Ардчилсан хувьсгалын 20 жилийн ойн баярт зориулсан хүндэтгэлийн хуралд оролцогсдод
Ардчилсан намын гишүүд, дэмжигчид, Эрхэм журмын нөхөд өө, Хатагтай ноёд оо, Монгол орны нийгэм, улс төр, эдийн засгийн бүх хүрээнд ардчилсан өөрчлөлт шинэчлэлийн салхийг хагалсан Ардчилсан хувьсгалын 20 жилийн ой энэ өдрүүдэд тохиож байна.
Өнгөрсөн 20 жилд улс төрийн хүрээнд бид Ардчилсан Үндсэн хуулиа баталж, Улсын Их Хурлын таван удаагийн сонгууль явуулж, парламентат ёсыг бэхжүүлэн, олон намын тогтолцоог баталгаажуулж, иргэд үзэл бодлоо чөлөөтэй илэрхийлэх эрхийг хуульчлан, олон ургальч үзлийг нийгмийн оюун санааны иш үндэс болголоо. Эдийн засгийн хүрээнд дангаар ноёрхож байсан төрийн өмчийн тогтолцоог халж, өмчийн олон хэвшил үүсч хөгжин, шударга өрсөлдөөнд тулгуурласан зах зээлийн эдийн засгийн харилцаа төлөвшлөө.
Одоо хувийн хэвшил дотоодын нийт бүтээгдэхүүний 80 гаруй хувийг бий болгож, Монгол Улсыи эдийн засагт өөрийн байр суурийг нэгэнт олсон байна.
Монголчууд бид ардчиллаас их зүйлийг хүртсэн. Малтай болсон. Орон сууцтай болсон. Дуртай бизнесээ хийх эрхтэй болсон. Хэнээс ч айлгүй үгээ хэлэх, санал бодлоо илэрхийлэх, шашин шүтэх, хүссэн газраа амьдрах, гадаадад чөлөөтэй зорчих эрх чөлөөг олж авсан.
Хамгийн гол нь бид ардчиллын буянд үе үеийн монголчуудын чин хүсэл мөрөөдөл, хүчин зүтгэл, халуун тэмцлийн зорилго байсан улсынхаа бүрэн эрх, тусгаар тогтнолыг жинхэнэ утгаар нь олж авсан явдал юм.
Монголчууд бид зовхи нь өөдөө, босоо хийморьтой ард түмэн билээ. Ирэх 20 жилд ихийг амжуулж, ардчиллын үнэт зүйлсийг бэхжүүлэн, иргэдийн оролцоог хангаж, шударга ёсны үнэлэмжүүдийг Монгол орныхоо хөрсөнд нэг мөр нутагшуулж чадна гэдэгт итгэлтэй байна.
Монгол Улс хөгжин, дэлхийн үлгэр жишээ ардчилсан улсуудын нэг болох ёстой. Бид бахархах түүхтэй, бас гайхуулах баялагтай. Ардчилсан нийгэмд өсч бойжиж буй залуу үе маань байна. Нэг үгээр хэлбэл сайхан ирээдүй бидний өмнө байна. Гагцхүү хүн бүр өөрт оногдсон ажлыг сайн хийх, шударга байх, нийгмийн амьдралд идэвхтэй, ухамсартай, биечлэн оролцдог болох хэрэгтэй байна. Ийм иргэдийн оролцоонд тулгуурласан, эрх чөлөөтэй, иргэд нь эрхээ эдэлдэг, үүргээ биелүүлдэг, төр нь иргэдээ сонсдог, иргэддээ үйлчилдэг нийгмийн төлөө, сайн сайхан амьдралын төлөө та бид тэмцэж ирсэн. Энэ тэмцэл маань дуусаагүй байна. Энэ тэмцлийг ардчилсан хувьсгалын тэргүүн эгнээнд явсан та бүхэн манлайлан үргэлжлүүлж чадна гэдэгт би итгэжбайна.
