Ерөнхийлөгч хааны ордны туурийн малталтын асуудлыг нээлттэй хэлэлцүүлгээр шийдэх нь зүйтэй гэв
Монгол Улсын Ерөнхийлөгч Ц.Элбэгдорж Монгол-Германы хамтарсан “Хархорин” археологийн багийн төлөөлөгчдийг төрийн ордонд өнөөдөр хүлээн авч уулзав.
Германы археологийн хүрээлэнгийн судлаач Я.Беманн хоёр орны Ерөнхийлөгчийн ивээл дор өнгөрсөн хоёр жил хагаст дэвшилт техник, технологи ашиглан агаараас зураг авч, хэмжилт хийн судалгаагаа явуулсан талаараа яриад, энэхүү төслийг цаашид үргэлжлүүлэхэд шийдүүштэй асуудлууд байгааг танилцууллаа. Тухайлбал их хааны ордны туурь Хархорин хотын гол хэсэг, Эрдэнэзуу хийдийн хашаан дотор байх магадлалтай гэж үзэж буй аж. Мөн буддын шашин 13 дугаар зуунд төрийн шашны хэмжээнд байжээ гэсэн таамаглал дэвшүүлжээ.
Монголын эртний нийслэл Хархорин хотод археологийн хамтарсан малтлага амжилтай явагдаж буйд сэтгэл хангалуун байгаагаа Ерөнхийлөгч илэрхийлээд эл төсөл нь 13 дугаар зууны үеийн Монголын түүхийг тодруулах, судлахад чухал ач холбогдолтой бөгөөд Монголын эзэнт гүрний нийслэл Хархорин хот тэр үеийн дэлхийн томоохон худалдаа, арилжааны төв байсны хувьд энэ нь дэлхий нийтийн түүхэнд чухал судалгаа болохыг тэмдэглэв. Ерөнхийлөгч цааш нь хэлэхдээ “Хархорин төсөл нь өргөжин тэлж, эртний нүүдэлчдийн өлгий нутаг Орхоны хөндийг хамарсан томоохон хэмжээний судалгааны ажил болж буй юм байна. Цаашид төслийг эцсийн үр дүнг гартал урт хугацаанд үргэлжлүүлэхийг дэмжиж байна” гэж хэллээ. Гэхдээ Ерөнхийлөгч энэ таамаглалуудаа баталгаажуулах малталтын асуудлыг ард нийтээр нээлттэй хэлэлцүүлж шийдэх нь зүйтэй гэдгийг онцлон анхааруулав.
Ерөнхийлөгч хааны ордны туурийн малталтын асуудлыг нээлттэй хэлэлцүүлгээр шийдэх нь зүйтэй гэв
