Хэнтий аймгийн иргэдтэй уулзлаа
Ерөнхийлөгч Ц.Элбэгдорж Хэнтий аймгийн иргэдтэй уулзах үеэр хүмүүс маш олон ажил хэрэгч санал, хүсэлт гарч байлаа.
Улс орны хөгжлийн чухал салбар болсон аялал жуулчлалыг Хэнтий аймагт хөгжүүлэхэд төрөөс дорвитой анхаарахгүй байгааг шүүмжилж, энэ бүс нутгийг аялал жуулчлал, түүхийн онцгой бүс нутаг болгон зарлаж өгөхийг хэнтийчүүд хүсэв.
Хэнтий аймгийн гишүүдийн санаачилж батлуулсан гол мөрөн, ойн сав газарт ашигт малтмал эрж хайх олборлохыг хориглох тухай хуулийг хатуу чанд мөрдүүлэхэд Ерөнхийлөгчийг анхаарал тавьж ажиллахыг иргэд хүслээ. Мөн бэлэн мөнгө олгох, тэтгэвэр тэтгэмж , цалин нэмэхдээ орлогын түвшингээр нь ялгавартай хандах нь зөв гэсэн байр суурьтай байгаагаа хэд хэдэн өндөр настан илэрхийлсэн.
“Хан Хэнтийн мянгат малчид” холбооны малчид Ерөнхийлөгчийн гаргасан “Архигүй монгол” болох уриалгыг дэмжиж байгаагаа илэрхийлж, архины олон үйлдвэрийн ард улстөрчид байгааг шүүмжилж, архи худалдаалах цэгийн тоог цөөлөх талаар шийдвэртэй арга хэмжээ авахыг хүсэв. Энэ жил зүүн аймгуудад гарсан шүлхийний үеэр холбогдох албан тушаалтнууд хугацаа алдсан, удаан ажилласан, үйлчилгээ муутай чанаргүй вакцин улсын мөнгөөр худалдаж авсан зэрэг шүүмжлэлийг сонслоо.
Үндэсний үйлдвэрлэлийг дэмжих, хөдөө аж ахуйн түүхий эдийн боловсруулах үйлдвэр барих, орон нутагт төсвийн эрх мэдлийг олгох, төрийн байгууллагуудын үргүй зардлыг багасгах, шийдвэр хөтөлбөр гаргахдаа иргэдээс санал авалгүйгээр бэлэн загвар тулгадаг байдлыг зогсоож хүмүүсийн саналыг заавал тусгадаг байх, төрийн албаны салбар зөвлөл танил тал, хамаатан саднаас хамаарахгүй шударга ажилладаг байх, сонгуулийн хуулийг яаралтай өөрчлөх хэрэгтэй гэх мэт олон шүүмжлэл, ажил хэрэгч санал, хүсэлт тавилаа.
Уулзалтын үеэр Ерөнхийлөгч Ц.Элбэгдорж иргэдийн тавьсан асуултуудад хариулж, өөрийн хийж буй ажил, баримталж байгаа бодлогоо тайлбарлав.
“Ардчилсан улсад олонхи нь юу хүсч байгааг дагаж шийдвэрээ гаргадаг. Энэ зарчимыг хаана ч мөрдүүлэхийн төлөө Ерөнхийлөгч тууштай ажиллах болно. Урт нэртэй хуулийг батлуулсан нь сайн хэрэг. Одоо энэ хуулиа чанд мөрдөж хэрэгжүүлэх хэрэгтэй, газрын дундаас буцаж болохгүй. Өмнө нь улсад 20 тонн алт тушаадаг байсан одоо 2 тонн хүрэхгүй болсон. Хэрвээ алтны компаниуд улсаас хэдэн зун тэрбум төгрөгийн нөхөн төлбөр шаардаж байгаа бол тэд улсад хэр хэмжээний алт тушаасан бэ гэдэгтэй нь уялдуулж ярих ёстой. Алтаа улсад тушаагаагүй л бол хулгайн замаар хууль зөрчин ажиллаж байгаа.Тийм хүмүүстэй хатуу ажиллах ёстой. Би Төрийн албаны зөвлөлтэй холбоотой асуудлаар Их Хурал дээр байр сууриа илэрхийлсэн. Хүмүүсийн ярьж хэлж байгаа шүүмжлэлийг дэмий сонсоод суух биш, ажлын хэсэг гарах ёстой гэж бодож байгаа. Ер нь төрийн албаны зөвлөлийг татан буулгах ёстой гэж боддог. Энэ алба өнөөдөр та бүхний шүүмжилж байгаа маягаар биш ард түмний хүсэл зоригоор ажилладаг байх ёстой. Шалгалтаа авахдаа хөндлөнгийн оролцоогүй, ил тод байж дүн нь цахим хэлбэрээр ил тавигддаг байх, тэнцсэн л бол ажилдаа орох энэ боломжийг л Төрийн албаны зөвлөл хангах ёстой.
