Монгол Улсын Ерөнхийлөгч Ц.Элбэгдорж удахгүй болох эх үрсийн баярыг тохиолдуулан зарлиг гаргаж, олон хүүхэд төрүүлэн, өсгөж хүмүүжүүлсэн эхчүүдийг “Алдарт эх” одонгоор өнөөдөр шагнав.
ХУД-ийн 10 дугаар хорооны иргэн Чоймболын Банзрагч, ЧД-ийн 7 дугаар хорооны иргэн Цэвээний Баяр, 8 дугаар хорооны иргэн Санжаажавын Замбага, 17 дугаар хорооны иргэн, өндөр настан Аюушийн Магсаржав, СХД-ийн 6 дугаар хорооны иргэн, өндөр настан Банзарваанийн Ичинхорлоо, 18 дугаар хорооны иргэн Дашламдангийн Рийна, 7 дугаар хорооны иргэн, өндөр настан Дашнямын Халтархүү, БГД-ийн 23 дугаар хорооны иргэн Володяагийн Оюунгэрэл, СБД-ийн 16 дугаар хорооны иргэн Нямын Өнөртогтох, БЗД-ийн 7 дугаар хорооны иргэн, өндөр настан Дэнзэнгийн Сайнжаргал, БНД-ийн 5 дугаар хорооны иргэн Гомбосүрэнгийн Чанцалдулам нарт “Алдарт эх”-ийн нэгдүгээр одон,
СХД-ийн 10 дугаар хорооны иргэн Тогтоолын Алтанцэцэг, 17 дугаар хорооны өндөр настан Жамганы Саранцэцэг, СБД-ийн 1 дүгээр хорооны өндөр настан Бат-Очирын Дулмаа, 8 дугаар хорооны иргэн, 75 дугаар сургуулийн нийгмийн ажилтан Дамирангийн Майцэцэг, 17 дугаар хорооны иргэн Данзангийн Нэргүй, ЧД-ийн иргэн Чойжилын Нямжав, БГД-ийн 8 дугаар хорооны иргэн Лувсангомбын Оюунтуяа, БЗД-ийн иргэн Сосорбурамын Өнөрбилэг, ХУД-ийн иргэн Чимэдийн Эрдэнэчимэг, Орхон аймгийн Баян-өндөр сумын иргэн Санжаахандын Одончимэг нарт “Алдарт эх”-ийн хоёрдугаар одон гардуулж, баяр хүргэлээ.
Ерөнхийлөгч Ц.Элбэгдорж хэлэхдээ “Эрхэм хүндэт ээжүүддээ ирж байгаа эх үрсийн баярын мэнд хүргэе. Монголын төрийн хамгийн нэр хүндтэй шагнал болох “Алдарт эх”-ийн одонгоо хүртсэн эрхэмсэг ээжүүддээ чин сэтгэлийн баяр хүргэе. Эх үрсийн баяр эхийн цагаан сүүний баяр үргэлж сүүн замтай байхын ерөөл дэвшүүлье.
Энэ 2011 он бол их түүхт ойн жил. Мөн Монголын олон арван мянган ээжүүдэд онцгой баяр, гүн хүндэтгэл тохиож буй он юм. Монгол улсын түүхэнд анх удаа хамгийн олон ээж “Алдарт эх”-ийн одон хүртсэн жил болж байгаараа энэ 2011 он түүхэнд бас онцлог юм.
Удахгүй одонгоо хүртэх 130 гаруй мянган ээжийг төлөөлүүлэн Монголын 21-н сайхан ээжид өнөөдөр би “Алдарт эх”-ийн одонг нь гардууллаа. Өнөөдөр мөн одонгийнхоо болзлыг хангасан бүх буянт ээжүүдээ шагнах зарлигт гарын үсэг зурлаа. Өнөөдрийн миний зарлиг 108 дахь дугаартай байгаад бас билэгшээж байна. Орчлонд хүний ховор заяаг олж төрсөн хүн бүрт ижийгээс нь илүү эрдэнэ гэж, ачтан гэж үгүй билээ.
Монголын сайхан ижий бүхэн Монгол үндэстэнг мөнхөд тээж, тэтгэж яваа буянт Дарь эхүүд юм.
“Дарь эхүүд 21 байдаг гэдэгт би итгэдэггүй
Даруухнаар айл бүрт нэг нэгээрээ байдаг юм” гэж манай нэгэн алдарт найрагч өгүүлсэн байдаг.
Дарь эх болсон сайхан ээжүүд, эмээ нараа үргэлж баярлуулж байхыг үр хүүхдүүд, ач, зээ нараас нь хүсье.
“Алдарт эх”-ийн одонг ээжүүддээ гардуулах ёслолыг Монгол улсын нийслэл, бүх аймаг, дүүрэг, сум, баг, хороодын удирдлагууд дор бүрнээ ёс төр, хүндэтгэлтэй зохион байгуулна гэдэгт итгэж байна. Төр засгаас ард иргэд, ээжүүдийнхээ санал санаачлага хүсэлтэд гүн хүндэтгэлтэй хандаж асуудлыг аль болох амьдралын үнэнд ойртуулж шийдвэрлэхийг хичээж байна. Алдарт ээжүүдээ урамшуулах, шагнах, хүндэтгэх бодлого Монголын төрд үеийн үед уламжлагдан хадгалагдах болно.
Үр хүүхдийнхээ буян заяа, хийморь, сайн сайхны төлөө өглөө үдэшгүй залбиран зүтгэдэг, Монгол үндэстний мөнхөд оршихын алтан хэлхээ болсон, ачтан буянтаны ариун дээд шүтээн нийт ээжүүддээ баяр хүргэж чин сэтгэлээсээ ээжүүддээ “Хайртай шүү” гэдгээ дахин дахин хэлье.
Энэ дашрамд элбэрэлт ээждээ охин нь, хүү нь болж төрсөн, одон, цэцэг, баяр баясгалан нь болж ирсэн нийт иргэд, хүүхэд багачууддаа баяр хүргэж хамгийн сайн сайхныг хүсэн ерөөе!
Монголын буянт ээжүүдийн алдар суу мөнхөд дуурсах болтугай. Монголчууд улам олон болох болтугай.
Ээжүүддээ дахин баяр хүргэе” гэв.
