Судалгаа шинжилгээний байгууллагуудтай танилцав
Монгол Улсын Ерөнхийлөгч Ц.Элбэгдорж Финланд Улсад айлчлах үеэрээ тус улсын Газар зүйн судалгааны байгууллага болон Ан агнуур, загасны аж ахуйн судалгааны хүрээлэнгийн үйл ажиллагаатай танилцсан юм.
Газар зүйн судалгааны байгууллага нь 1885 оноос үйл ажиллагаагаа эхэлсэн, дэлхийн тухай мэдээллийг хадгалдаг, Европтоо томоохонд орох газар юм. Үйлдвэрлэлийн зориулалт бүхий эрдэс, барилгын материал, хөрсний ус зэрэг түүхий эд, нөөц баялаг, тэдгээрийг ашиглах боломжийг судалдаг юм байна. Баялгийг ашиглах боломж, менежмент, мэдээллээр үйлдвэрүүдийг болон гадаад орны бусад байгууллагуудыг хангадаг ажээ.
Тус байгууллагын ерөнхий захирал Элиас Экдаль “Байгаль орчинд гарч буй өөрчлөлт хүний үйл ажиллагаанаас болж уу, эсвэл геологийн үйл явц уу гэдгийг мэргэжлийн хувьд тогтоох нь манай үйл ажиллагааны гол чиглэл. Бид энэ чиглэлээр гадаадын бусад улсаас захиалга авч, судалгаа хийж байна” гэж хэлэв.
Финландын газар зүйн судалгааны байгууллага 2 жилийн өмнөөс Монгол Улсын Геологийн төв лабораторид 500 мянган еврогийн өртөг бүхий төсөл хэрэгжүүлжээ. Төсөл амжилттай хэрэгжиж байгаа гэж финландын эрдэмтэн судлаачид ярилаа.
Ан агнуур, загасны аж ахуйн судалгааны хүрээлэн нь улсынхаа зэрлэг ан амьтдын тархалт, нөөцийн талаар мэдээд бүрдүүлж, үнэлэх, тэдгээрийг ашиглах, загас , ан агнуур, цаа бугын аж ахуй эрхлэхэд дэмжлэг үзүүлэх гол зорилготой төрийн байгууллага юм.
Тус хүрээлэнгийн захирал Ееро Хелле болон судалгааны менежер, цаа бугаар дагнаж судалгаа хийдэг нэрт эрдэмтэн Маури Ниеминен нар цаа бугын судалгааны ажлынхаа талаар товч танилцуулав.
Хүрээлэнгийн цаа бугын судалгааны нэгж нь 35 ажилтантай. Дэлхийн цаа буга хариулж амьдардаг үндэстнүүдтэй биечлэн уулзаж, судалгаа хийж, цаа бугын үржил болон байгалийн тэнцвэрт байдал, эдийн засаг, үндэстний цөөнхийн оршин тогтнолд хэрхэн нөлөөлж байгааг судалдаг дэлхийд ховор судалгааны төв юм.
Дэлхий дээр 7 төрлийн цаа буга байдаг, тэжээмэл нь 2.5 сая, зэрлэг нь 4.5 сая орчим гэсэн тооцоог тус төвөөс гаргажээ. ОХУ, Скандинавын орнууд цаа бугын тоогоороо дэлхийд тэргүүлж байна.
Финланд Улсын хувьд цаа буга нь эдийн засгийн чухал хөшүүрэг болдог. Тухайлбал сүүлийн жилүүдэд цаа бугыг үзэхээр ирж байгаа жуулчдын тоо эрс нэмэгдэх болжээ. Түүнчлэн жил бүр 20 сая тонн цаа бугын махыг зах зээл дээр борлуулдаг тухай танилцууллаа.
“Танай улсын цаа буга болон цаатан үндэстнүүдийн талаар бид тусгайлан судалгаа хийхээр төлөвлөж байгаа. Монголын цаа бугын үржүүлэг, хамгааллын асуудлаар бид хамтран ажиллахад бэлэн” хэмээн эрдэмтэн Маури Ниеминен хэлэв.
Энэхүү уулзалтын үр дүнд финландын эрдэмтэн судлаачид Монголд судалгаа хийж, улмаар манай цаа бугын үүлдрийг сайжруулах зорилгоор скандинавын цаа бугыг монголд нутагшуулах , гүн хөлдөөсөн үр нийлүүлэх төслийг хоёр улсын Ерөнхийлөгчийн ивээл дор хийхээр тохиролцлоо.
Мөн энэ өдөр Монгол Улсын Ерөнхийлөгч Хельсинкийн их сургуулийн Алтай судлалын болон Финланд-Монголын нийгэмлэгийн төлөөлөгчидтэй уулзаж, судалгаа шинжилгээний ажил хамтран хийх, судлаачид солилцох талаар ярилцав.
Ийн Монгол Улсын Ерөнхийлөгч Цахиагийн Элбэгдоржийн Бүгд Найрамдах Финланд Улсад хийсэн албан ёсны айлчлал өндөрлөж, дагалдан яваа хүмүүсийнхээ хамт Данийн Вант Улс руу мордлоо.
Судалгаа шинжилгээний байгууллагуудтай танилцав