Утааны тухай асуудлыг зөвхөн хотын гэлтгүй хөдөөний иргэд ч тавьж байна. Зарим аймагт утаа Улаанбаатарынхаас ч дутахгүй их болсон байна. Өнөөдрийг хүртэл утааг мөнгөгүйдээ биш хариуцлагагүйдээ арилгаж чадахгүй явсаар ирсэн гэж бодож байгаа. Тодорхой хугацаа зааж, төлөвлөж, хариуцлагыг зохих ёсоор нь тооцож ажиллавал арилахгүй утаа биш.
Өнөөдөр зарим иргэд цэргийн албыг бусад ажил мэргэжилтэй хослуулан хаалгах санал гаргаж буйтай санал нэг байна. Өнгөрсөн жил Ерөнхийлөгчийн дэмжлэгээр гурван аймагт барилга, инженерийн цэргийн анги нэмж байгуулсан. Баян-Өлгий аймагт 300 хүнтэй барилга, инженерийн анги үйл ажиллагаагаа эхэлсэн. Баянхонгор аймагт мөн байгуулсан. Сүхбаатар аймагт байгуулах шийдвэр гарсан, төсөв мөнгөний асуудал шийдэгдээд явж байгаа. Цэргийн албаар дамжуулан мэргэжил олгож, хөдөлмөр эрхлэх боломж өгдөг байсан тэр бодлогыг дэмжих хэрэгтэй. Хэнтий аймагт барилга, инженерийн анги байгуулахыг дэмжинэ.
Сонгуулийн хуулийг өөрчлөх хэрэгтэй гэсэн та бүхний саналтай нэг байна. Очсон , уулзсан газар бүхэнд иргэд энэ талаар саналаа хэлж, санаа зовж буйгаа илэрхийлж байна. Дахин улсыг 76 хувааж төрийн албыг худалдаж авдгийг зогсоох ёстой.
Бурхан халдун бол монголчуудын ариун шүтээн, агуу хүмүүсийн онгон огшсон гайхамшигт газар. Би, Бурхан халдун уулыг ЮНЕСКО-гийн дэлхийн өвд бүртгүүлэх бэлтгэл ажлыг хийх үүргийг Засгийн газарт зарлигаараа даалгасан байгаа. Хэнтий нутгийн ард түмэн энэ зарлигийг сайхан хүлээж авсан.
Бэлчээрийн хуулийн тухайд яаран сандран хурдан түргэн шийдэж болохгүй гэж бодож байгаа. Монголчууд эрт цагаас бэлчээр нутгаа өөрсдөө зохицуулж ирсэн, нүүдэллэж амьдардаг ард түмэн. Зарим газар малчид өөрсдөө ярилцаад , менежмент хийж эхэлсэн байна. Бэлчээрийн хууль гаргаж хүчээр зохицуулах гэж оролдох нь хүсээгүй сөрөг үр дагавар гаргаж болно гэсэн болгоомжлол малчдад байгаа юм билээ.
Монгол Улсын Ерөнхийлөгчийн хөдөө орон нутагт ажилласны дараа хийх ажлын төлөвлөгөө гарч, шийдвэрлэх асуудлуудын дагуу Засгийн газарт чиглэл өгдөг. Өнгөрсөн жил орон нутагт ажилласны дагуу хийхээр төлөвлөсөн, шийдвэрлэхээр жагсаасан асуудлууд 80 хувьтай биелсэн. Үлдсэн 20 хувь нь энэ жил шийдэгдэхээр төсөвт тусаад явж байгаа. Энэ удаад Дорнод, Сүхбаатар, Хэнтий аймгуудад ажилласны дагуу мөн хийж хэрэгжүүлэх ажлын төлөвлөгөө гарах болно” гэж Ерөнхийлөгч хэллээ. Ерөнхийлөгч Ц.Элбэгдорж Хэнтий аймагт иргэдтэй уулзалт хийсний дараа нийслэлийн Багануур дүүрэгт ажиллав.
Хэнтий аймгийн иргэдтэй уулзлаа
