Монгол Улсын Ерөнхийлөгч Цахиагийн Элбэгдорж, БНЭУ-ын Ерөнхийлөгч Эрхэмсэг хатагтай Пратибха Девисингх Патил нар Монгол Улс, Бүгд Найрамдах Энэтхэг Улс хоорондын харилцаа, хамтын ажиллагааны баримт бичгүүдэд гарын үсэг зурах ёслолд оролцсоныхоо дараа хэвлэл мэдээллийн төлөөлөгчдөд дараах мэдээллийг хийв.
МОНГОЛ УЛСЫН ЕРӨНХИЙЛӨГЧ ЦАХИАГИЙН ЭЛБЭГДОРЖ ХЭВЛЭЛ, МЭДЭЭЛЛИЙН ТӨЛӨӨЛӨГЧИДТЭЙ УУЛЗАХДАА ХЭЛСЭН ҮГ
Монгол Улсын Ерөнхийлөгчийн урилгаар манай оронд төрийн айлчлал хийж буй Бүгд Найрамдах Энэтхэг Улсын Ерөнхийлөгч Эрхэмсэг хатагтай Пратибха Девисингх Патил-тай албан ёсны хэлэлцээ хийлээ. Яриа хэлэлцээ ажил хэрэгч, бүрэн ойлголцсон, элэгсэг дотно уур амьсгалд болов.
Бид 2009 онд БНЭУ-д хэрэгжсэн Монгол Улсын Ерөнхийлөгчийн айлчлалаас хойш хоёр орны харилцаанд гарсан ахиц дэвшлийг дүгнэж, цаашид хамтын ажиллагааг өргөжүүлэх, бүс нутаг, олон улсын тавцанд хамтран ажиллах асуудлаар санал солилцлоо.
Энэ хугацаанд хоёр талын хүч чармайлтын дүнд улс төр, аюулгүй байдал, батлан хамгаалах салбарын харилцаа идэвхжиж, эрдэс баялаг, уул уурхайн салбарт бизнес, хөрөнгө оруулалтын хамтын ажиллагааны эхлэл сайн байгааг тэмдэглэлээ. Цаашид цөмийн эрчим хүч, уул уурхай, хөдөө аж ахуй, соёл боловсрол, эрүүл мэнд мөн шинжлэх ухаан, мэдээлэл технологийн салбар дахь хамтын ажиллагааг дэмжиж ажиллах, мөн нийгмийн хамгаалал, байгаль орчин болон орон нутаг хоорондын харилцаа холбоог хөгжүүлэхээр тохиролцлоо.
Айлчлалын үеэр болох хоёр орны бизнесийн чуулга уулзалт манай ажил хэрэгч хүмүүсийн хооронд амьд хэлхээ холбоо тогтох, бодитой хамтын ажиллагаа хөгжих чухал гараа болно гэдэгт итгэлтэй байна.
Манай хоёр орон бүс нутаг, олон улсын тавцанд амжилттай хамтран ажиллаж ирсэн уламжлалаа үргэлжлүүлж, цаашид мэдээлэл солилцож зөвлөлдөх, харилцан биенээ дэмжихээ дахин нотоллоо. Ялангуяа, Монгол Улс Ардчилсан орнуудын хамтын нийгэмлэгийг даргалах хугацаанд бүс нутагт ардчиллыг бэхжүүлэх үйлст хамтран ажиллахаар тохиролцлоо.
Айлчлалын үеэр Батлан хамгаалахын салбарт хамтран ажиллах тухай Монгол Улсын Засгийн газар, БНЭУ-ын Засгийн газар хоорондын хэлэлцээр, Монгол Улсын Үндэсний хөгжил шинэтгэлийн хороо, Энэтхэгийн Төлөвлөгөөний комиссын хооронд хамтран ажиллах тухай Санамж бичиг, мөн Монгол Улс, Энэтхэг Улсын хооронд сэтгүүлчид солилцох хөтөлбөрт тус тус гарын үсэг зурав.
Улаанбаатар хотод Мэдээллийн технологийн боловсрол, аутсорсингийн Монгол-Энэтхэгийн хамтарсан төв байгуулахад зориулж БНЭУ-ын Засгийн газраас Монгол Улсын Засгийн газарт олгохоор шийдвэрлэсэн 20 сая ам.долларын зээлийн хэлэлцээрийг ойрын хугацаанд байгуулахаар хоёр тал тохиролцлоо.
