Монголын тулгар төрийн 2220 жилийн ойг тэмдэглэх тухай
Манай эриний өмнөх 209 онд Модун шаньюй Төв Азид нутаглах нүүдэлчин аймгуудыг байлдан дагуулж нэгтгэснээр нүүдэлчдийн анхны төр улс болох хүчирхэг Хүннү гүрэнг байгуулсан билээ. Хүннү гүрэн Төв Азийн өргөн уудам нутаг дэвсгэрт үе үеийн монгол угсаатны амьдран буй газар нутгийг эзлэн оршиж байжээ.
Гурван зуу гаруй жил оршин тогтносон тус улс нүүдэлчдийн дунд төрт ёсны их уламжлалыг бий болгосон. Хүннүчүүд улс гүрнээ гурван гарт хуваан, бүгд хорин дөрвөн түмтийн ноён тохоон томилсон бөгөөд аравтын тогтолцоонд үндэслэн цэрэг -засаг захиргааны байгуулал хэрэгжүүлсэн байна. Энэ нь Чингис хааны байгуулсан Их Монгол Улсын үндэс болсон юм.
Монголчуудын өвөг дээдэс бол Хүннү нар болой, бид их Модун хааны түүх, уламжлалыг авч яваа хэмээн Эзэн богд Чингис хаан захиж үлдээсэн байдаг.
Хүн ардынхаа үндэсний ухамсар, эх түүхийн бахархал, тэмүүллийн үзэл санааг төлөвшүүлэх, монгол төрийн үндсийг улам бэхжүүлэх, эртний дэлхий дахины түүхийн үйл явцад, түүний дотор Евразийн олон үндэстний түүхэнд гүнзгий ул мөр үлдээсэн бидний өвөг дээдэс болох Хүннүчүүдийн болон Монголын тулгар төрийн буурал түүх шастир, өв соёлыг судалж сэргээх, батжуулах зорилгоор эрдэмтэн судлаачид, иргэд, байгууллагаас гаргаж буй саналыг дэмжиж Монгол Улсын Үндсэн хуулийн гучиндөрөвдүгээр зүйлийн 1 дэх заалтыг баримтлан ЗАРЛИГ БОЛГОХ нь:
1. Монголын тулгар төрийн 2220 жилийн ойг 2011 онд төр ёсны их баяр болгон ёслон тэмдэглэсүгэй.
2. Монголын тулгар төрийн 2220 жилийн ойг угтаж тусгай хөтөлбөр хэрэгжүүлэх, ойг тэмдэглэх ажлыг удирдан зохион байгуулах Үндэсний хороог байгуулан ажиллахыг Монгол Улсын Засгийн газар (Ерөнхий сайд С. Батболд) - т чиглэл болгосугай.
3. Түүхт ойг угтаж хэрэгжүүлэх Тусгай хөтөлбөрийн агуулгад:
а.Түүхийн ой санамжийг бүрдүүлэх, өвлүүлэх, хадгалах үүднээс "Дэлхийн нүүдэлчдийн түүх, соёлын төв" (дэргэдээ хүүхдийн "Тэмүүжин" цэнгэлдэх хүрээлэн бүхий) цогцолборыг үе шаттайгаар барьж байгуулах;
б. Монголын тулгар төрийн түүхийг үе улираан судлах, Төв Азийн нүүдэлчдийн соёл иргэншил, Хүннү судлалыг гүнзгийрүүлж олон улсын эрдэм шинжилгээний хурал, семинар, судалгаа шинжилгээний экспедиц зохион байгуулах;
в. Монгол төрийн үүсэл, ёс, ёслол, хүндэтгэл уламжлалыг өнө эртнээс өдгөө хүртэл нэгтгэн судлах, ном бүтээх, шинжлэх ухаан, урлаг, уран сайхны бусад олон төрлийн бүтээл туурвих санаачлагыг дэмжих;
г. Ойг Төв Азийн улс түмнүүд болон гадаад орнуудад өргөн сурталчлах, ЮНЕСКО-гоор дэмжүүлэх зэрэг арга хэмжээг багтаан оруулах нь зүйтэй гэж үзсүгэй.
4. Шинэ зууны хоёр дахь арван жилийн эхэнд тохиож буй их ойг угтаж улс үндэстнийхээ өнгөрсөн, одоо, ирээдүйг эрхэмлэх сэтгэлээр түүх соёлоо бадраан мандуулах идэвх, бүтээлч санаачлагаа дайчлахыг үндэс угсаагаа шүтэгч монгол хүн бүрт хандан уриалсугай.
МОНГОЛ УЛСЫН ЕРӨНХИЙЛӨГЧ МОНГОЛ УЛСЫН ЕРӨНХИЙ САЙД
Ц.ЭЛБЭГДОРЖ С.БАТБОЛД
