Орон нутагт томилолтоор ажиллаж байгаа Монгол Улсын Ерөнхийлөгч Ц.Элбэгдорж 2-р сарын 27-ны өдөр Баянхонгор аймагт бууж, аймгийн удирдлагуудтай уулзан, цаг үеийн нөхцөл байдлын талаар мэдээлэл сонслоо.
Байдал хүнд байгаа гэдгийг орон нутгийн удирдлага хэлж байна. Өнгөрсөн зун нутгийн 71% нь гантай, 28% нь гандуу байжээ. Хэдийгээр өвөлд эртнээс бэлдэж, малчдыг өөр аймгуудын нутаг руу оторлуулах талаар анхаарсан боловч өвөлжилт хүндхэн өнгөрч байна, одоогийн байдлаар 120 гаруй мянган мал алдаад байна гэж тус аймгийн ИТХ-ын дарга н.Батжаргал ярилаа. Газрын гарц муу байсан, өвс жаахан ургасан бэлчээрт нь бусад аймгуудын мал олноор орж ирж туурайн зуд болох магадлал байгаа тухай малчид ярих болжээ.
Тэжээлийн хэрэгцээ улам бүр ихэсч байгаа юм байна. Хэдийгээр “Мал хамгаалах данс”-нд аж ахуйн нэгжүүд болон хувь хүмүүсийн хандиваар 23 орчим сая төгрөг цуглараад байгаа ч, өвс тэжээлийн олдоц ховор, өндөр үнэтэй байсаар байна. Аймгийн удирдлага Сэлэнгэ аймгаас нэг боодол өвсийг 8 мянган төгрөгөөр аваад малчдад 5 мянган төгрөгөөр олгож, зөрүүг нь “Мал хамгаалах данс”-наас төлөхөөр болжээ. Тавдугаар сар хүртэл байдал хүнд хэвээрээ байх бололтой гэж орон нутгийн удирдлага Ерөнхийлөгчид ярилаа.
Гэвч сайн мэдээ бас байгаа. Өнгөрсөн жил жижиг дунд үйлдвэрийг дэмжих хөтөлбөрийн хүрээнд Баянхонгор аймгийн иргэд, хувиараа бизнес эрхлэгчид 730 сая төгрөгийн зээл авчээ. “Энэ зээл үр ашгаа өгч эхэлсэн. Нутгийн брэнд бүтээгдэхүүнүүдийг үйлдвэрлэх явдал сэргэж эхэлж байна. Тухайлбал, Баянлиг суманд ингэний сүүний үйлдвэр, Эрдэнэцогт суманд сарлагийн хөөвөр боловсруулах үйлдвэр ашиглалтанд орсон. Шинээр үйлдвэрлэл эрхлээд зогсохгүй, хөрөнгө санхүүггийн улмаас сөхрөхөд хүрээд байсан олон аж ахуйн нэгж сэргэж байгаа нь энэ бодлогын нэг сайн үр ашиг болж байна. Байнгын ажлын байр нэмэгдэж байна” гэж Баянхонгор аймгийн ЗДТГ-ын дарга н.Гомбодорж танилцууллаа.
Ерөнхийлөгч, улсын комиссоос олгож байгаа өвс тэжээлийг малчдад хүргүүлэх ажлыг хяналт сайтай, сайн зохион байгуулахыг үүрэг болголоо. 5-р сар хүртэл өвс тэжээлээр тасалдуулахгүй байх ажлыг зохион байгуулахад дэмжлэг үзүүлэхийг хамт яваа Сангийн дэд сайд Т.Очирхүү, ХХААХҮ-ийн дэд сайд Х.Золжаргал нарт анхааруулав. Энэ жил олгох жижиг дунд үйлдвэрийг дэмжих зээлд аймгийн иргэдийг идэвхтэй, зохион байгуулалттай хамруулахыг аймгийн удирдлагад захив. Мөн жижиг дунд үйлдвэрлэлийг дэмжих бодлогын хүрээнд тэжээлийн үйлдвэрийг сэргээж ашиглалтанд оруулах боломжийн талаар хөндөж ярилцлаа.
Ерөнхийлөгч Ц.Элбэгдорж Баянхонгор аймгийн удирдлагатай уулзаж нөхцөл байдалтай танилцсаны дараа Завхан аймгийн Отгон суманд ажиллахаар мордов.