Мөн өнөөдөр Шинэ Зеланд улсаас Монгол улсад суух Онц бөгөөд Бүрэн эрхт Элчин сайд Карл Уоркер Монгол улсын Ерөнхийлөгчид итгэмжит жуух бичгээ барилаа.
Ерөнхийлөгч Элчин сайдыг хүлээн авч уулзах үеэрээ Шинэ Зеланд улс Монгол оронд ардчилсан хөдөлгөөн өрнөж байсан үеэс эхлэн тусалж дэмжиж байсныг онцлон дурдаад тус улсаас Монголын боловсон хүчнийг бэлтгэх, тэр дундаа төрийн албан хаагчдын англи хэлний боловсрол мэдлэгийг дээшлүүлэхэд чухал хувь нэмэр оруулж ирснийг тэмдэглэв.
Цаашдаа хоёр орны хамтын ажиллагааг хөдөө аж ахуй, эрчим хүчний үйлдвэрлэлийн салбарт хөгжүүлэх бололцоо байгааг мөн хэллээ.
Элчин сайд ноён Карл Уоркер хариу хэлэхдээ, хоёр улс нь хүн амын тоо болон газар нутгийн хэмжээний хувьд ижил боловч Монгол улсын түүх илүү баялаг урт удаан хугацааных байдаг бол манай орон харьцангуй шинэ түүхтэй гэж тэмдэглээд, 1990-ээд оны Ардчилсан хувьсгалаас хойш Монголд үлэмж их өөрчлөлт, хөгжил дэвшил гарсан гэлээ.
Мөн тэрээр дэлхий нийтэд нүүрлээд байгаа санхүүгийн хямралаас Монгол орон хэрхэн гарах бололцоотой байгааг асууж сонирхов.
Ерөнхийлөгч Ц.Элбэгдорж, санхүүгийн хямралаас гарах Засгийн газрын хөтөлбөрийг баталж хэрэгжүүлж байгааг дурдаад, энэхүү хямралаас гарахад уул уурхайн томоохон ордуудыг ашиглах асуудал чухал байгаа бөгөөд энэ чиглэлийн гэрээ хэлэлцээрийн асуудал яригдаж байгаа гэж хэллээ.
