Энэ өдөр Ерөнхийлөгч Ц.Элбэгдоржид, Йоркийн гүн хунтайж Эндрю бараалхлаа. Манай улсад олонтаа айлчилж байсан, Монголд ээлтэй гүн Эндрю энэ удаад ч мөн Монгол улсын хөгжлийн асуудлаар Ерөнхийлөгчтэй санал солилцсон юм.
“Би Монгол улсыг богино хугацаанд эрчимтэй хөгжинө гэдэгт итгэдэг. Улаанбаатар хот намайг очих бүрт улам бүр тэлсэн харагддаг. Гэвч утаа, гэр хорооллын асуудал та бүхний санааг зовоож байгаагийн адил миний санааг ч мөн зовоож байна. Энэ талаар ямар нэг дорвитой шийдвэр гаргаж, бодит алхам хийхэд туслахад би бэлэн байна” гэж гүн Эндрю ярилаа. Тэрээр ойрын хугацаанд Монголд очих бодолтой байгаагаа хэлсэн.
Ерөнхийлөгч Ц.Элбэгдорж, Монголчуудад өөриймсөг сэтгэлээр хандаж ирсэнд нь талархал илэрхийлээд, гадаад улс орнуудад манай улсыг сурталчилахад үнэтэй хувь нэмэр оруулсны нь үнэлж “Алтан гэрэгэ” гардууллаа.
“Алтан гэрэгэ“ нь Монгол Улсыг гадаадад сурталчилж, хоёр талын харилцааг өргөжүүлэхэд хувь нэмрээ оруулж байгаа нэр хүндтэй хүмүүст очдог хүндэт өргөмжлөл юм.
