Женев хотноо болсон “Цаазаар авах ялын эсрэг дэлхийн дөрөвдүгээр чуулган”-нд оролцсон Монголын төлөөлөгчдийн багийн тэргүүн, УИХ-ын гишүүн Э.Бат-Үүл чуулганы хаалтын ажиллагаанд үг хэлж Монгол Улсын Ерөнхийлөгчийн мэндчилгээг дэвшүүллээ.
УИХ-ын гишүүн Э.Бат-Үүл НҮБ-ын Хүний эрхийн дээд коммиссар хатагтай Наванетем Пиллэйн хамт. Тэрээр Монгол Улсад цаазаар авах ялын гүйцэтгэлд хориг тавьсан асуудлыг тууштай дэмжиж мэндчилгээ ирүүлсэн юм.
Щвейцарийн Холбооны Консул, Гадаад харилцааны сайд хатагтай Мишелин Калми Рэйн хамт.
Цаазаар авар ялын эсрэг Дэлхийн 4 дүгээр чуулганы зохион байгуулагч “Цаазаар авах ялын эсрэг хамтдаа” Францын ТББ-ын Ерөнхий захирал ноён Рафаел Ченүйл-Хазаны хамт.
Монгол Улсын Ерөнхийлөгч мэндчилгээндээ, “Цаазаар авах ялыг халах үйл явцыг төр нь санаачилж, төр нь ухуулж, төр нь үлгэр жишээ үзүүлж, төр нь хөтөлж шийддэг асуудал. Тийнхүү Монголын төр цаазаар авах ялыг бүрмөсөн халахын төлөө итгэл үнэмшилтэй, тууштай ажиллахад Та бүхний бидэнд үзүүлж буй үзэл санааны дэмжлэг хамгийн хүчтэй дэмжлэг болж байна” хэмээн онцолсон юм.
Мөн цаазаар авах ялыг 2015 он гэхэд дэлхий нийтээр хориглох асуудлыг хэрэгжүүлэх олон улсын комисс байгуулах санаачилгыг дэвшүүлж байгааг Европын Холбоог тэргүүлж буй Испанийн Ерөнхий сайд Х.Л.Запатеро Чуулганы үеэр мэдэгдэв.
Хорин жилийн өмнө зөвхөн 50 улс цаазаар авах ялыг хориглож байсан бол өнөөдөр 140 гаруй улсад хориглосон буюу ялыг гүйцэтгэхгүй байгааг Х.Л.Запатеро тэмдэглээд, цаазаар авах ялыг бүх нийтээр хориглох талаар Европын орнууд тууштай арга хэмжээ авах, тухайлбал Итали улс шинэ тогтоолын төсөл боловсруулан энэ онд багтаан НҮБ-ын Ерөнхий Ассамблейд өргөн барихаар төлөвлөж байгааг тэмдэглэв. Европын Холбоо нь АНУ, Япон зэрэг өндөр хөгжилтэй орнуудад ялыг хориглох талаар бүх талын шахалт үзүүлэхийг Европын Комиссын түшмэл К.Кованда чуулганд тавьсан илтгэлдээ тэмдэглэлээ.
Цаазаар авах ялыг хориглох тухай НҮБ-аас 2007 онд гаргасан тогтоолыг гишүүн 104 улс дэмжсэн, 54 эсэргүүцсэн, 24 нь түдгэлзсэн санал өгсөн байна.
Түүнчлэн чуулганы үеэр цаазаар авах ялыг хориглох тухай Монгол Улсын Ерөнхийлөгчийн санаачилгыг НҮБ-ын Хүний эрхийн дээд Комиссарын газар, Европын Холбооны төлөөлөгчид болон чуулганд оролцогч орнууд, олон улсын төрийн бус байгууллагууд тууштай дэмжиж байгаагаа илэрхийлсэн юм.