Өнөөдөр Монгол Улсын Ерөнхийлөгч Цахиагийн Элбэгдоржид Бүгд Найрамдах Энэтхэг Улсаас Монгол Улсад суух Онц бөгөөд Бүрэн эрхт Элчин сайд, ноён Сатбир Сингх Итгэмжлэх жуух бичгээ өргөн барив.
ИЖБ барьсантай нь холбогдуулан түүнийг Ерөнхийлөгч хүлээн авч уулзсан бөгөөд “Өнө эртнээс найрсаг харилцаатай явж ирсэн Жагарын орныг төлөөлөн Монгол оронд ажиллахаар томилогдсонд нь баяр хүргэж Монгол, Энэтхэг хоёр улсын уламжлалт найрсаг харилцаа сүүлийн жилүүдэд эрчимжиж шинэ агуулга, хэлбэрээр баяжсаар байгаад сэтгэл ханамжтай байгаагаа тэмдэглэсэн юм.
Ерөнхийлөгч Ц.Элбэгдорж төрийн тэргүүнээр сонгогдоод гадаадад хийсэн анхны айлчлалаа 2009 оны 9 дүгээр сард БНЭУ-аас эхэлснээ дурдаж, айлчлалын үеэр хоёр тал харилцаагаа иж бүрэн түншлэлийн шатанд ахиулан гаргах болсон нь ихээхэн ач холбогдолтойг онцлон тэмдэглэв.
Мөн Ерөнхийлөгч уулзалтын үеэр, “Манай хоёр орны өв соёл, боловсрол зэрэг уламжлалт салбарын жин үүрэг их байгаа нь сайн хэрэг бөгөөд цаашид эдийн засаг, худалдаа, хөрөнгө оруулалтын чиглэлээрх хамтын ажиллагаагаа улам өргөжүүлэх шаардлага, боломж бий гэдгийг онцлов.
Энэ жил хоёр орны хооронд дипломат харилцаа тогтоосны 55 жилийн ой тохиож байгаа бөгөөд тэмдэглэлт ойг тохиолдуулан Энэтхэгийн Ерөнхий сайд, ноён Манмохан Сингхийг манай улсад айлчлан ирнэ гэж Монголын тал найдаж байгаагаа хэлэв.
Уулзалтын үеэр Элчин сайд С.Сингх мөн Монгол Улсад өөрийн улсыг төлөөлөн ажиллахаар томилогдож ирээд байгаадаа баяртай байгаагаа хэлээд Ерөнхийлөгчийн дурьдсан хоёр орны харилцааг шинэ шатанд гаргах ажилд идэвхитэй оролцохоо илэрхийлсэн юм.
Элчин сайд С.Сингх нь 1986 оноос эхлэн БНЭУ-ын Гадаад хэргийн яамнаас эхлэн олон жил дипломат салбарт ажиллаж ирсэн туршлагатай нэгэн юм. Тэрээр Москва дахь ЭСЯ-нд Сайд, зөвлөх, Лондон дахь дээд комиссарын газарт зөвлөх болон Бишкек, Стокхолмд тус тус дипломат алба хашиж байсан байна.