Монгол Улсын Ерөнхийлөгч Ц.Элбэгдорж Увс аймгийн Зүүнговь суманд...
Манай улсын хамгийн хүйтэн газруудын нэг болох Увс аймгийн Зүүнговь суманд одоо ч идэр есийн мэт хүйтэн үргэлжилж байна. Цагаан сарын дараа -58 хэм хүрч хүйтэрчээ. “Өвлийн турш 47-55 хэмийн хүйтэн үндсэндээ 90 хоног үргэлжиллээ. Сумын хэмжээнд өвс тэжээл байхгүй боллоо. Аймгийн төвөөс тэжээл ирж байгаа гэсэн түүнийг хүлээж байна” гэсээр сумын засаг дарга Б.Гантуяа угтлаа. Сүүлийн 10 жил энэ сумын хүн амын тал нь нүүгээд явчихсан, бэлчээрийн даац хэтэрсэн, цөлжилт эрчимтэй явагдаж байгаа тухай тэрээр ярив.
Ижил зовлон бэрхшээлийг зэргэлдээх Малчин, Тэс, Хяргас, Баруунтуруун сумдын удирдлага тоочиж байлаа.Тухайлбал, Хяргас сум 150 гаруй мянган малтай 2800 хүнтэй. Зуданд 6 мянга гаруй мал хорогдсон. Мал нь 3 дахин нэмэгдэж, хүн нь 2 дахин цөөрсөн байгаа тухай сумын удирдлага ярилаа. Тэс суманд 1990 онд 10500 хүн байсан бол, өнөөдөр 1354 хүнтэй болжээ.
Хүнгүйдэж, мал нь олширч байгаа энэ байдлыг төр засгийн бодлогоор засах хэрэгтэй байгааг Увс аймгийн иргэд хүсч байна.
Засгийн газраас олгосон тусламжаар гурил будаа ирээд байна гэж засаг дарга нар шүүмжилж байлаа. Гурил будаа, бэлэн хувцас биш бэлэн мөнгө хэрэгтэй байна гэж тэд учирлав. “Бэлэн мөнгө байвал бид өвс тэжээлээ аваад баймаар байна. Одоо сумын төвийн хүмүүс цалингийн зээл авч, өвс худалдан авч малчдад зээл болгон хүргүүлж байна” гэж Тэс, Зүүнговь сумынхан хэллээ.
Гамшгийн байдалтай байгаа нутаг орныг эргэж тойрч байгаад талархаж байгаагаа орон нутгийн удирдлага илэрхийлсэн. Дараа нь сумын иргэдтэй уулзалт хийлээ.