Өнөөдөр Бүгд Найрамдах Словени Улсаас Монгол Улсад суух Онц бөгөөд Бүрэн эрхт Элчин сайд эрхэмсэг хатагтай Марияа Аданяа Монгол Улсын Ерөнхийлөгч Ц.Элбэгдоржид итгэмжлэх жуух бичгээ өргөн барилаа.
Жуух бичгээ барьсантай нь холбогдуулан Монгол Улсын Ерөнхийлөгч Ц.Элбэгдорж хатагтай М.Аданяад баяр хүргэж хэлсэн үгэндээ, хоёр орны харилцаа хамтын ажиллагаа амжилттай хөгжиж ирсэнийг дурьдсан юм.
Мөн Ерөнхийлөгч Аугаа их эх орны дайны ялалтын 65 жилийн ойн баярын арга хэмжээний үеэр Москва хотноо Словени Улсын Ерөнхиилөгч Данило Тюрктэй уулзсанаа дурдаад, хатагтай М.Аданяаг томилогдон ажиллах хугацаанд хоёр орны харилцаа цаашид улам өргөжин хөгжинө гэдэгт итгэлтэй байгаагаа илэрхийлэв.
Мөн хоёр орны худалдаа, эдийн засаг, хөрөнгө оруулалтын салбарын хамтын ажиллагааг харилцан ашигтай хэлбэрээр өргөжүүлэн хөгжүүлэх эрмэлзлэлтэй байгаагаа Ерөнхийлөгч мэдэгдээд Монгол Улс Европын Холбооны орнуудад “GSP+” нөхцлийн дагуу 7200 нэр төрлийн барааг татваргүй оруулах эрхтэй бөгөөд энэ боломжийг хамтран ашиглах, мөн Словений компаниуд манай оронд үйлдвэрлэл явуулж бараа бүтээгдэхүүнээ ЕХ-нд гаргах боломжтойг дурьдлаа.
Уулзалтын үеэр Ерөнхийлөгч хоёр орны хооронд боловсрол, соёлын салбарт хамтран ажиллах боломжтойг мөн илэрхийлсэн юм.
Элчин сайд, хатагтай М.Аданяа Монгол Улсын Ерөнхийлөгчид талархал илэрхийлээд хоёр орны найрсаг хамтын ажиллагааг улам өндөр түвшинд хүргэхийн тулд идэвхитэй ажиллахаа хэллээ.