Канадын элчин сайд жуух бичгээ өргөн барив
Монгол Улсын Ерөнхийлөгч Ц.Элбэгдоржид Канад Улсаас Монгол Улсад суух Онц бөгөөд Бүрэн эрхт элчин сайд Грегори Гоулдхоук итгэмжлэх жуух бичгээ өнөөдөр өргөн барив.
Дараа нь Ерөнхийлөгч Ц.Элбэгдорж элчин сайдыг хүлээн авч уулзан хоёр орны харилцаа, хамтын ажиллагааны асуудлаар ярилцан амжилт хүслээ.
Ерөнхийлөгч хэлэхдээ, Канад нь БНХАУ-ын дараа орж буй хоёр дахь том хөрөнгө оруулагч болохыг дурдаад Монгол Улс Канадтайуул уурхайгаас гадна хүнс, хөдөө аж ахуй, хөнгөн үйлдвэр, зам тээвэр, аялал жуулчлал, байгаль орчны хамгаалал, боловсрол зэрэг салбарт хамтын ажиллагаагаа өргөжүүлэх сонирхолтой байгааг тэмдэглэлээ.
Элчин сайд Грегори Гоулдхоук Хөрөнгө оруулалтыг хөхиүлэн дэмжих, харилцан хамгаалах тухай хэлэлцээрийг байгуулах, хоёр орны харилцаа, хамтын ажиллагааг хөгжүүлэх чиглэлээр хийх ажил их байгааг дурдаад энэ чиглэлээр хүч чармайлт гаргахаа хэлэв.
Тэрээр Монгол Улсад биечлэн ирж сууж байгаа Канадын хоёр дахь элчинсайд юм байна. Грегори Гоулдхоук 1954 онд Канадад төрж, Карлетоны их сургуулийг улстөр судлалаар төгссөн байна. Энэ сургуульдаа 1979 онд олон улсын харилцаагаар магистр, 1981 онд Вестерн Онтариогийн их сургуульд бизнесийн удирдлагаар магистр хамгаалжээ.
Грегори Гоулдхоук Канадын Бүс нутгийн аж үйлдвэрийн хөгжлийн яам, Гадаад хэрэг, олон улсын худалдааны яам, Грек, Австрали, АНУ, Тайландад Элчин сайдын яаманд ажиллаж байсан туршлагатай дипломатч юм. Тэрээр англи, франц, грек, тай хэлтэй, эхнэр, охины хамт амьдардаг ажээ.
Канадын элчин сайд жуух бичгээ өргөн барив
