Монгол Улсын Ерөнхийлөгч Ц.Элбэгдорж өнгөрсөн оны 12 дугаар сард уур амьсгалын өөрчлөлтийн асуудлаарх Копенгагений дээд хэмжээний хуралд оролцохдоо Монгол Улсад тохиолдож буй цөлжилт болон дэлхийн дулаарал Монгол орон, монголчуудын аж амьдралд хэрхэн нөлөөлж буй талаар анхаарал татсан үг хэлж, энэ асуудлаар дэлхийн тэргүүлэх улс төрчидтэй уулзан ярилцсан билээ. Тэрээр мөн 2009 оны 9 дүгээр сард Нью-Йорк хотноо болсон уул амьсгалын өөрчлөлтийн асуудлаарх НҮБ-ын хуралд оролцож, салбар хуралдааныг даргалсан юм.
Уур амьсгалын өөрчлөлтийн чиглэлээр Монгол Улсын Ерөнхийлөгчийн баримталж буй идэвхитэй байр суурийг олон улсын тавцанд зүй ёсоор үнэлж, ялангуяа Копенгагены хурлын индрээс “зөвхөн ярих гэж ирээгүй, бодит ажил болгохыг зорьж байна” гэсэн түүний үг олон улс төрчдийн хэлэх дуртай үг болсон байна.
Давосын дэлхийн эдийн засгийн чуулга уулзалтын хүрээнд байгуулагдсан Уур амьсгалын асуудлаарх дэлхий нийтийн зөвлөлд ажиллахыг урьж, улмаар 1 дүгээр сарын 13-ны өдөр болох уг зөвлөлийн видео хуралд хүндэт зочноор оролцохыг урилаа. Уг зөвлөлд НҮБ болон байгаль орчин, уур амьсгалын өөрчлөлтийн чиглэлийн олон улсын бусад байгууллагуудын тэргүүнүүд, Кэмбриджийн их сургууль, АНУ, Австрали, Швейцар, Германы судалгааны томоохон төвүүдийн захирал, Грийнпийс зэрэг төрийн бус байгууллагуудын удирдлагаас гадна Их Британийн Ерөнхий сайд асан Тони Блейр зэрэг нөлөө бүхий улсс төрчид багтдаг.
Видео хурлын үеэр Копенгагены бага хурлын үр дүн, уур амьсалын өөрчлөлтийн эсрэг тэмцэхэд авч хэрэгжүүлэхээр уг зөвлөлөөс гаргасан уриалга, зөвлөмжийн хэрэгжилт, мөн удахгүй болох Давосын чуулга уулзалтын үеэр уур амьсгалын өөрчлөлтийн асуудлаар баримтлах байр суурийн талаар ярилцана.
Монгол Улсын Ерөнхийлөгч Давосын уулзалтын үеэр болох усны асуудлаарх салбар хуралдааныг даргалахаар мөн уригдаад байна.
