БНХАУ-д төрийн айлчлал хийж байгаа Монгол Улсын Ерөнхийлөгчийн айлчлалын сүүлчийн зогсоол нь ӨМӨЗО-ны Эрээн хот байлаа.
Ерөнхийлөгч Ц.Элбэгдоржийг Эрээн хотын намын хорооны дарга Тао Шүжүй, Эрээн хотын Засаг дарга Мэн Жиан Дун, дэд дарга Во Ган нар угтан авав.
“Монгол Улсын Ерөнхийлөгч БНХАУ-д анхны айлчлалаа хийхдээ Эрээн хотод зочилж байгаа нь энэ бүс нутаг дагуух харилцаа хамтын ажиллагааг хөгжүүлэхэд онцгой анхаарч байгаагийн илрэл гэж бид дүгнэж байна. Эрээн хот, Монгол-Хятадын худалдаа соёлын харилцааны чухал үүрэг хариуцлагыг үүрсээр ирлээ. Сүүлийн жилүүдэд газарзүйн давуу талаа ашиглан бид танай оронтой худалдаа, боловсрол, эрүүл мэндийн салбарт хамтын ажиллагааг улам бүр өргөжүүлж байна.
Эрээн хот 1992 оноос түргэн хөгжлийн замд орсон гэж бид үздэг. Өнгөрсөн жил бид нисэх буудал, усны эх сурвалж, эрчим хүчний томоохон төслүүдийг хэрэгжүүллээ. Төмөр замын ложистикийн төв, болон шинэ автозам барьж байна. Манай хөгжлийн суурь нь дэд бүтэц гэж үздэг” хэмээн Эрээн хотын намын хорооны дарга, хатагтай Тао Шүжүй танилцуулаад тодорхой саналууд тавилаа. Эдгээр нь:
Нэгдүгээрт, Замын –Үүдийн эдийн засгийн чөлөөт бүсийг бүтээн байгуулахад хамтын ажиллагаагаа эрчимжүүлэх саналтай байна. Хэдэн жилийн өмнө Хятад улс болон Казахстан улсын хооронд хил дамнасан эдийн засгийн хамтын ажиллагааны бүсийг байгуулж, хоёр улсын нөөц баялаг болон төрийн зөв бодлогыг ашиглан хөрөнгө оруулалт татан, боловсруулах үйлдвэрүүдийг байгуулсан байна. Энэ жишгийн дагуу Замын –Үүдтэй хил дамнасан чөлөөт бүс байгуулах нь Эрээн хотын төдийгүй, Замын –Үүдийн хөгжилд чухал түлхэц болсон шийдвэр болно гэж үзэж байгаа юм.
Хоёрдугаарт, Монгол Улсын нутаг дэвсгэрээр дамжин өнгөрөх транзит тээврийн зардал хураамжийг багасгах
Гуравдугаарт, Эрээн-Замын –Үүдийн төмөр зам болон авто замын боомтын хөгжлийг эрчимжүүлэх, аялал жуулчлалын хамтын ажиллагааг хөгжүүлэх зэрэг саналууд юм.
Ерөнхийлөгч Ц.Элбэгдорж, БНХАУ-д хийж байгаа төрийн айлчлалын хүрээнд Эрээн хотод ирэх болсон нь тохиолдлын хэрэг биш бөгөөд , Замын –Үүд , Эрээн бол хоёр улсын ард түмний хамгийн түрүүн уулздаг цэг, харилцааны түүхэн чухал газар юм гээд Эрээн-Замын –Үүдээр дамжуулан хоёр орны харилцааг хөгжүүлэх талаар саналаа хэллээ. “Монгол Улсын засгийн газар Замын Үүдийн чөлөөт бүс байгуулах шийдвэрийг ажил хэрэг болгох тодорхой ажлуудыг хийж байгаа. Энэ бүс нутагт онцгойлон анхаарч ажиллах зүйл бий. Ялангуяа, автозам болон төмөр замын хүчин чадлыг нэмэгдүүлэх, хүний наймаа , гэмт хэрэгтэй тэмцэх чиглэлээр хамтран ажиллах шаардлагатай. Өнөөдөр Эрээн хотод 300 гаруй хүүхэд дунд сургуульд сурч байна. Сургалтын визтэй болох асуудлыг анхаарах хэрэгтэй байгаа” гэж ярилаа.
Ерөнхийлөгч ӨМӨЗО-ны Эрээн хотоос галт тэргээр эх орон руугаа буцсанаар БНХАУ-д хийсэн төрийн айлчлал өндөрлөсөн юм.