Зэс хайлуулах үйлдвэрийн ТЭЗҮ-ийг хамтран хийнэ
Бүгд Найрамдах Финланд Улсад айлчилж буй Монгол Улсын Ерөнхийлөгч Ц.Элбэгдоржийг дагалдан 30 гаруй бизнесмен, хувийн хэвшлийн байгууллагын төлөөлөл ажиллаж байна. Тэд ойн аж ахуй, мод үржүүлэг, мэдээллийн технологи, уул уурхайн чиглэлээр үйл ажиллагаа эрхэлдэг компануудын төлөөлөл, ижил төрлийн бизнесийн байгууллагуудтай холбоо тогтоох, технологи судлах, гэрээ хийх зорилготой юм.
Хельсинки хотноо Ерөнхийлөгчийн айлчлалын үеэр Монгол-Финландын бизнес уулзалтыг зохион байгууллаа. Тус уулзалтад финландын талаас 60 гаруй бизнесмен оролцов.
Уулзалтыг нээж Монгол Улсын Ерөнхийлөгч үг хэлэхдээ хоёр орны эдийн засгийн харилцааг сэргээхэд энэхүү бизнес уулзалт чухал ач холбогдолтой болохыг онцоллоо.
Мөн “Нээлттэй засаглалтай, хөрөнгө оруулагчдад таатай эрх зүйн орчинтой, бүс нутагтаа сонирхол татахуйц татварын бодлоготой Монгол Улсад хөрөнгө оруулах нь бизнесийн хувьд зөв бөгөөд ашигтай байх нь гарцаагүй” гэсэн юм.
Энэ үеэр Финланд Улсын Outotec Оyj компани Монголын Үндэсний хөгжлийн корпорацитай Сайншанд хотод баригдахаар төлөвлөж буй зэс хайлуулах үйлдвэрийн техник, эдийн засгийн үндэслэлийг хийж гүйцэтгэх Хамтран ажиллах болон технологийн түншлэлийн гэрээнд гарын үсэг зурлаа.
Тус үйлдвэр нь ойролцогоор жилд 2.0 сая тонн зэсийн баяжмалыг хайлуулж жилд 520,000 тонн катодын зэс, 25 тонн алт цэвэршүүлэх үйлдвэрийг 1 тэрбум ам.долларын хөрөнгө оруулалттайгаар барихаар, зэсийн баяжмалыг Оюу Толгой ХХК-иас нийлүүлэхээр төлөвлөж байна. Outotec Оyj компанийн төлөөлөн удирдах зөвлөлийн гишүүд болон хувьцаа эзэмшигч Rio Tinto компанийн төлөөлөгч нар дээрх гэрээнд гарын үсэг зурахад байцав. Мөн Финландын Экспортын зээлийн агентлаг Finnvera plc болон Commerzbank AG нар зээлийн баталгаа гаргах, зээлийн санхүүжилт хийх сонирхлоо илэрхийлсэн захидалд гарын үсэг зурав. Уг зэсийн хайлуулах үйлдвэр ашиглалтад орсноор Монгол Улс зэсийг олборлож боловсруулах иж бүрэн технологитой болж Чилийн дараа орох дэлхийн хоёр дахь том үйлдвэрлэгч хэмээгдэх үндэс сууриа тавих болно гэж гэрээнд гарын үсэг зурсан талууд мэдэгдлээ.
Зэс хайлуулах үйлдвэрийн ТЭЗҮ-ийг хамтран хийнэ
