Өнөөдөр Иргэдэд туслах хүний эрхийн төв, Хүчирхийллийн эсрэг үндэсний төв, Монголын эмэгтэйчүүдийн сангийн санаачилгатайгаар Монгол Улсын Ерөнхийлөгчийн дэргэдэх “Иргэний танхим”-д “Хүүхдийн бэлгийн халдашгүй байдал ба бэлгийн болзошгүй хүчирхийллээс хамгаалах нь” сэдэвт нээлттэй хэлэлцүүлэг боллоо.
Хэлэлцүүлэгт Эрүүл мэндийн яам, Боловсрол, соёл, шинжлэх ухааны яам, Нийслэлийн Шүүх, Цагдаагийн ерөнхий газар, Хүний эрхийн үндэсний комисс, Шүүх шинжилгээний үндэсний хүрээлэн, төрийн бус байгууллагуудын төлөөлөл оролцлоо.
Уг хэлэлцүүлгээр насанд хүрээгүй хүүхдүүдээс хүчингийн гэмт хэрэгт өртөж байгаа нөхцөл шалтгаан, түүнээс гарах сөрөг үр дагавар, хохирогчдод үзүүлэх эмчилгээ, сэтгэл зүйн үйлчилгээ, бэлгийн болзошгүй хүчирхийллээс хамгаалах зэрэг эрх зүйн орчныг боловсронгуй болгох асуудлаар ярилцлаа.
Цагдаагийн ерөнхий газрын Нийгмийн хэв журам хамгаалах газраас Хүүхдийн эрхийн конвенц, бусад холбогдох хууль тогтоомжийг үндэсний хэмжээнд хэрэгжүүлэх бодлого боловсруулж, хүүхдийн эрхийг хангах чиглэлээр хариуцсан чиг үүргийн дагуу ажилладаг төрийн болон төрийн бус байгууллагуудын үйл ажиллагааг уялдуулан зохицуулах шаардлагатай байгааг дурдаад цаашид хүүхдийн асуудал хариуцсан төрийн захиргааны төв байгууллагыг чадавхжуулж, бүтэц, үйл ажиллагааг төгөлдөршүүлэх талаар саналаа хэллээ.
Шүүхийн шинжилгээний үндэсний хүрээлэнгийн Шинжилгээний лабораторийн хэлтсийн дарга С.Ганболд хэлэхдээ генийн мэдээлэл, бүртгэлийн сан бий болгоход эрх зүйн орчинг бүрдүүлэх талаар хууль санаачилж, бодлого боловсруулж ажиллах нь хүчингийн болон бусад гэмт хэргийн илрүүлэлтэнд дэвшил гарах хамгийн оновчтой хувилбар болох саналыг дэвшүүллээ.
Түүнчлэн оролцогчид гэр бүлийн болон бэлгийн хүчирхийлэлд өртөгсдөд тусламж, үйлчилгээ үзүүлэх эмнэлэгт түшиглэсэн нэг цэгийн үйлчилгээний төвийн тоог нэмэгдүүлэх, охидын мэргэшсэн эмч бэлтгэх, хүүхдийг хүчирхийлэлд өртөхөөс урьдчилан сэргийлэх зорилгоор ерөнхий боловсролын сургуулиудын хичээлийн хөтөлбөрт энэ талын хичээл оруулах шаардлагатай байгаа талаар эрх бүхий албан тушаалтануудад саналаа хүргүүллээ.