Эрхэм журмын нөхөд өө,
Монголын ардчилагчид цасны жавар, цагийн жавар хоёрыг хамтад нь сөрж боссон тэр цагаас хойш хорин жил улирлаа. Цасанд шургаж ургасан цэцэг, мөс өргөж үндэслэсэн нахиа шиг эмзэг, гэхдээ гарцаагүй ирэх цагийн бэлгэдэл байсан Монголын ардчилал нэгэнт хорин хавар, хорин намрыг үджээ. Ардчиллыг анхны өдөр нь арчих гэж тэмүүлсэн тэр хүчин, тэр үзэл санаа өнөөдөр өөрснөө түүхнээс арчигдан арилж байна.
Монголын ардчилал ачаагаа өргөх тэнхээтэй, араа даах хариуцлагатай болж, эрийн цээнд хүрлээ. Ардчилал нь Монголын нийгмийн амьдрал, улс, үндэсний үнэт зүйлсийн салшгүй нэгэн хэсэг боллоо. Монгол орны цаашдын хөгжил дэвшил, найдвартай тусгаар тогтнолыг ардчилал, түүний үнэт зүйлгүйгээр төсөөлөх аргагүй болов.
Ардчиллын эцсийн зорилго нь мянга мянган жилээр яригдах төрт ёсны уламжлалтай, зуун зуунаар яригдах эзэнт гүрний түүхтэй монгол нутагт эрх чөлөөтэй, баялаг бүтээгч зол жаргалтай монгол хүн билээ.
Ардчилал хүний зуу зуун жилийн тэмцэл, туршлага дээр нахиалаад, үрийн үрд улам дэлбээлэн цэцэглэж буй хүн төрөлхтний оршин тогтнохуйн урлаг билээ.
Хоёр мянганы түүхт төр ёс, есөн зууны эзэнт гүрний уламжлалтай Монгол төрд ардчилал өөриймшин, нутагшиж, бидний салшгүй нэгэн хэсэг болсны түүхт энэ ойн өдөр өнөөдөр бидний дунд байхгүй байгаа олон сайхан нөхдөө эргэн дурсаж байна.
Тэдний минь үйл хэрэг, дурсгал нь, ардчиллын анхны өдөр өргөлцөж явсан туг шигээ бидний сэтгэл зүрхэнд хийморь болон дэрвэж байна.
Эх орондоо хүний нийгмийн оршин тогтнохын дээд урлаг-ардчиллыг авчирч, өвлийн хүйтэн, дэглэмийн жавар хоёрыг хамт сөрсөн баатрууд, улс төрийн намуудад баяр хүргэж байна.
Ардчиллыг анхны өдрөөс нь алгандаа тосч, элгэндээ тэвэрсэн монголын ард түмэндээ баяр хүргэж байна.
Улс үндэстнийхээ түүхийн ардчилал хэмээх шинэ хуудсыг хамт эргүүлэлцсэн тэр өдрүүдэд мөр зэрэгцэн хамт явсан бүх хүнд юу юунаас илүү баярлалаа.
Өдгөө хорин жилийн ойг нь тэмдэглэж буй энэ аугаа их үйл явдал бол ардчиллын төлөө амь насаа огоорон тэмцсэн баатруудын баяр, баатарлаг ариун үйлсийг нь эхийн сэтгэлээр энгэртээ тэвэрсэн ард түмний баяр, хоног өдөр улирахын хэрээр түүхэн зайлшгүй сонголтын утга учрыг танин ухаарагсдын баяр, манай нийт ард түмний баяр билээ.
Шинэ мянганы ардчилсан эрх чөлөөт Монгол Улс мандан бадрах болтугай
Сайн үйлс дэлгэртүгэй.
МОНГОЛ УЛСЫН ЦАХИАГИЙН
ЕРӨНХИЙЛӨГЧ ЭЛБЭГДОРЖ
2010 оны 12 дугаар сарын 10
