ХОВД АЙМАГ БАЙГУУЛАГДСАНЫ 80 ЖИЛИЙН ОЙН БАЯРТ
Ховд нутгийн элэг нэгт ахан дүүс ээ!
Монгол Алтайн сүрлэг уулс, Их нууруудын хотгорын уудам хөндий, Алтайн өвөр говийн элсэн манхан зэрэг байгалийн түмэн зүйл, мянган гайхамшиг хосолсон уугуул сайхан нутгийнхаа эзэн нь болсон хөдөлмөрч, бүтээлч ард түмэндээ Ховд аймаг байгуулагдсаны түүхт 80 жилийн ойн баярын мэнд хүргэе.
Улиран өнгөрсөн 80 жил бол шинэ Монгол Улсын ирмүүн бүтээн байгуулалтын их түүхийн нэгэн хэсэг, манай олон үндэстэн ястан, ард иргэдийн сэргэн мандаж, цэцэглэн хөгжсөний дурдатгал төдийгүй Ховд хэмээн алдаршин дуурсагдсан аймаг бүлийнхний эв найртай аж төрөхүй, бүтээн байгуулалтын бахархалт он жилүүд байсан билээ.
2011 он гарснаас хойш Ховдчууд та бүхэн Ховд хотын доторх хар замуудыг бүрэн хэмжээгээр шинэчлэн засварлаж, Баруун бүсийн хүүхэд, залуучуудын цэцэрлэгт хүрээлэнгийн эхний ээлж, Ховдын олон үндэстэн ястны өв соёлын хүрээлэн, шинэ бага сургууль, ахмадын өргөөг барьж дуусган, хотын гэрэлтүүлгийг шинэчилэн, бүх байгууллага, гудамж, талбайгаа засч, тохижуулжээ. Мөн түүнчлэн 777.8 мянган эх мал төллүүлж, гарсан төлийг 75.3 хувьтай бойжуулан, газар тариалангийн үйлдвэрлэлийг сүүлийн жилүүдэд тогтмол нэмэгдүүлэн 2599.1 га талбайд тариалалт хийсэн зэрэг тодорхой амжилтанд хүрснийг Монгол Төрийн тэргүүний хувьд талархан сайшааж байна.
Баатарлаг түүх, баялаг уламжлалтай Ховчууд маань айлчлан ирэх он жилүүдэд орон нутаг төдийгүй бүс нутгаа хөгжүүлэх их үйлст хүчин чармайлт гаргаж, дотоод нөөц бололцоогоо ашиглан эрдэс баялаг, мал аж ахуйн түүхий эдээ боловсруулж, бүс нутагт зохицсон үйлдвэрлэлийн орчныг бий болгохын зэрэгцээ нийгмийн баялаг болсон хүнээ анхаарч мэдээллээр хангах, ард нийтийн боловсрол, соёлын түвшинг дээшлүүлэх, иргэдэд үзүүлэх үйлчилгээг сайжруулах, эмнэлэгийн тусламжийг иргэддээ ойртуулах, ажилгүйдэл ядуурлыг бууруулах, ажиллагсдын нийгмийн асуудлыг шийдвэрлэх талаар ихээхэн анхаарч амжилт гаргана гэдэгт итгэж байна.
Энэхүү баяр наадмыг ёслол төгөлдөр тэмдэглэхийн зэрэгцээ наадмын маргааш намар гэдгийг марталгүй аймаг, сум, багийн удирдлагууд, салбарын ажилтнууд, малчин иргэд маань шаргуу хөдөлмөрлөж, өвлийн бэлтгэлийг чамбай хангаж, отор нүүдэл хийхэд шаардлагатай арга хэмжээг цаг алдалгүй зохион байгуулах нь зүйтэй.
Үеийн үед эх орныхоо тусгаар тогтнолын төлөө баатарлагаар тэмцэж, хөгжил цэцэглэлтэд үнэтэй хувь нэмэр оруулж ирсэн төрөлх нутгийнхаа эвсэг олон ахан дүүстээ хөдөлмөр бүтээлийнхээ түүхээр бахархан, урлаг соёлын ариун нандин бүхнээ сэргээн, баяр наадмаа ёслол төгөлдөр сайхан тэмдэглэж, хүлэг бүхэн нь шандастай, хүчит бөхчүүд нь бяртай, харвасан сум нь мэргэн байж шунхан улаан уулсынхаа дунд, шуранхайн тэнүүн аялгуун дор элгээрээ энх амгалан, төрлөөрөө түвшин амгалан тавтай сайхан наадахын өлзий дэмбэрэлтэй ерөөлийг өргөн дэвшүүлье!
МОНГОЛ УЛСЫН ЕРӨНХИЙЛӨГЧ ЦАХИАГИЙН ЭЛБЭГДОРЖ
2011 оны 07 дугаар сарын 29
