Монгол Улсын Ерөнхийлөгч Цахиагийн Элбэгдорж энэ сарын 5, 6-ны өдрүүдэд баруун аймгуудад ажиллалаа.
Хур тунадас багатай, гандуу, нутгийн зарим хэсгээр цөлжилт эрчимтэй явагдаж байгаагаас мал хорогдож байгаа тухай очсон аймаг бүрт орон нутгийнхан ярьж байлаа.
Зөвхөн Ховд аймагт л гэхэд энэ жил олон тооны мал хорогдчихоод байна. Энэ жил өвсний гарц муу байсан , бас сүүлийн жилүүдэд бэлчээрийн даац муудсан зэрэг нь ийнхүү мал ихээр хорогдоход хүргэж байна гэж аймгийн Засаг дарга Г.Нямдаваа ярилаа.
Малын тоо хорогдож, нэг малаас гарч байгаа ашиг шим муудаад ирэхээр, хүмүүс газар тариалан руу орох нь ихэсчээ. Орон нутгийн удирдлага эдийн засгийн хүндрэлийг даван туулах хөтөлбөр боловсруулж, энэ хөтөлбөрийн хүрээнд тариалан эрхэлдэг өрх бүрт 75 кг үрийн төмс өгсан байна.
Мөн таван зуугаас дээш малтай малчдын дэргэд туслах малчин ажиллуулах журмаар ажилгүйдлийг шийдвэрлэж байгаа гэнэ.
Аймгийн төвийн ажилгүй залуусыг туслах малчин болгож, бас тариалан эрхлэлтийг дэмжсэний дүнд 600 түр ажлын байр шийдэж чадсан байна.
Өнгөрсөн жил хөлдөх аюулд ойрхон өвөлжсөн ховдчууд энэ жил эртнээс өвөлжилтийн асуудалд санаа тавьж байна. Аймгийн дулааны станцын зуухыг засварлахын тулд 300 сая төгрөг шаардлагатай гэсэн тооцоог хийжээ. Гэвч энэ хөрөнгө төсөвт суугаагүй юм байна.
Говь-Алтай аймагт ч мөн зуншлага тааруу байна. Нутгийн 60-80 хувь нь гандуу, 6 суманд байдал хүнд байна гэж аймгийн Иргэдийн төлөөлөгчдийн хурлын дарга Ш.Эрдэнэбат танилцууллаа.
Арваадхан услалтын систем ажиллаж, газар тариалан гэхээр юм бараг байхгүй болжээ.
Үүлэнд нөлөөлж зориудаар бороо оруулахыг оролдсон ч, хур тунадас орохгүй хүйтрээд шуураад өнгөрдөг тул “буудах нь” үр дүн муутай байдаг юм байна гэсэн дүгнэлтэнд нутгийн иргэд хүрчээ.
Нутгийн иргэд тэнгэр лусыг аргадаж, уул овооны тахилгыг ойр ойрхон хийдэг болох тухай ярих болжээ.
Говь-Алтайчууд мөн л ирэх өвөл эрчим хүчний хүндрэлтэй нүүр тулах вий гэж эмээж байна.
Тайширын усан цахилгаан станцын усны түвшин хүрэлцэхгүйн улмаас бүрэн хүчин чадлаар ажиллах боломжгүй болж, аймгийн төвийн 2009-2010 оны өвөлжилтийн байдал хүндрэхээр болоод байгаа тухай аймгийн удирдлага ярьж байна.
Энэ жил Говь-Алтай аймагт эрчим хүчний алдагдлын санхүүжилтыг 1.8 тэрбум төгрөгөөр бууруулж баталжээ.
Энэ зун аймагт хийгдэх улсын болон орон нутгийн хөрөнгө оруулалтын зарим томоохон ажлууд зогсоход эрчим хүчний хүрэлцээгүй байдал нөлөөлж байна. Иймд аймгийн цахилгаан эрчим хүчний хангалтын асуудлыг шийдэхэд шаардлагатай байгаа 1.8 тэрбум төгрөг, мөн дизель станцын үнэ болох 500 сая, нийт 2.3 тэрбум төгрөгийг яаралтай шийдвэрлүүлэхэд дэмжлэг үзүүлэхийг Монгол Улсын Ерөнхийлөгчөөс хүсч байлаа.
Монгол Улсын Ерөнхийлөгч Ц.Элбэгдорж мөн Баянхонгор аймгийн байдалтай танилцсан. Үйлдвэржилтийг дэмжих хөтөлбөрийн хүрээнд төлөвлөсөн ажлууд хөрөнгө санхүүжилт хийгдэхгүй байгаагаас дутуу биелэлттэй байгаа гэж аймгийн Иргэдийн төлөөлөгчдийн хурлын дарга Д.Батжаргал хэллээ.
Өвөрхангай –Баянхонгор чиглэлийн хатуу хучилттай 210 км замыг барих санхүүгийн эх үүсвэргүй байгаа юм байна.
100 километрт нь Засгийн газраас дараа нөхөн төлөх нөхцөлтэйгөөр тендер зарласан боловч, гүйцэтгэгч орж ирээгүй байна. Баянхонгор аймагт хайгуул, олборлолт хийх лиценз авсан алтны компанууд нутгийн төсөвт “нэмэр болдоггүй” тухай орон нутгийнхан хэлж байна.
Орон нутагт эдийн засгийн эрх мэдлий нь тодорхой хэмжээгээр өгдөг байвал зарим асуудлаа дээшээ харж суулгүй өөрсдөө шийдчихдэг болмоор байна гэж Засаг дарга Г.Амарсанаа ярьсан.
Ер нь хөдөө орон нутагт эрх мэдлий нь өөрсдөд нь олгох , эдийн засгийн шинжтэй зарим асуудлуудаа дээрээс шийдвэр харж суулгүй шийддэг болох хүсэлтэй байгаагаа хэлж, “Орон нутгийн хөгжлийг дэмжигч Ерөнхийлөгч байх” бодлогыг дэмжиж байгаагаа баруун аймгийн иргэд илэрхийлж байлаа.
