Бөхчүүдэд цол олгов
Монгол Улсын Ерөнхийлөгчийн зарлигаар, Үндэсний их баяр наадам, Их Монгол Улс байгуулагдсаны 804 жилийн ой, Ардын хувьсгалын 89 жилийн ойн баяр наадмын хүчит бөхийн барилдаанд 5 давсан бөхчүүдэд “Улсын начин” цол олголоо.
Ховд аймгийн Чандмань сумын харъяат, “Хангарьд” спорт хороо, Дотоодын цэргийн 816 дугаар анги, “Баруун Монгол Интернэйшнл” ХХК-ийн бөх Б.Заяамандах, Өвөрхангай аймгийн Хархорин сумын харъяат, Хилийн цэргийн 0146 дугаар анги, “АПУ” ХК-ийн бөх Т.Санчир, Сэлэнгэ аймгийн Мандал сумын харъяат, Зэвсэгт хүчний 032 дугаар анги, “Ноёд” группийн бөх Ч.Баянмөнх нар начин цол хүртэж, наадамчин олноо баясгав.
Мөн хүчит бөхийн барилдаанд 6 давсан Увс аймгийн Баруунтуруун сумын харъяат, “Хилчин” спорт хороо, Хилийн цэргийн 0311 дүгээр анги, “Монголросцветмет” нэгдэл, “Уурхайчин” клубын бөх Сүхбаатарын Мөнхбат, Увс аймгийн Сагил сумын харъяат, “Алдарт” спорт хороо, Зэвсэгт хүчний 0330 дугаар анги, “Монголросцветмет” нэгдэл, “Уурхайчин” клубын бөх Арслангийн Бямбажавт Улсын харцага цол олголоо.
Бөхчүүдэд цол олгов