Уур амьсгалын өөрчлөлт бол хүн төрөлхтөний өмнө тулгарч байгаа нэн тулгамдсан асуудлын нэг болоод байна.

 

Арлын болон далайн эргийн орнууд усны түвшин нэмэгдэж байгаа тухай түгшүүртэйгээр зарлаж, эх газарт цөлжилт явагдаж байгааг бид мэднэ.

Хүний үйл ажиллагааны улмаас агаар мандалд ялгарч байгаа хүлэмжийн хийн хэмжээг тогтворжуулах, уур амьсгалын өөрчлөлтөөс болж байгаа сөрөг нөлөөллийг багасгах сааруулах үндсэн зорилтуудыг тусгасан НҮБ-ын суурь конвенц \1992\, Киотогийн протокол \1997\-ыг үр дүнтэй, тогтвортой даган мөрдөх шаардлагатай байгааг нөхцөл байдал улам бүр харуулсаар байна.

Өнөөдөр зоригтой шийдвэр, тодорхой арга зам хэрэгтэй байгаа бөгөөд чухам тийм шийдвэрийг Копенгагенд энэ сарын 7-нд эхэлсэн НҮБ-ын суурь конвенцийн талуудын 15-р бага хурлаас гаргана гэж хүн төрөлхтөн хүлээж байна.

Хөгжилтэй болон хөгжиж буй орнууд хүлэмжийн хийг бууруулах, дунд хугацааны тодорхой зорилтыг дэвшүүлэх, хөгжиж буй орнуудад уур амьсгалын дасан зохицох, түүний сөрөг нөлөөллийг бууруулахад шаардлагатай санхүүгийн болон технологийн асуудлыг шийдвэрлэж, улмаар эдгээр үйл ажиллагааг зохицуулах ил тод бүтэц бий болгох асуудлыг цогцоор нь шийдвэрлэхийн тулд улс орнууд нэгдсэн тохиролцоонд хүрэх шаардлагатай билээ. Хүлэмжийн хийг бууруулах талаар, ОХУ, Япон, БНСУ, Бразил зэрэг хөгжингүй орнуудаас гаргаж байгаа хүчин чармайлт нь уур амьсгалын өөрчлөлтийн талаарх яриа хэлэлцээг урагшлуулах , улмаар Копенгагены хурлыг үр дүнтэй болгоход ихээхэн ач холбогдолтой болох юм.

Дани улсын Копенгаген хотноо 2009 оны 12 дугаар сарын 7-18-ны өдрүүдэд болох НҮБ-ын суурь конвенцийн талуудын 15-р бага хурал болон 16-18-ны өдрүүдэд болох Төр засгийн тэргүүн нарын өндөр түвшний хуралдаанд Конвенцид оролцогч бүх орны удирдагчид уригдаад байгаа бөгөөд, нэгдсэн тохиролцоонд хүрэх ганцхан зорилгоор чуулж байна.