Монгол мод
Want create site? Find Free WordPress Themes and plugins.

“МОНГОЛ МОД” САНААЧИЛГА

Биднийг амьсгалах агаар, уух ус, хэрэглэх хүнсээр хангаж байдаг ой мод нь хуурай газрын амьтан, ургамал, шавьжны аймгийн амьдрах орчин болдог бөгөөд эдгээр биологийн төрөл зүйл болон түүний нөлөөлж байгаа экосистем нь уур амьсгалын өөрчлөлтөд дасан зохицох, байгалийн гамшгийг бууруулах стратегийн үндэс суурь юм.

Ойн хомстол ба ойн доройтлын улмаас байгаль дээрх төрөл зүйлүүдийн тоо цөөрч, цэвэр усны чанар муудаж, хөрсний элэгдэл, газрын доройтолд хүрэхээс гадна агаар мандалд ялгарах нүүрстөрөгчийн хэмжээ ихсэж байна. Өөрөөр хэлбэл ойг хамгаалах, түүнийг нөхөн сэргээх чиглэлээр ямар ч арга хэмжээ авахгүй байх нь манай дэлхийн болон бидний эрүүл амьдрал, хүрээлэн буй орчинд сөрөгөөр нөлөөлдөг.

Монгол Улсын ойн сан бүхий газар нь нийт нутаг дэвсгэрийн 9.2 хувийг эзэлдэг бөгөөд ойгоор бүрхэгдсэн талбайн хэмжээ ердөө 7.8 хувь байна. Харамсалтай нь уур амьсгалын өөрчлөлт, ган, хуурайшилтын улмаас ой, хээрийн түймрийн давтагдал нэмэгдэж, хортон шавьж хэт олширч, тархалтын хүрээ тэлж байгаа болон хүний зохисгүй үйл ажиллагааны улмаас жил ирэх тусам Монгол орны ойн бүрхэвч багасаж, ойн нөөцийн хомстох, доройтох үйл явц эрчимжиж байна.

Цаашилбал говийн бүсэд нүүрлээд буй цөлжилтийн асуудлыг мод тарих замаар шийдвэрлэх, аймаг, нийслэл, сум, дүүрэг, баг, хороо, гудамж бүрийг моджуулах, айл бүр амьдарч буй орчиндоо мод тарих хэрэгцээ шаардлага зайлшгүй тулгарч байгаа бөгөөд үүнд иргэн бүрийн оролцоо нэн чухал байна.

Иймд бид Монгол орны ой, гол мөрний усны нөөцийг зохицуулах, хөрсийг элэгдэл, эвдрэлээс хамгаалах, уур амьсгалыг зөөлрүүлэх, хүлэмжийн хийг шингээх, амьтан, ургамал, бичил биетний амьдрах тааламжтай орчныг бүрдүүлэх, мөнх цэвдгийг тогтоон барих зэрэг экологийн өндөр ач холбогдолтой ойжуулалт, ойн тогтвортой менежментийг хэрэгжүүлэх ажилд иргэн бүрийн оролцоог хангах  зорилгоор “Монгол Мод” санаачилгыг дэвшүүлсэн.

Бид хойч үедээ эрүүл амьдрах хүрээлэн буй орчинг өвлүүлэн үлдээх чин хүсэл эрмэлзэлтэй хувь хүн, иргэний нийгэм, төр болон хувийн хэвшлийн байгууллагуудыг хамтран ажиллахыг урьж байна.

Санал хүсэлт

Did you find apk for android? You can find new Free Android Games and apps.