Зарим орны Элчин сайдууд бараалхав
Манай улсад суухаар тохоон томилогдсон зарим орны Элчин сайдууд, Монгол Улсын Ерөнхийлөгч Ц.Элбэгдоржид өнөөдөр итгэмжлэх жуух бичгээ барилаа.
Бүгд Найрамдах Финланд Улсаас Монгол Улсад суух Онц бөгөөд Бүрэн эрхт Элчин сайдаар Ларс Эрик Бакстрем томилогдсон байна. Тэрээр Европын Холбоо болон Тайланд, Лаос зэрэг Азийн дөрвөн оронд ажиллаж байсан туршлагатай дипломат юм. Монгол-Финланд хоёр улс найрсаг харилцаатай бөгөөд, энэ харилцааг бүх шатанд өргөжүүлэн хөгжүүлэхийн төлөө ажиллах болно гэдгээ Элчин сайд Эрик Бакстрем илэрхийллээ. “ Ялангуяа худалдаа эдийн засгийн салбарт бидэнд хамтран ажиллах боломж бий. Түүнчлэн хоёр улсын хооронд өндөр дээд хэмжээний уулзалт, яриа хэлэлцээг тогтмолжуулах нь харилцаанд чухал нөлөөтэй байх нь дамжиггүй. Энэ талаар бид чармайн ажиллах болно” гэв.
Бельгийн Вант Улсаас Монгол Улсад суух Онц бөгөөд Бүрэн эрхт Элчин сайдаар тохоон томилогдсон Патрик Нижс мөн итгэмжлэх жуух бичгээ Монгол Улсын Ерөнхийлөгчид өргөн барилаа. Элчин сайд Патрик Нижс нь Япон, Хонг-Конг, Шанхайд ажиллаж байжээ.
Монгол-Бельгийн харилцаа худалдаа эдийн засаг, батлан хамгаалах салбаруудад эрчимтэй хөгжиж байгаа. Бельгийн Вант Улс нь Европын Холбооны Зөвлөлийг 2010 оны 7 дугаар сарын 1-ээс эхлэн даргалж байна. Манай улс уул уурхайн эцсийн бүтээгдэхүүн үйлдвэрлэх сонирхолтой байгаа энэ үед металлургийн чиглэлийн мэргэжилтэн бэлтгэх, мөн хөрөнгө оруулалт, боловсрол хүмүүнлэгийн салбарын хүрээнд хамтын ажиллагааг эрчимжүүлэх боломж бий. Мөн Европ стандартыг Монголд нэвтрүүлэх сонирхолтой байгаа билээ. Энэ бүх асуудлууд Монгол Улсын Ерөнхийлөгч Ц.Элбэгдоржийн болон Ерөнхий сайд С.Баярын ЕХ-нд хийсэн айлчлалын хүрээнд амжилттай яригдаж байсан юм.
Бүгд Найрамдах Мали Улсаас Монгол Улсад суух Онц бөгөөд Бүрэн эрхт Элчин сайд ноён Брахми Кулибали Монгол Улсын Ерөнхийлөгчид мөн итгэмжлэх жуух бичгээ өргөн барив. Мали Улс нь манай улстай 1960 онд дипломат харилцаа тогтоож байжээ. Газар зүйн хувьд алслагдмал байдал нь хоёр улсын дунд худалдаа эдийн засгийн харилцааг хөгжүүлэхэд бэрхшээлтэй байдаг ч, бидэнд хөдөө аж ахуй, болон мал аж ахуйн салбарт хамтын ажиллагааг хөгжүүлж болох адил төстэй зүйлүүд байдаг гэж Элчин сайд ярилаа.
Итгэмжлэх жуух бичгүүдийг хүлээн авсныхаа дараа Монгол Улсын Ерөнхийлөгч Элчин сайдуудад баяр хүргэж, амжилт хүслээ.
Зарим орны Элчин сайдууд бараалхав