Монгол Улсын Засгийн газар, БНЭУ-ын Засгийн газар хооронд соёлын салбарт 2009-2012 онд хамтран ажиллах хөтөлбөрийн дагуу Монгол Улсаас БНЭУ-д нэг жилд суралцах оюутны тоог нэмэгдүүлэхээр боллоо.
Манай хүндэт зочин БНЭУ-ын Ерөнхийлөгч тэргүүтэй төлөөлөгчдийн айлчлал амжилттай үргэлжилж, Монгол оронд тавтай саатаж морилохыг дахин хүсье.
БҮГД НАЙРАМДАХ ЭНЭТХЭГ УЛСЫН ЕРӨНХИЙЛӨГЧ ЭРХЭМСЭГ ХАТАГТАЙ ПРАТИБХА ДЕВИСИНГХ ПАТИЛ ХЭВЛЭЛ, МЭДЭЭЛЛИЙН ТӨЛӨӨЛӨГЧИДТЭЙ УУЛЗАХДАА ХЭЛСЭН ҮГ
Эрхэмсэг ноёд, хатагтай нар аа,
Монгол Улсын Ерөнхийлөгч Ц.Элбэгдоржтой хийсэн яриа хэлэлцээ халуун дулаан, найрсаг дотно уур амьсгалд боллоо.
2009 оны 9 дүгээр сард Монгол Улсын Ерөнхийлөгч Ц.Элбэгдорж БНЭУ-д айлчлахад манай хоёр орны харилцаа хамтын ажиллагааны шинэ шатанд хүрсэн билээ. Монгол Улсын Ерөнхийлөгч Ц.Элбэгдоржийн БНЭУ-д хийсэн айлчлалаар хоёр орны харилцааг Иж бүрэн түншлэлийн түвшинд хүргэж өргөжүүлэхээр тохиролцсон тэрхүү эрч хүчинд тулгуурлан Монгол оронд хийж буй миний энэ удаагийн айлчлал хоёр орны цаашдын хамтын ажиллагааг бэхжүүлж, өргөжүүлэхэд оршиж байна.
Монголын Тулгар төрийн 2220 жилийн ой, Чингис хааны байгуулсан Их Монгол Улсын 805 жилийн ой, Монгол Улсын Үндэсний эрх чөлөөний хувьсгалын 100 жил ой хийгээд Ардын хувьсгалын 90 жилийн ойн түүхэн баяруудаа Монгол Улс ёслол төгөлдөр тэмдэглэж байгаа үед энэ удаагийн айлчлал давхцаж байгаад миний бие маш их бэлгэшээж байгаагаа ноён Ерөнхийлөгч Ц.Элбэгдоржид илэрхийлсэн.
Манай хоёр орныг өнө эртнээс холбож ирсэн соёлын болон шашны хэлхээ холбоо, эдгээр салбарууд дахь харилцааны уламжлалыг бататган бэхжүүлэх хэрэгтэй байна. Тухайлбал, бүс нутгийн хүрээнд боловсролыг, тэр дундаа Буддын гүн ухааны сургуулийг цэцэглүүлж байгаа Энэтхэгийн “Наландаг” Их сургуультай монголын тал харилцаагаа сэргээх хэрэгтэй байгаа талаар би онцлон дурдлаа.
Өнөөдөр манай хоёр оронд ардчилал, хууль ёс, шударга ёс, хүний эрхийг үнэт зүйлс болгон дээдэлж байгаа нь бидний нийтлэг ололт юм.
Ноён Ерөнхийлөгч Ц.Элбэгдоржтэй хийсэн өнөөдрийн яриа хэлэлцээ Монгол, Энэтхэгийн харилцаа, түүнчлэн хоёр орны ашиг сонирхолтой холбоотой бүс нутгийн болон олон улсын тулгамдсан өргөн хүрээтэй асуудлыг хөндсөн маш чухал уулзалт боллоо.
