2010 оны 4 дүгээр сарын 14-нд Монгол Улсын Ерөнхийлөгч Цахиагийн Элбэгдорж “Мод тарих үндэсний өдөр зарлах тухай” 63 дугаар зарлигаа гаргасан билээ.
Уг зарлигаар, жил бүрийн 5, 10 дугаар сарын хоёр дахь долоо хоногийн “Бямба” гарагийг бүх нийтээр мод тарих үндэсний өдөр болгон зарласан юм. Өнөөдөр 2010 оны 5 дугаар сарын 15-нд тус зарлигийг хэрэгжүүлэх хүрээнд анх удаа Ерөнхий боловсролын сургууль, цэцэрлэг, албан байгууллага, ард иргэд орон даяар, бүх нийтээрээ мод тарих арга хэмжээнд өргөнөөр оролцож байна.
Монгол Улсын Ерөнхийлөгч Цахиагийн Элбэгдорж, БОАЖЯ-ны Сайд Л.Гансүх, ЭБЭХЯ-ны Сайд Д.Зоригт, ЕТГ-ын дарга Д.Дорлигжав, УИХ-ын гишүүн Г.Баярсайхан нар болон Ерөнхийлөгчийн Зөвлөхүүд, Улаанбаатар хотын Ерөнхий менежер Ч.Бат, Чингэлтэй дүүргийн Засаг дарга Д.Ганболд, НЗДТГ-ын удирдлагуудын хамтаар Чингэлтэй дүүргийн 56 дугаар цэцэрлэгт очиж мод тарьцгаав.
Эхлээд Ерөнхийлөгчийг 56 дугаар цэцэрлэгийн хүүхэд багачууд, цэцэрлэгийн удирдлагууд, багш нар, эцэг эхчүүдийн төлөөлөл хүлээн авч бяцхан хүүхдүүд Ерөнхийлөгчдөө ая дууны мэндчилгээ дэвшүүлсэн юм. Дараа нь Ерөнхийлөгч, хүүхдүүд, ЕТГ-ын ажилтан, албан хаагчдын хамтаар гацуур мод суулгасан бөгөөд ЕТГ-аас Чингэлтэй дүүргийн 56 дугаар цэцэрлэгийн гадаах талбайд иж бүрэн хүүхдийн тоглоомыг бэлэглэж хүлээлгэж өгөв.
Энэ үеэр Монгол Улсын Ерөнхийлөгч олон жил мод тарьж, бусдад үлгэр жишээ үзүүлж яваа Баян-Өлгий аймгийн Баяннуур сумын иргэн Жамэкэгийн Бахытийг Алтан гадас одонгоор шагнасан юм. Ж.Бахыт нь Монгол орны эрс сэрүүн бүсийн 3-р сортын хөрсөнд алимны модны төгөл ургуулж, шинээр алимны модны дөрвөн сорт гаргаж авсан бөгөөд жилдээ 5 тонн алим хурааж авдаг байна. Тэрээр өөрийн орон нутгийн иргэдээ мод тарих арга ажиллагаанд сургаж буй хөдөлмөрч хүн гэдгийг нь ийнхүү онцолж шагнал гардууллаа.
Дараа нь Монгол Улсын Ерөнхийлөгч, Чингэлтэй дүүргийн 17 дугаар сургуулийн сурагчдын мод тарьж буй талбай дээр очин хүүхдүүдийн хэрхэн мод тарьж байгаатай танилцлаа.
Мод тарих үеэр Монгол Улсын Ерөнхийлөгч хэлсэн үгэндээ, “Хүн санаачилга гаргаж болно. Энэ санаачилгыг бодлого болгохын тулд хүн бүхэн амьдралынхаа зорилго болгох ёстой. Хүн ямар нэгэн байдлаар байгаль дэлхийтэйгээ хүйн холбоотой амьдрах учиртай. Би гэрийнхээ гадаа мод тарьж байгаа. Цаашид мод тарьж буй хүмүүсийн санаачилгыг тууштай дэмжинэ.
Тухайлбал, Өвөрхангай, Өмнөговь явдаг засмал зам дагуу газар авч мод тариалах төлөвлөгөө гаргаж, аймгуудтай хамтран ажиллах, тэдгээр модыг хамгаалах иргэдийг цалинтайгаар арчлуулж хамгаалуулах нь зүйтэй гэж бодож байна. Жишээ нь нэг модыг мянган төгрөгөөр хараад, мянган модыг сая төгрөгний цалинтайгаар хамгаалан арчилж болох сайхан боломж ч иргэдэд маань байгаа юм” гэв.