Монгол Улсын Ерөнхийлөгчийн зөвлөх Л.Дашдорж АНУ-ын Сангийн яамны төлөөлөгчидтэй уулзав
2010 оны 05 дугаар сарын 27.
Монгол Улсын Ерөнхийлөгчийн зөвлөх Л.Дашдорж АНУ-ын зүүн Азийн газрын дарга Крис Виншип /Chris Winship/, АНУ-ын сангийн яамны төлөөлөгч Майкел Хирсон /Michael Hirson/, АНУ-ын элчин сайдын яамны худалдаа, эдийн засгийн хэсгийн дарга Винсэнт Спера /Vincent Spera/ нартай 2010 оны 5 дугаар сарын 27-ны өдөр уулзав.
Уулзалтын үеэр Монгол Улсад болж байгаа төсвийн шинэчлэлийн үйл явц, санхүүгийн салбарын шинэчлэл /“Төсвийн тогтвортой байдлын тухай”, “Төсвийн тухай” хуулиуд/, Монгол Улсын банкны бүтцийн өөрчлөлтийн талаар харилцан санал солилцсон ажил хэрэгч уулзалт боллоо.
АНУ-ын зочид АНУ хоёр жилийн турш санхүүгийн хямралаас сурсан зүйл их байгаагаа дурьдаад “Засгийн газар, санхүүгийн салбарын хоорондын уялдааг сайжруулах шаардлагатай. Санхүүгийн салбар бол эдийн засгийн гол тулгуур нь юм. Санхүүгийн салбарыг зохицуулахад Засгийн газрын зүгээс хүчтэй хяналт байх ёстойг ойлгож авсан. Мөн банк, санхүүгийн салбарт төрийн зүгээс хяналтыг чангаруулахыг АНУ-ын арилжааны банкууд эсэргүүцэж, гомдоллож байдаг. Тэднийг сонсолгүй яахав гэхдээ үүний ард улс үндэстний асуудал байгаа учир бид тэгж харж ажиллах ёстой юм.” хэмээв.
Мөн Олон Улсын байгууллагууд, доноруудын хамтын ажиллагаа чухал болохыг онцлоод ОУВС-ын хөтөлбөр дуусах дөхөж байгаа, бага мөнгө үлдсэн байгаа. Гэвч мөнгөндөө бус тус хөтөлбөрийг дуусгах нь чухал. Үүнээс гарах үр дүн нь маш чухал ач холбогдолтой болохыг дурьдаж байв. Монгол Улсын 2010 оны Төсвийн тодотгол орсон өөрчлөлт нь ОУВС-тай байгуулсан гэрээг дуусгахад саад учруулж байгаад анхаарал хандуулахыг хүссэн.
Монгол Улсын Ерөнхийлөгчийн зөвлөх Л.Дашдорж АНУ-ын Сангийн яамны төлөөлөгчидтэй уулзав