Монгол, Энэтхэгийн хамтарсан мэдээллийн технологи, боловсрол болон аутсорсингийн төвийг Улаанбаатар хотноо байгуулахад Энэтхэг Улсын Засгийн газраас 20 сая америк долларын зээл олгох болсныг миний бие нотлож байна.
Мөн Энэтхэг-Монголын хамтарсан сургууль байгуулах, Ражив Гандийн нэрэмжит Үйлдвэрлэл, урлалын сургууль, Важпайн нэрэмжит Мэдээлэл, холбооны технологийн төвийн сургалтын баазыг шинэчлэх чиглэлээр хамтран ажиллахаар тохирлоо.
Энэтхэгийн тал хоёр орны хооронд соёлын салбарт 2009-2012 онд хамтран ажиллах хөтөлбөрийн хүрээнд БНЭУ-ын Засгийн газрын тэтгэлгээр Энэтхэгт суралцах Монгол оюутны тоог жилд 50 хүртэл нэмэгдүүлэх, мөн Энэтхэгийн техник эдийн засгийн хамтын ажиллагааны хөтөлбөрт хамрагдагсдын тоог жилд 150-д хүргэхээр шийдвэрлсэнийг мэдэгдлээ. Цаашид Энэтхэг Улс Монгол Улсын боловсон хүчний чадавхийг дээшлүүлэхэд хувь нэмрээ оруулсаар байх болно.
Хэлэлцээний дараа Энэтхэг Улсын Төлөвлөгөөний комисс, Монгол Улсын Үндэсний хөгжил шинэтгэлийн хорооны хооронд хамтран ажиллах тухай Санамж бичигт гарын үсэг зурав. Энэтхэг Улс нь төлөвлөлт, боловсруулалтын чиглэлээр хангалттай туршлагатай орон бөгөөд Монгол Улстай туршлагаасаа хуваалцахдаа таатай байна.
Хоёр тал Батлан хамгаалахын салбарт хамтран ажиллах хэлэлцээрт гарын үсэг зурлаа. Тус салбарт Энэтхэг Улс, Монгол Улстай хамтын ажиллагаагаа улам өргөжүүлэхээ илэрхийлье.
Түүнчлэн миний бие Ерөнхийлөгч Ц.Элбэгдоржтой цацраг идэвхт эрдэс болон цөмийн эрчим хүчийг энхийн замаар хамтран ашиглах талаар санал солилцов. Хоёр улсын хоорондын харилцааг өргөжүүлэн хөгжүүлэх үүднээс агаарын замын хамтын ажиллагааг шинээр бий болгох тал дээр хамтран ажиллахаар зөвлөлдлөө.
Монгол Улс, Энэтхэг Улсын хооронд сэтгүүлчид солилцох хөтөлбөрт гарын үсэг зурсан нь цаашид олон монгол сэтгүүлчдийг Энэтхэг Улсад ажиллуулах, мөн Энэтхэгийн сэтгүүлчдээр Монгол орныг сурвалжлуулахыг зорьж байна.
Монгол Улс саяхан Ардчилсан орнуудын хамтын нийгэмлэгийг даргалах болсон билээ. Энэ хугацаанд БНЭУ-ын зүгээс бүхий л бололцоогоороо Монгол Улсад туслаж, дэмжиж, хамтран ажиллахаа амласан.
Монгол Улсын зүгээс Энэтхэг Улсыг НҮБ-ын Аюулгүйн зөвлөлийн байнгын гишүүнээр нэрээ дэвшүүлэхэд дэмжсэнд талархал илэрхийлье.
Миний энэ удаагийн айлчлал Монгол, Энэтхэгийн цаашдын харилцаанд чухал ач холбогдолтой боллоо гэж үзэж байна. Энэтхэг, Монголын харилцааг цаашид өргөжүүлэн хөгжүүлэхэд хоёр улсын Засгийн газар хамтран ажиллах болно.
Монгол Улсын Ерөнхийлөгч Цахиагийн Элбэгдорж БНЭУ-ын Ерөнхийлөгчийг халуун дотноор хүлээн авсанд гүн талархал илэрхийлэх ялдамд, Монгол Улсын Ерөнхийлөгчийг Энэтхэг Улсад дахин айлчлахыг урьж байна.
Баярлалаа.
