Монгол Улсын Хууль зүй, дотоод хэргийн яам “Монголын хууль тогтоомжийн түүхэн эмхтгэл /1206-2009 он/ 16 боть бүтээлийг “Үндэсний бүтээмжийн дээд шагнал –Төрийн гэрэгэ”-д нэр дэвшүүлж, холбогдох материалыг Ерөнхийлөгчийн Тамгын газарт ирүүллээ. Хууль зүйн үндэсний хүрээлэнгээс Их Монгол Улс байгуулагдсан 1206 оноос өнөөг хүртэлх 804 жилийн хугацаанд үйлчилж байсан болон одоо үйлчилж буй хууль тогтоомжийг он дараалан эмхтгэсэн байна.
Монголын төрт ёс, түүх, соёлын уламжлалын сурвалж бичиг болох хуулийг ард түмний оюуны өв болгох, иргэдэд эх оронч үзэл төлөвшүүлэх, үндэсний аюулгүй байдлыг бататгах, гадаад ертөнцөд Монгол Улсыг сурталчлах, иргэдийн эрх зүйн соёл, ухамсрыг дээшлүүлэх, төрийн бодлогын уламжлал, залгамж чанарыг өнөө болон хойч үедээ өвлүүлэх соёлын өв юм. Хууль бол түүхийн үнэ цэнэтэй анхдагч эх сурвалж төрийг төдийгүй түүхэнд болж өнгөрсөн аливаа бусад зонхилох үйл явдлыг хуулиас нь л харж, тодорхойлж болно. Мөн эрх зүйн түүхэнд холбогдох эх сурвалж нь тухайн ард түмний зан заншил, эрхлэх аж ахуй, соёл, оюун сэтгэлгээний хэв шинж зэргийг шинжин мэдэж болох нэвтэрхий толь гэж үзэж болно.
Дэлхийн соёлт улс гүрнүүд үндэсний аюулгүй байдал, тусгаар тогтнол, бүрэн эрхт байдлын баталгаа болгож өөрийн түүхэнд холбогдох хууль тогтоомжийг он дараалан хэвлэж ирсэн нийтийн жишиг байна. Энэхүү 16 боть бүтээл нь дэлхий нийтийн жишгийн дагуу Монголын нэгдсэн улсын төрийн түүхэнд анх удаа бүрэн хэмжээгээр бүтээсэн томоохон туурвил, монголчуудын оюун санааны хөгжилд шинэ үе, түүх болж үлдэх бүтээл юм гэж тодорхойлолтод бичжээ.
