Монгол Улсад залуучуудын хөдөлгөөн үүсч хөгжсөний 90 жилийн ойд
Монголын залуучуудын байгууллагын үе үеийн удирдах ажилтнууд, идэвхтэй гишүүд та бүхэнд болон нийт залуучууддаа Монгол Улсад залуучуудын хөдөлгөөн үүсч хөгжсөний 90 жилийн ойн халуун мэндчилгээг дэвшүүлье.
Одоогоос 100 жилийн тэртээ Монголын ард түмэн улс орныхоо тусгаар байдлыг сэргээсэн билээ. Гэвч дахин бусдын эрхшээлд орсны улмаас монголчууд эрх чөлөө, тусгаар тогтнолоо эргүүлэн авах тэмцэлд 1921 онд боссон юм. Энэ тэмцлийн уриан дуунаар Монголын Залуучуудын анхны байгууллага үүсэн бий болжээ. Энэ бол Монголын Хувьсгалт Залуучуудын Эвлэл юм.
Түүхийн үе бүрт залуучууд улс орны хөгжлийн түшиг тулгуур, гол хүч, тусгаар тогтнол, ардчилал, эрх чөлөөний баталгаа болж байсан.
Монгол төрийн 6 одонгоор тус байгууллагыг шагнасан нь Монголын Хувьсгалт Залуучуудын Эвлэл улс орныхоо тусгаар тогтнолыг хамгаалах, шинэ Монгол Улсыг сэргээн хөгжүүлэх, ард түмнийг гэгээрүүлэх, залуу үеийнхнийг хүмүүжүүлэх үйлсэд ихээхэн үүрэг гүйцэтгэснийг илтгэх биз ээ.
Монгол орны тусгаар тогтнол, бүрэн эрхт байдлыг жинхэнэ утгаар нь баталгаажуулсан ардчилсан хувьсгалын давалгаанаар 1991 онд мэндэлсэн Монголын Залуучуудын Холбоо нь Монголын Хувьсгалт Залуучуудын Эвлэлийн залгамжлагч бөгөөд зах зээлийн эдийн засгийн цоо шинэ харилцаа бүрэлдэн тогтох үеийн залуучуудын нийгмийн сэтгэлгээ, оюун санааны хөгжлийг зөв төлөвшүүлэхэд багагүй үүрэг гүйцэтгэж байна.
Монголын Залуучуудын Холбоо нь аль нэг улс төрийн намын үзэл баримтлалд дулдуйдалгүй залуучуудын нийтлэг хүсэл эрмэлзэл, эрх ашигт нийцүүлэн үйл ажиллагаа явуулж, тэднийг эх оронч, хөдөлмөрч, эрх чөлөө шударга ёсыг эрхэмлэгч, өв уламжлалаа хүндэтгэх үзлээр хүмүүжүүлэн Монгол орныхоо жинхэнэ эзэд нь байхад, цаг хугацаатай уралдан хөдөлмөрлөж суралцахад нь илүүтэй анхаарвал зохино.
Шинэ үеийн залуучуудын нийгмийн идэвхийг өрнүүлэх, санал санаачилгыг дэмжих, тэдэнд урам хайрлах, ахмад залуу үеийнхний нандин холбоог бэхжүүлэх нь залуучуудын байгууллагын үе үеийн удирдагчид, идэвхтэй гишүүд, ахмад зүтгэлтнүүд та бүхний хүндтэй үүрэг юм.
Монгол орны ирээдүйг бид өөдрөг, гэрэл гэгээтэйгээр төсөөлөн харж байна. Гэхдээ залуу үеийнхний оюун ухаан, цог золбоо, эрдэм чадал, хичээл зүтгэлээс ихээхэн хамаарах нь дамжиггүй ээ. Бид залуу үедээ итгэдэг.
Монголын залуучууд ямагт өөдрөг, хийморлиг, цог золбоотой байж, дэлхийн үе тэнгийнхэнтэйгээ хөл нийлүүлэн урагшлахын өлзийтэй ерөөлийг дэвшүүлье.
Монгол Улсын Ерөнхийлөгч Цахиагийн Элбэгдорж
