын төсөл, хөтөлбөрүүд байсан гэвэл хэтрүүлэг болохгүй болов уу.
Цаашид зөвлөх үйлчилгээний салбарыг хөгжүүлэхэд гадаад дотоодын хамтын ажиллагаа, зөвлөхүүдийг чадавхижуулахад чиглэгдсэн системтэй хөтөлбөрүүд, эрх зүйн орчныг боловсронгуй болгох, зах зээлийн хэмжээг нэмэгдүүлэх зэрэг олон ажлыг хийх шаардлагатай байна. Зөвлөх үйлчилгээний салбарт тулгамдаж байгаа олон асуудлыг шийдвэрлэж, хөгжлийн гарцыг тодорхойлоход өнөөдөр үүсгэн байгуулагдаж буй Үндэсний зөвлөхүүдийн холбооны үүрэг их бий гэдгийг энд онцлон тэмдэглэж байна.
Энэхүү шинэ төрийн бус байгууллага нь зөвлөх үйлчилгээний салбарыг хөгжлийн шинэ шатанд гаргана гэдэгт итгэлтэй байна.
Та бүхэнд амжилт хүсье.
ЕРӨНХИЙЛӨГЧИЙН ХӨГЖЛИЙН ЭДИЙН ЗАСАГ, ХӨДӨЛМӨР ЭРХЛЭЛТИЙН БОДЛОГЫН ЗӨВЛӨХ Ч.ОТГОЧУЛУУ