Ерөнхийлөгчийн санаачилгаар өрнөж буй “Архигүй Монголын төлөө хамтдаа” аяны хүрээнд Ерөнхийлөгчийн тамгын газрын дэд дарга Б.Нэргүй тэргүүтэй ажлын хэсгийнхэн Нийслэлийн Баянзүрх дүүрэгт ажиллаж уулзалт - ярилцлага зохион байгуулав.
Баянзүрх дүүргийн засаг дарга Б.Батзориг уулзалтын эхэнд тус дүүрэг архидалтын эсрэг эрчимтэй ажиллаж байгаа, манай дүүрэг архитай тэмцэх аян өрнүүлэн дүүргийн хэмжээнд ажлын хэсэг байгуулсан бөгөөд иргэдийхээ ухамсартай нь ярья гэсэн уриан дор ажлаа эхлээд байна. Архи хэрэглэж байгаа хүмүүсийн ухамсарыг өөрчлөх тухай шат дараатай арга хэмжээ авч байгаа, цаашлаад 21 нас хүрээгүй иргэдэд архи, согтууруулах ундааг худалдаалахгүй байх талаар аж ахуй нэгж компаниудтай хамтран ажиллах зорилт тавьж буйгаа танилцуулав.
Тус дүүрэг архины эсрэг санаачилгыг дэмжин “Архидалтгүй дүүрэг” болох зорилт тавин ажиллаж юм байна.
Дараа нь Ерөнхийлөгчийн Тамгын газрын зохион байгуулж буй цуврал лекцийн үндсэн илтгэгч болох “Архи тамхины шалтгаант эмгэг судлалын төв”-ийн тэргүүн Ж.Цогтсугар архины хор хөнөөлийн тухай илтгэл тавьж иргэдэд мэдээлэл хүргэсэн юм.
Тэрээр хэлэхдээ, Хүний биеийн 90 хувийг тархи удирддаг. Архи уудаг хүний тархи хамгийн ихээр гэмтдэг. Гадаадын ихэнх оронд хүн амын 4 хувь архинд донтсон тохиолдолд Үндэсний аюулгүй байдалд шууд заналхийлж байна гэж үздэг. Гэтэл Монгол Улсад хүн амын 51 хувь нь архи хэтрүүлэн хэрэглэж байгаа гэх судалгаа гарчихаад байна. Энэ л үед хүн бүр өөрсдөө санаж сэрж, оюун санааны шинэчлэл хийх хэрэгтэй юм” хэмээв.
Ерөнхийлөгчийн Тамгын газрын дэд дарга Б.Нэргүй уулзалтын төгсгөлд хэлэхдээ, “Энэхүү арга хэмжээнд маш идэвхтэй оролцсон та бүхэнд их баярлалаа. Өнөөдрийн уулзалт лекцийн үр дүн юугаар хэмжигдэх вэ? гэхээр та бүхэн ажил албандаа энэ мэдээллийг хүргэж, өөрсдөө соён гэгээрүүлэгч, үлгэрлэн дагуулагч болон ажиллах нь хамгийн чухал юм. Энэ аяны хүрээнд цаашид олон ажил өрнөх байх бид нийгмийг архины хамааралаас гарах хүртэл энэ ажлаа үргэлжлүүлэх болно” хэмээн онцлон хэллээ.
Архигүй Монголын төлөө хамтдаа аян үргэлжилж байна.
