Эдийн засгийн чиглэлээр бичигч сэтгүүлчдийн клубын нээлтэнд зориулж Ч.Отгочулууны хэлсэн үг
Эдийн засгийн чиглэлээр бичигч сэтгүүлчдийн клубын
нээлтэнд зориулж Ч.Отгочулууны хэлсэн үг
Сайн байцгаана уу,
Эдийн засгийн сэтгүүлчдийн клуб нээгдэж байгаад би хувьдаа туйлаас баяртай байна. Энэ клуб сэтгүүлчдийн эдийн засгийн мэдлэгийг гүнзгийрүүлэх замаар иргэдийг бодит мэдээллээр хангах, нийгмийн сэтгэлзүйд эерэгээр нөлөөлөх үйлсэд үнэтэй хувь нэмэр оруулна гэдэгт итгэж байна.
Сэтгүүлч гэдэг мэргэжлийн тухай хувийн бодлоо та бүхэнд сонирхуулмаар байна. Энэ үгийн үндэс нь сэтгэн бодохын “сэтгэ” гэсэн үг биз ээ. Тэгвэл бусдаар үйлдүүлэхийн тийн ялгал залгавал “сэтгүүл” гэсэн үйл үг үүсч, бусдыг сэтгэх үйлд өдөөх гэсэн утга гарч ирж байна. Тус үйл үг дээр бид ажил мэргэжлийн “ч” төгсгөлийг нэмнэ. Магадгүй “сэтгүүлэгч” гэж хэлэх нь хэлбэрийн хувьд илүү зөв ч байж болох юм. Жишээ нь, дасгалжуулагч, зохиогч гэдэгтэй адил. Ингэхээр “сэтгүүлэгч” буюу сэтгүүлч хүний үндсэн үүрэг бол өөрөө бүтээхээс гадна бусдыг бүтээлчээр бодож сэтгэх, уншигч, сонсогч, үзэгчдийг шинэлэг мэдлэг, мэдээлэл олж авахад нь тусалж, мэдээлэл боловсруулах чадамжаа хөгжүүлэхэд нь дэм өгч дасгалжуулахад оршино гэж үзэж байна.
Ялангуяа эдийн засгийн амьдрал маань өөрөө нийгмийн харилцааны суурь салбарын үйл явц. Энэ утгаараа эдийн засгийн ихэнхи үзэгдэл аливаа нэг хэвшмэл загвар, онолд баригддаггүй. Ийм ч учраас эдийн засгийн амьдралыг ойлгох, түүнийг тархиндаа зөв тусгахын тулд хийсэн хүмүүний урт удаан эрэл хайгуул эдийн засгийн олон онол, урсгалыг бий болгосон юм.
Эрхэм сэтгүүлчдээ, та бүхэн эдийн засгийн статистикийн мэдээлэл ашиглах үед үйлдвэрлэл, үйлчилгээний салбарын тухай мэдээ, баримттай байнга нүүр тулах болно. Эдийн засагч хүний хувьд би үйлдвэрлэл, үйлчилгээний салбарт үйл ажиллагаа эрхлэгчид хийгээд сэтгүүлч нарын хооронд адил төстэй зүйл их байдгийг анзаардаг юм. Талх үйлдвэрлэгч, сэтгүүлч хоёр юугаараа адил вэ? Тэд хүмүүнд, бодгальд амин чухал тэжээл үйлдвэрлэдэг. Нэг нь ходоодонд нь нөгөөх нь оюун бодолд нь. Тэгвэл үсчин, сэтгүүлч хоёр юугаараа ижил вэ? Тэд хүмүүсийн гоо сайхны төлөө үйлчилгээ үзүүлдэг юм. Монголчууд үс сайхан бол зүс сайхан гэж ярьдаг. Тэгвэл өнөөдөр сэтгэлгээ зөв бол хөгжлийн хандлага зөв байна гэж үзэх боллоо. Аливаа улс үндэстний хөгжил цэцэглэлт, мандал бадрал нь тэдний сэтгэлгээний соёлоос шууд хамаарна. Бид өнөөдөр тусгаар улсынхаа хувьд хөгжил цэцэглэлтийн торгон агшин дээр ирээд байна. Чухам энэ цагт сэтгэлгээний сайн соёл, нийгмийн зөв үнэлэмжийг хэрхэн төлөвшүүлэхээс Монголчууд бидний ирээдүй шууд хамаарна.
Аж үйлдвэрийн салбарт хувьсгал хийсэн Форд гуай “хүний хувьд хамгийн хэцүү хөдөлмөр бол сэтгэн бодох юм” гэж хэлсэн байдаг. Тэгвэл бусдыг сэтгэн бодох гэдэг хөдөлмөрт сургах, дасгалжуулах учиртай сэтгүүлч та бүхний ажил бүр ч хэцүү байх нь дамжиггүй.
Хэцүү хирнээ асар хариуцлагатай бас буянтай ажил хийж буй та бүхний ажилд өндөр амжилтыг чин сэтгэлээсээ хүсэн ерөөе.
2010 оны 4-р сарын 16
Эдийн засгийн чиглэлээр бичигч сэтгүүлчдийн клубын нээлтэнд зориулж Ч.Отгочулууны хэлсэн үг
