Монгол Улсын Ерөнхийлөгчийн зарлигаар Монгол Улсын Үндэсний статистикийн хороог Хөдөлмөрийн гавьяаны улаан тугийн одонгоор шагналаа. Одонг Ерөнхийлөгчийн Тамгын газрын дарга П.Цагаан Үндэсний статистикийн хорооны туганд зүүж өгөв.
Ерөнхийлөгчийн зарлигт “Бүртгэл, статистикийн үйл ажиллагааны өнө эртний уламжлалтай Монгол Улсад орчин цагийн статистикийн тогтолцоог байгуулан хөгжүүлж, нийгэм, эдийн засгийн байдлыг он цагаар тодорхойлж, улс орныхоо хөгжлийн түүхийг тоогоор бичиж буй үе үеийн статистикчдийн хөдөлмөр, хичээл зүтгэлийг үнэлэн Үндэсний статистикийн хороог Монгол Улсын төрийн дээд шагнал Хөдөлмөрийн гавьяаны улаан тугийн одонгоор шагнасугай” гэжээ.
Ерөнхийлөгчийн Тамгын газрын дарга П.Цагаан одон гардуулах үеэр хэлсэн үгэндээ “Та бүхний энэ өглөөний түмэн амар амгаланг айлтгая. Монгол Улсын Ерөнхийлөгч зарлиг гаргаж монголчууд үндэсний тусгаар тогтнолоо сэргээн мандуулсны 103 жилийн ой, нийслэлийн 365, ардчилсан хөдөлгөөн өрнөсний 25 жилийн ой, Үндэсний статистикийн хорооны 90 жилийн ой давхацсан эдгээр үйл явдлыг тохиолдуулан Монгол Улсын Үндэсний статистикийн хороог Хөдөлмөрийн гавьяаны улаан тугийн одонгоор шагналаа.Энэ одон нь тус байгууллагад ажиллаж ирсэн үе үеийн статистикчид, одоо ажиллаж байгаа бүх хүмүүст оногдож байгаа шагнал юм.
Монгол Улс хүний эрхшээлд 200 гаруй жил талхигдсаны эцэст 103 жилийн тэртээ тухайн үеийн олон улсын цаг үеийн байдлыг соргогоор мэдэрч, харийн хааны ширээ хэлтийсэн цаг мөчийг ашиглан олон монголчууд ар Монголын шашны тэргүүн Богд хааныг тойрон хүрээлж, үндэсний үзэл санаа, эрх чөлөө, тусгаар тогтнолын үзэл дор нэгдэж чадсаны үр дүнд 1911 оны цагаагчин гахай жил үндэсний тусгаар тогтнолоо сэргээн мандуулсан.
Үндэсний түүхийн музейд өчигдөр бид Монгол Улсын анхны Ерөнхий сайд, Сайн ноён хан Төгс-Очирын Намнансүрэнгийн Оросын эзэнт улсад хийсэн төрийн айлчлалын 100 жилийн ойд зориулсан түүхэн гэрэл зургийн үзэсгэлэн, номын нээлтийг хийлээ. Манай өвөг дээдэс эрх чөлөө, тусгаар тогтнолоо ямар хүнд хэцүү нөхцөлд сэргээж чадсан юм бэ гэдгийг 100 жилийн өмнөх энэ айлчлалын түүхээс харж болно. Түүнээс хойш Монгол Улс ямагт урагш ахиж дэвшиж ирсэн.
Аливаа төр, засаг шийдвэр гаргахад статистик чухал. Манай өвөг дээдэс Хубилай хааны үеэс цэргээ, малаа тоолдог, статистикийн үнэ цэнийг асар их мэддэг, маш их зохион байгуулалттай ард түмэн байсан. Орчин үеийн статистикийг хөгжүүлэхэд танай байгууллагын үе үеийн ажилтнууд түүхэн үүрэг гүйцэтгэж ирсэн. Энэ шагнал бол та бүгдийн 90 жилийн хугацаанд хийж гүйцэтгэж ирсэн ажлын шагнал юм. Мөн тал нь ирээдүйд хийж гүйцэтгэх ажлын шагнал юм гэж ойлгох хэрэгтэй.
Монгол Улсын Ерөнхийлөгч Ухаалаг төр рүү шилжих тухай санаачилга гаргаж, энэ ажил алхам алхмаар урагшилж байна. Ухаалаг төр гэдэг бол судалгаанд суурилсан шийдвэр гаргадаг байх ёстой гэсэн үг. Судалгаа бол статистикт суурилдаг. Статистикийн тоо баримт үнэн зөв, шуурхай, хүртээмжтэй байх хэрэгтэй. Ирэх 90 жилд Монгол Улс Ухаалаг төртэй, өндөр хөгжсөн улс орон болох байх. Үүнд статистикчид, статистикийн байгууллагын үүрэг роль үнэлж баршгүй их юм.
Та бүхэн орчин үеийн мэдээллийн технологийг ашиглаж, улс орныхоо эрх ашгийг харгалзаад энэ ажлаа улам гүнзгий сайн, шуурхай, хүртээмжтэй, санаачлагатай хийгээрэй. Олон түмний итгэл найдварыг хүндэтгэж улам сайн ажиллаарай. Статистик бол статик биш динамик байх ёстой. Улс орон динамик хөгжиж байгаа учраас та бүхэн амжилтаа улам чамбайруулж, хөгжилд хөтөлсөн байгууллага болоорой. Улс орныхоо хөгжилд үнэтэй хувь нэмэр оруулахын ерөөлийг өргөн дэвшүүлж, та бүхэнд дахин баяр хүргэе” гэлээ.
Тэрээр мөн энэ үеэр Ерөнхийлөгчийн Тамгын газраас эрхлэн хэвлүүлсэн Монголын түүхийн 6 боть номын дээжээс тус байгууллагад бэлэглэсэн юм.
