Ерөнхийлөгч Ц.Элбэгдорж Архангай аймагт ажиллаад буцах замдаа тус аймгийн Хотонт суманд ирж, нутгийн иргэдтэй уулзлаа. Тус нутагт цас ихтэй ч, дулаахан сайхан хавар болж байна. Хотонт сум 4300 гаруй хүн амтай. Энэ жил 107 мянган мал тоолуулсан бөгөөд малын хорогдолгүй байна. Өнгөрсөн жилээс сургамж авч зундаа бэлтгэл сайн хийж, өвсөө базаасан учраас хаваржилт сайхан болж байна хэмээн орон нутгийн удирдлага ярив.
Хөдөөгийн иргэдийн мэдээлэл авах суваг олон болж, үйл явдал, шинэ шийдвэрүүдийг цаг тухайд нь авдаг болжээ. Очсон , уулзалт хийсэн газар бүрт иргэд Ерөнхийлөгчийн хийж хэрэгжүүлж буй бодлого, үйл ажиллагааг дэмжиж байгаагаа илэрхийлж, санал хүсэлтээ хэлж байлаа. Тухайлбал Ерөнхийлөгчийн санаачилгаар байгуулагдсан Иргэний танхимын загварыг орон нутагт бий болгож, сумын хүрээнд хөндөгддөг аливаа асуудлыг иргэдийн саналаар шийддэг байх нь зөв хэмээн хэлж байлаа.
Дээд болосвролын санхүүжилт, оюутны тэтгэлэг тэтгэмж, нийгмийн баталгааны хуулийн тухайд оюутанд өөрт нь цалин олгох асуудлыг бүрэн дүүрэн дэмжиж байгаагаа олон хүн илэрхийлсэн. “Улаанбаатарт сурч буй манай хүүхдүүд ахуйн хүнд нөхцөлд сурч байна гэж Ерөнхийлөгч таны хэлсэнтэй бид санал нэг байна. Хоол, номны мөнгөтэй болоод ирэхээр оюутнууд зөвхөн сурахдаа анхаарна. Дагаад дээд боловсролын чанар ч сайжирна. Энэ хуулийг батлуулахын төлөө ажиллаарай гэж хүсье” хэмээн саналаа хэлсэн иргэн ярив.
Оюутолгой, Тавантолгойн төслүүд, эх орны хишиг, сонгуулийн хууль, тэтгэвэр тэтгэмжийн хууль, ажлын байр, шударга ёс гэхчилэн бусад орон нутагт хөндөгдөж байсан асуудлууд ч энэ үеэр яригдлаа.
Энэ уулзалтад зэргэлдээх Хашаат, Өгийннуур, Цэнхэр, Төвшрүүлэх сумдаас иргэд иржээ. Ерөнхийлөгч уулзалтаа өндөрлөөд, Өвөрхангай аймгийн Хархорин сумыг зорилоо.
