БНЭУ-ын Ерөнхийлөгч Пратиба Дэвисингх Патил-аас хүндэтгэн барьсан зоогон дээр Монгол Улсын Ерөнхийлөгч Цахиагийн Элбэгдоржийн хэлсэн үг

2009 оны 09-р сарын 16-нд Бусдад түгээх

Эрхэмсэг хатагтай Ерөнхийлөгч өө Эрхэмсэг ноён Дэвисингх Рамсингх Шекхават Эрхэм хүндэт Энэтхэг анд нар аа Хатагтай ноёд оо Монгол Улсын Ерөнхийлөгчийг үзэсгэлэнт сайхан Энэтхэг орондоо найрсгаар урьж, халуун дотноор хүлээн авч, өндөр хүндэтгэл үзүүлж байгаад Эрхэмсэг хатагтай Ерөнхийлөгч Танд хувиасаа болон нийт төлөөлөгчдийнхөө өмнөөс гүн талархал илэрхийлье. Монгол Энэтхэгийн ард түмний хэлхээ, холбоо олон мянган жилийн түүхтэй билээ. Соёлын харилцааг 2500 жилийн тэртээгээс уламжлалтай гэдэг бөгөөд манай Монголчууд Энэтхэгийг Жагарын орон гэж нэрлэдэг юм. Жагар гэдэг үг нь цэвэр ариун гэсэн утгатай. Дэлхий дээр Энэтхэг орныг ийнхүү нэрийддэг цорын ганц үндэстэн нь монголчууд байж мэдэх юм. Буддын шашны хамтаар Монголд эртний Энэтхэгийн соёл, урлаг, утга зохиол ихээхэн хэмжээгээр дэлгэрснийг Ганжуур, Данжуур гэдэг эртний Энэтхэг шашны утга зохиолын хоёр их цоморлигоор жишээ болгоход хангалттай. Энэтхэг Улсын эдийн засгийн эрчимтэй хөгжил, сүүлийн жилүүдэд олж буй ололт амжилтыг монголчууд бид бахдан харж, сонсож байна. Мэдээллийн технологи, боловсрол, соёлын салбар дахь манай хоёр орны харилцаа, хамтын ажиллагаа гүнзгийрэн хөгжиж байгаад баяртай байна. Манай ирээдүй болсон өсвөр үеийхэнд орчин цагийн шаардлагыг хангасан мэдлэг боловсрол эзэмшүүлэхээр Энэтхэгийн Засгийн газраас тэтгэлэг олгосоор байгаад туйлын баяртай байдгаа илэрхийлье. Монгол Улс Ази, Номхон далайн орнуудтай хамтын ажиллагааг өргөтгөн хөгжүүлэхийг гадаад бодлогынхоо тэргүүлэх чиглэл болгодог. Энэ хүрээнд БНЭУ-тай тогтоосон олон талт хэлхээ холбоог гүнзгийрүүлэх зорилт Монголын төр засгийн анхаарлын төвд байдаг юм. Манай хоер орны харилцаа эдүгээ түншлэлийн шинж төлвийг нэгэнт олж, өргөжиж буйд бид сэтгэл нэн хангалуун байна. Миний бие айлчлалынхаа үеэр БНЭУ-ын Эрхэмсэг хатагтай Ерөнхийлөгч, дэд Ерөнхийлөгч, Ерөнхий сайд зэрэг удирдлагуудтай уулзаж, хоёр талын харилцааны болон олон улс, бүс нутгийн өргөн цар хүрээтэй асуудлуудаар санал бодлоо солилцлоо. Бидний уулзалт яриа элэгсэг дотно, үр дүнтэй болсонд сэтгэл хангалуун байна. Энэхүү айлчлалын үр дүнд хоёр орны харилцаа, хамтын ажиллагаа улам бүр өргөжин бэхжинэ гэдэгт итгэл төгс байна. Энэ хундагыг: Эрхэмсэг хатагтай Ерөнхийлөгч таны, Эрхэмсэг ноён Дэвисингх Рамсингх Шекхават Таны эрүүл мэндийн төлөө, Монгол Энэтхэгийн ард түмний уламжлалт найрамдалд харилцаа, түншлэл улам бэхжин хөгжихийн төлөө, Энэтхэгийн ард түмний сайн сайхны төлөө өргөе.