Энэ өдрүүдэд, дэлхий дахины анхаарлыг хамгийн ихээр татаж байгаа үйл явдлуудын нэг нь яахын аргагүй “Шанхай Экспо 2010” болж байна.
“Сайхан хот-Сайхан амьдрал” уриан дор зохиогдож байгаа Шанхай Экспо хөгжиж буй оронд болж байгаа анхны үзэсгэлэн болж байгаа юм.
2010 он гэхэд манай гаригийн хүн амын тал хувь нь хот суурин газар амьдарна гэсэн тооцоо байдаг. Тийм учраас 21-р зуунд хотын нөхцөлд, байгальд ээлтэй аргаар аж төрөх шинэ боломжуудыг энэ үзэсгэлэн харуулах боломжтой юм. Хот байгуулалт, хүний ахуй орчин, амьдралын хэлбэр загварт ямар шинэ чиг хандлага байгааг энэхүү Экспогоос харж болно.
Өмнөх зохиогдож байсан Экспонуудын нэгэн адил хүн төрөлхтөний соёл иргэншлийн харилцан шүтэлцээ, хамтын ажиллагааг мөн үзүүлж байна.
Улс орон бүр өөр өөрсдийн онцлог павильонтой. Зочдын анхаарлыг хамгийн их татаж байгаа хятадын “Дорнын Титэм” барилга нь 5000 гаруй жилийн түүхтэй, догун хэмээх уламжлалт дүнзэн зангилаа өрлөгөөр хийсэн бөгөөд орчин үеийн архитектурын гайхамшиг болсон гэж дүгнэж байна.
Үзэгчдийн хамгийн их үзэхээр төлөвлөсөн павильонуудын нэг болох Япон Улсын хувьд, ирээдүйд байгальд ээлтэй технологийн ачаар хотжилт нь эмх замбараагүй барилгын бөөгнөрөл байхаа больж, харин байгальд ойрхон, ээлтэй, амар хялбар болохыг зөгнөж байна.
Монгол Улсын павильон голдоо үлэг гүрвэлийн аварга том өндөг байрлуулжээ. “Их говийн хөрсөн доорхи эрдэс баялаг хүмүүний анхаарлыг улам их татаж байна. Монголын говьд ашигт малтмалын асар их нөөцтэй орд газрууд илэрч байна. Эдгээр нь говьд томоохон бүтээн байгуулалтын ажил өрнөж, хот бий болоход бэлэн байгааг илтгэж байгаа юм. Иймд бид сайхан хот бас ухаалаг шийдэл бүхий хотыг бий болгоход анхаарах цаг болсон. Ийм утга агуулгыг “Говь ба хот” сэдэвт Монголын павильон агуулж байна” хэмээн Монголын талын зохион байгуулагчид ярилаа. Эх дэлхий маань өндөр мэт хэврэг болсоор, бид эх дэлхийгээ хайрлахгүй бол устаж үгүй болсон үлэг гүрвэлийн түүх давтагдана гэдэг санааг илтгэж байгаа өндөгний дотор гүрвэлийн ясан хэлхээ яс угсарсан хоёр гэрийн модтой. Шинэ цагийн хот байгуулалт уламжлалт соёл, экологийн тэнцвэрийг барихад оршино гэдгийг харуулахыг зорьжээ.
Монгол Улсын Ерөнхийлөгч Ц.Элбэгдорж гэргийн хамт “Шанхай Экспо 2010” үзэсгэлэнд зочилж, Монголын болон зохион байгуулагч Шанхай хотын, ӨМӨЗО-ны, мөн Япон Улсын павильонуудыг үзэж сонирхлоо.